གཞན་སྟོང་དབུ་མའི་དོགས་གཅོད་བསྡུས་པ་ངེས་དོན་གསལ་བའི་སྒྲོན་མེ།
མཁན་ཆེན་ཚུལ་ཁྲིམས་བློ་གྲོས།
དེ་ལ་ཁ་ཅིག་གིས་ནི་འདི་བོད་ཀྱིས་རང་བཟོ་ཡིན་པ་དང༌། མུ་སྟེགས་པའི་ལུགས་ཡིན་སོགས་ཟེར་རོ།། འོན་ཀྱང་གཟུ་བོར་གནས་པའི་བློས་རྣམ་པར་བརྟགས་ན་འདི་ལྟར་སྣང་སྟེ། འདི་རང་བཟོ་ཡིན་ཞེས་པ་ནི་ཤིན་ཏུ་མི་འཐད་དེ། དཔལ་ལྡན་ཇོ་ནང་པ་རྣམས་ཀྱིས་སྙིང་པོ་བསྟན་པའི་མདོ་རྣམས་དང༌། རྒྱུད་བླ་རྩ་འགྲེལ། ཆོས་དབྱིངས་བསྟོད་པ། བླ་མེད་ཀྱི་རྒྱུད་སྡེ། སེམས་འགྲེལ་སོགས་ནས་གསུངས་པ་རྣམས་ཇི་ལྟ་བ་བཞིན་དུ་བཀྲལ་འདུག་གི དེ་རྣམས་ནས་གཏན་ནས་མ་བཤད་པའི་གཞན་སྟོང་ཞིག་གང་དུའང་བཤད་པ་མི་སྣང་བའི་ཕྱིར་རོ།། གལ་ཏེ་མིང་གཞན་སྟོང་ཞེས་བཏགས་པ་ཙམ་གྱིས་རང་བཟོའི་གྲུབ་མཐའ་ཉིད་དུ་འགྱུར་འགྲོ་བར་སྨྲ་བ་ནི་ཧ་ཅང་ཐལ་ལོ།། མུ་སྟེགས་པའི་ལུགས་སུ་སྨྲ་བ་ནི་དགོས་པའི་དབང་ངམ་གྱ་ཚོམ་དུ་སྨྲ་བ་སྟེ། ཇོ་ནང་བའི་གཞན་སྟོང་དང་མུ་སྟེགས་པའི་བར་དུ་མ་ཟད་རང་སྡེ་རྣམ་རིག་པ་དག་དང་གཞན་སྟོང་དབུ་མའི་བར་གྱི་བར་ཐག་ཀྱང་གནམ་ས་ལས་རིང་བའི་ཕྱིར་རོ།། དེས་ན་འདི་ལ་དོགས་པ་འགའ་ཞིག་སྤོངས་པ་ལ། སྣང་ཕྱོགས་ཀྱི་དོགས་པ་སྤོངས་པ་དང༌། སྟོང་ཕྱོགས་ཀྱི་དོགས་པ་སྤོངས་པ་དང༌། བརྗོད་ཚུལ་མི་འཐད་པའི་དོགས་པ་སྤོངས་པའོ།།
དང་པོ་ནི། སེམས་ཅན་ཐམས་ཅད་སངས་རྒྱས་ཀྱི་རང་བཞིན་ཅན་ཡིན་ན། ཁྱི་རྒན་རྒྱ་བོ་ཡང་མཚན་དང་དཔེ་བྱད་ལྡན་པའི་སངས་རྒྱས་ཡིན་པར་འགྱུར་བ་དང༌། སངས་རྒྱས་དམྱལ་བར་འགྲོ་བར་ཐལ་བ་སོགས་ཀྱི་སྐྱོན་ཡོད་སྙམ་དུ་སེམས་ན། གནས་ཚུལ་ལ་ཁྱི་རྒན་རྒྱ་བོར་མ་ཟད་ཐ་ན་གྲོག་སྤུར་ཡན་ཆད་སེམས་ཅན་ཐམས་ཅད་སངས་རྒྱས་མ་ཡིན་པ་གཅིག་ཀྱང་མེད་དེ། སེམས་ཡོད་ན་སེམས་ཀྱི་རང་བཞིན་འོད་གསལ་བ་སྐུ་དང་ཡེ་ཤེས་འདུ་འབྲལ་མེད་པའི་ངོ་བོའང་འབྲལ་མེད་དུ་ཡོད་པས་ཁྱབ་པའི་ཕྱིར་རོ།། དེས་ན་མཚན་དང་དཔེ་བྱད་ཡོད་པའང་ཤིན་ཏུ་འདོད་དོ།། སྣང་ཚུལ་ལ་ནི་ཁྱི་རྒན་རྒྱ་བོར་མ་ཟད་འཁོར་ལོ་སྒྱུར་བའི་རྒྱལ་པོའང་སངས་རྒྱས་སུ་ཁས་མ་བླངས་བས་སངས་རྒྱས་ཀྱི་མཚན་དཔེ་ཡོད་པ་མ་ཡིན་ན་ཁྱི་རྒན་རྒྱ་བོ་ལ་ཡོད་དགོས་དོན་ག་ལ་ཡོད། དེ་བཞིན་དུ་སྣང་ཚུལ་དུ་སེམས་ཅན་ཡིན་པ་དང་དེ་དམྱལ་བར་འགྲོ་བ་སོགས་ཡོད་ཀྱང༌། དེའི་ཚེ་ན་སངས་རྒྱས་ཡིན་ཞེས་སུས་ཀྱང་ཁས་མ་བླངས། གནས་ཚུལ་ལ་སངས་རྒྱས་ཡིན་པས་དེའི་དབང་དུ་བྱས་ཚེ་དམྱལ་བའང་སངས་རྒྱས་ཀྱི་ཞིང་ཁམས་ཡིན་པས་སངས་རྒྱས་དམྱལ་བར་ལྟུང་བའི་སྐྱོན་ག་ལ་ཡོད། རང་ཅག་སོ་སྐྱེ་རྣམས་ཀྱི་མིག་ཤེས་སོགས་ཚད་མར་བྱས་ཏེ་སངས་རྒྱས་ཀྱི་བཀའ་སུན་འབྱིན་པར་བྱེད་ནུས་ན། རང་ཅག་ལ་བདེན་གྲུབ་ཏུ་སྣང་བའི་རིགས་འཕགས་པ་རྣམས་ཀྱིས་བདེན་མེད་རྟོགས་པའི་ཤེས་རབ་ཀྱང་སུན་འབྱིན་ནུས་པར་འགྱུར་རོ།། དེས་ན་དྲི་མ་མེད་པར་གྲགས་པས་ཞུས་པའི་མདོའི་གླེང་གཞི་ལས་གསུངས་པ་བཞིན་དུ་གནས་ཚུལ་ལ་དག་པ་ཡིན་ཡང་རང་ཅག་གིས་སྒྲིབ་པའི་དབང་གིས་མ་དག་པར་མཐོང་བར་ཤེས་པར་བྱ་སྟེ། དེ་ཡང་མདོ་དེ་ཉིད་ལས། རིགས་ཀྱི་བུ། དེ་ལྟ་བས་ན་བྱང་ཆུབ་སེམས་དཔའ་སངས་རྒྱས་ཀྱི་ཞིང་ཡོངས་སུ་དག་པར་བྱེད་འདོད་པས་རང་གི་སེམས་ཡོངས་སུ་སྦྱང་བ་ལ་ནན་ཏན་བྱའོ།། དེ་ཅིའི་ཕྱིར་ཞེ་ན། ཇི་ལྟ་བུར་བྱང་ཆུབ་སེམས་དཔའི་སེམས་ཡོངས་སུ་དག་པ་དེ་འདྲ་བར་སངས་རྒྱས་ཀྱི་ཞིང་ཡོངས་སུ་དག་པར་འགྱུར་རོ།། དེ་ནས་སངས་རྒྱས་ཀྱི་མཐུས་ཚེ་དང་ལྡན་པ་ཤཱ་རིའི་བུ་འདི་སྙམ་དུ་སེམས་ཏེ། གལ་ཏེ་ཇི་ལྟ་བུར་སེམས་ཡོངས་སུ་དག་པ་དེ་འདྲ་བར་བྱང་ཆུབ་སེམས་དཔའི་སངས་རྒྱས་ཀྱི་ཞིང་ཡོངས་སུ་དག་པར་འགྱུར་ན། བཅོམ་ལྡན་འདས་ཤཱཀྱ་ཐུབ་པ་བྱང་ཆུབ་སེམས་དཔའི་སྤྱད་པ་སྤྱོད་པ་ན། དེ་སེམས་ཡོངས་སུ་མ་དག་གམ། ཅི་ནས་སངས་རྒྱས་ཀྱི་ཞིང་འདི་ལྟ་བུར་ཡོངས་སུ་མ་དག་པར་སྣང་སྙམ་མོ།། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུའི་སེམས་ཀྱི་ཡོངས་སུ་རྟོག་པ་ཐུགས་ཀྱིས་མཁྱེན་ནས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་བཀའ་སྩལ་ཏོ།། ཤཱ་རིའི་བུ། འདི་ཇི་སྙམ་དུ་སེམས། ཉི་མ་དང་ཟླ་བ་ཡོངས་སུ་མ་དག་གམ། ཅི་ན་དམུས་ལོང་དག་གིས་མི་མཐོང༌། གསོལ་བ། བཅོམ་ལྡན་འདས། དེ་ལྟར་མ་ལགས་སོ།། དེ་ནི་དམུས་ལོང་གིས་ནོངས་ཀྱི་ཉི་མ་དང༌། ཟླ་བས་ནི་མ་ནོངས་སོ།། བཀའ་སྩལ་བ། ཤཱ་རིའི་བུ། དེ་བཞིན་དུ་སེམས་ཅན་ལ་ལས་དེ་བཞིན་གཤེགས་པའི་སངས་རྒྱས་ཀྱི་ཞིང་གི་ཡོན་ཏན་གྱི་རྒྱན་བཀོད་པ་མི་མཐོང་བ་དེ་ནི་སེམས་ཅན་རྣམས་ཀྱི་མི་ཤེས་པས་ཉེས་ཀྱི་དེ་ལ་དེ་བཞིན་གཤེགས་པས་ཉེས་པ་ནི་མ་ཡིན་ནོ།། ཤཱ་རིའི་བུ། དེ་བཞིན་གཤེགས་པའི་སངས་རྒྱས་ཀྱི་ཞིང་ནི་ཡོངས་སུ་དག་མོད་ཀྱི་ཁྱོད་ཀྱིས་དེ་མི་མཐོང་ངོ༌།། དེ་ནས་ཚངས་པ་རལ་པ་ཅན་གྱིས་གནས་བརྟན་ཤཱ་རིའི་བུ་ལ་འདི་སྐད་ཅེས་སྨྲས་སོ།། བཙུན་པ་ཤཱ་རིའི་བུ། དེ་བཞིན་གཤེགས་པའི་སངས་རྒྱས་ཀྱི་ཞིང་ཡོངས་སུ་མ་དག་གོ་ཞེས་མ་ཟེར་ཅིག བཙུན་པ་ཤཱ་རིའི་བུ། བཅོམ་ལྡན་འདས་ཀྱིས་སངས་རྒྱས་ཀྱི་ཞིང་ཡོངས་སུ་དག་པ་འདི་ལྟ་སྟེ། དཔེར་ན། བཙུན་པ་ཤཱ་རིའི་བུ། གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་གནས་ཀྱི་བཀོད་པ་བཞིན་དུ་བཅོམ་ལྡན་འདས་ཤཱཀྱ་ཐུབ་པའི་སངས་རྒྱས་ཀྱི་ཞིང་བཀོད་པའང་ཁོ་བོས་དེ་འདྲ་བ་མཐོང་ངོ༌།། དེ་ནས་གནས་བརྟན་ཤཱ་རིའི་བུས་ཚངས་པ་རལ་པ་ཅན་ལ་འདི་སྐད་ཅེས་སྨྲས་སོ།། ཚངས་པ། ཁོ་བོས་ནི་ས་ཆེན་པོ་འདི་མཐོ་དམན་དང༌། ཚེར་མ་དང༌། གཡང་ས་དང༌། རིའི་རྩེ་མོ་དང༌། ངམ་གྲོག་དང༌། འཇིམ་ངན་གྱིས་རབ་ཏུ་གང་བར་མཐོང་ངོ༌།། ཚངས་པ་རལ་པ་ཅན་གྱིས་སྨྲས་པ། འདི་ལྟར་སངས་རྒྱས་ཀྱི་ཞིང་འདི་འདྲ་བར་ཡོངས་སུ་མ་དག་པར་མཐོང་བ་ནི། བཙུན་པ་ཤཱ་རིའི་བུ། སེམས་ལ་མཐོ་དམན་ཡོད་ཅིང་སངས་རྒྱས་ཀྱི་ཡེ་ཤེས་ལ་བསམ་པ་ཡོངས་སུ་མ་དག་པར་ངེས་སོ།། གང་དག བཙུན་པ་ཤཱ་རིའི་བུ། སེམས་ཅན་ཐམས་ཅད་ལ་སེམས་མཉམ་ཞིང་སངས་རྒྱས་ཀྱི་ཡེ་ཤེས་ལ་བསམ་པ་ཡོངས་སུ་དག་པ་དེ་དག་གིས་ནི་སངས་རྒྱས་ཀྱི་ཞིང་འདི་ཡོངས་སུ་དག་པ་མཐོང་ངོ༌།། དེ་ནས་བཅོམ་ལྡན་འདས་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ལ་ཞབས་ཀྱིས་མཐེ་བོས་བསྣུན་པ་དང༌། སྣུན་མ་ཐག་ཏུ་འཇིག་རྟེན་གྱི་ཁམས་འདི་རིན་པོ་ཆེ་དུ་མ་བརྩེགས་པ་དང༌། རིན་པོ་ཆེ་བརྒྱ་སྟོང་དུ་མའི་ཚོགས་དག་རིན་པོ་ཆེ་བརྒྱ་སྟོང་དུ་མ་སོ་སོར་བཀོད་པར་གྱུར་བ་འདི་ལྟ་སྟེ། དཔེར་ན། དེ་བཞིན་གཤེགས་པ་རིན་པོ་ཆེ་བཀོད་པའི་འཇིག་རྟེན་གྱི་ཁམས་ཡོན་ཏན་རིན་ཆེན་མཐའ་ཡས་བཀོད་པ་བཞིན་དུ་འཇིག་རྟེན་གྱི་ཁམས་འདིའང་དེ་འདྲའོ།། དེ་ནས་ཐམས་ཅད་དང་ལྡན་པའི་འཁོར་དེའང་ངོ་མཚར་དུ་གྱུར་ཅིང་བདག་ཉིད་ཀྱང་རིན་པོ་ཆེའི་པདྨ་བཀོད་པའི་སྟན་ལ་འདུག་པ་སྙམ་བྱེད་དོ།། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ། ཁྱོད་ཀྱིས་སངས་རྒྱས་ཀྱི་ཞིང་གི་ཡོན་ཏན་བཀོད་པ་འདི་མཐོང་ངམ། གསོལ་བ། བཅོམ་ལྡན་འདས། མཐོང་ལགས་སོ།། སྔོན་མ་མཐོང་མ་ཐོས་པའི་བཀོད་པ་འདི་དག་དགའོ།། བཀའ་སྩལ་བ། ཤྭ་རིའི་བུ། སངས་རྒྱས་ཀྱི་ཞིང་འདི་ནི་རྟག་ཏུ་འདི་འདྲ་མོད་ཀྱི་སེམས་ཅན་དམན་པ་རྣམས་ཡོངས་སུ་སྨིན་པར་བྱ་བའི་ཕྱིར་དེ་བཞིན་གཤེགས་པས་སངས་རྒྱས་ཀྱི་ཞིང་དེ་ལྟ་བུར་ཉེས་པ་མང་པོའི་སྐྱོན་ཆགས་པར་སྟོན་ཏེ། ཤཱ་རིའི་བུ། འདི་ལྟ་སྟེ། དཔེར་ན། ལྷའི་བུ་རྣམས་རིན་པོ་ཆེའི་སྣོད་གཅིག་ཏུ་ཟས་ཟའང་བསོད་ནམས་ཇི་ལྟ་བུ་བསགས་པའི་བྱེ་བྲག་གིས་ལྷའི་ཟས་བདུད་རྩི་ཉེ་བར་གནས་པ་དེ་བཞིན་དུ། ཤཱ་རིའི་བུ། སེམས་ཅན་སངས་རྒྱས་ཀྱི་ཞིང་གཅིག་ཏུ་སྐྱེས་པ་དག་ཀྱང་སེམས་ཅན་ཇི་ལྟར་ཡོངས་སུ་དག་པ་བཞིན་དུ་སངས་རྒྱས་རྣམས་ཀྱི་སངས་རྒྱས་ཀྱི་ཞིང་གི་ཡོན་ཏན་བཀོད་པ་མཐོང་ངོ༌།། ཞེས་གསུངས་སོ།། དེ་ལྟ་ན་གནས་སྣང་མ་ཕྱེས་པའི་རྩོད་པ་འདི་དག་ནི་གནས་སྣང་ལེགས་པར་ཕྱེས་ཏེ་བཤད་ན་རང་ཞིག་ཏུ་འགྲོ་བ་ཤེས་སླ་བས་དོགས་པ་སྤང་མི་དཀའོ།། དེས་མཚོན་ནས་དེ་རིགས་ཀྱི་རྩོད་པ་ཐམས་ཅད་ཀྱི་ལན་ཡང་ཤེས་པར་བྱའོ།།
གཉིས་པ་ནི། ཡང་ཁ་ཅིག་གིས། གཞན་སྟོང་སྨྲ་བ་རྣམས་ཀྱིས་བདེར་གཤེགས་སྙིང་པོ་བདེན་གྲུབ་ཏུ་ཁས་བླངས་བས་དངོས་སྨྲ་བ་ཡིན་སྙམ་པ་དང༌། ཡང་ཁ་ཅིག་གིས། བདག་ཁས་བླངས་པས་མུ་སྟེགས་པའི་ལུགས་ཡིན་སྙམ་དུ་སེམས་སོ།། དེ་ལ་གཞན་སྟོང་དབུ་མ་ཆེན་པོའི་གྲུབ་མཐའ་སྨྲ་བ་རྣམས་ཀྱིས་ཕྱི་རོལ་བ་ལ་གྲགས་པའི་བདག་དང་དངོས་སྨྲ་བའི་འདོད་པའི་བདེན་པར་གྲུབ་པའི་ཆོས་ནི་རྡུལ་ཕྲ་རབ་ཙམ་ཡང་ཁས་མ་བླངས་ལ། ཆོས་དང་གང་ཟག་གི་བདག་མེད་གཉིས་ཀ་ཡོངས་སུ་རྫོགས་པ་ཁས་ལེན་པས་ཕྱི་རོལ་པ་དང་དངོས་སྨྲས་བའི་དྲི་ཙམ་ཡང་མི་བྲོ་བས་གཟུ་བོར་གནས་ལ་ལེགས་པར་བརྟགས་ཏེ་སྨྲ་བར་མཛད་དུ་གསོལ་ལོ།། གལ་ཏེ་དེ་དག་གིས་བདེན་གྲུབ་ཁས་བླངས་ཏེ། ཁོང་ཅག་གི་གཞུང་ན་བདེར་གཤེགས་སྙིང་པོ་བདེན་གྲུབ་ཡིན་པ་དང༌། བདག་ཡོད་པར་དངོས་སུ་གསུངས་བའི་ཕྱིར་ཞེ་ན། བདེན་གྲུབ་དང་བདག་གི་དོན་ཡོད་པའི་ཕྱིར་ཞེའམ་ཚིག་ཡོད་པའི་ཕྱིར་ཟེར། དང་པོ་ལྟར་ན་མ་གྲུབ་སྟེ། བདེན་གྲུབ་དང་བདག་ཅེས་པ་ཆོས་དང་གང་ཟག་གི་བདག་གཉིས་ལས་གཞན་པ་ཞིག་ནི་མི་སྲིད་ལ། དེ་གཉིས་ཆར་ཡང་ཀུན་རྫོབ་ཀྱི་བདེན་པར་བཞག་སྟེ། རང་གི་ངོ་བོ་ཕྲ་བ་ཙམ་ཡང་མ་གྲུབ་པར་རང་སྟོང་དུ་འདོད་པའི་ཕྱིར་རོ།། དེས་ན་འཕགས་པ་ཀླུ་སྒྲུབ་ཀྱི་རིགས་ཚོགས་ཀྱི་རིགས་པའི་དགག་བྱ་ཡོངས་སུ་རྫོགས་པ་འདིར་མ་ཁེགས་པ་ཅུང་ཟད་ཀྱང་མེད་དེ། བདག་གཉིས་ལས་ལྷག་པའི་རིགས་པའི་དགག་བྱ་ཞིག་སུའི་ལུགས་ལའང་ཡོད་མི་སྲིད་ལ། དེ་གཉིས་ནི་འདིར་ཡང་ཕྲ་བ་ནས་བཀག་པའི་ཕྱིར་ཏེ། དོལ་པོ་པ་ཤེས་རབ་རྒྱལ་མཚན་གྱི་དབུ་མ་ངེས་དོན་རྒྱ་མཚོ་ལས། ཆོས་ཉིད་ཟབ་མོ་ལ་ཤིན་ཏུ་མཉམ་པར་གཞག་པའི་སྐབས་སུ་ནི་ཡོད་མེད་ལ་སོགས་པའི་སྤྲོས་པ་ཐམས་ཅད་དོར་ཞིང་སྨྲ་བསམ་བརྗོད་དུ་མེད་པ་ཡིན་ལ། ཞེས་དང༌། ལ་ཟློ་བ་མཉམ་གཞག་ཟབ་མོའི་སྐབས་སུ་ནི་རྟག་མི་རྟག་ལ་སོགས་པ་གང་དུའང་མ་སྤྲོས་པ་དགོས་ཏེ། དབུ་མ་རྩ་ཤེར། རྟག་དང་མི་རྟག་ལ་སོགས་བཞི།། ཞི་བ་འདི་ལ་ག་ལ་ཡོད།། མཐའ་དང་མཐའ་མེད་ལ་སོགས་བཞི།། ཞི་བ་འདི་ལ་ག་ལ་ཡོད།། ཅེས་པ་ལ་སོགས་པ་སྤྲོས་པ་ཐམས་ཅད་དང་བྲལ་བ་དགོས་ཚུལ་གསུངས་ཤིང༌། ཞེས་དང༌། གལ་ཏེ་བདེར་གཤེགས་སྙིང་པོ་དང་བདག་གི་དབྱིངས་རྣམ་གྲངས་ཡིན་ན་མུ་སྟེགས་བྱེད་ཀྱི་བདག་དང་ཁྱད་པར་མེད་པར་འགྱུར་ལ། རྣམ་གྲངས་མ་ཡིན་ན་མིང་དེས་བསྟན་ཡང་མུ་སྟེགས་ཅན་བདག་ཏུ་མངོན་པར་ཞེན་པ་རྣམས་དྲངས་བར་མི་ནུས་སོ་ཞེ་ན། སྐྱོན་མེད་དེ་རྣམ་གྲངས་ཡིན་ཡང་འདི་ནི་བདག་གཉིས་ཀྱིས་སྟོང་བའི་གཞི་དེ་བཞིན་ཉིད་ཀྱི་བདག་དང་དག་པའི་བདག་ལ་སོགས་པ་ཡིན་པའི་ཕྱིར་རོ།། ཞེས་དང༌། དཔལ་གསང་བ་འདུས་པ་ལས་ཀྱང༌། སངས་རྒྱས་སྐལ་མཆོག་དག་པའི་བདག། ཅེས་གསུངས་པ་སོགས་ཀྱི་ལུང་དྲངས་པའི་མཇུག་ཏུ། དེ་དག་ལས་དོན་གཞན་དུ་གྱུར་བའི་བདག་ནི་ཐམས་ཅད་མཁྱེན་པས་མ་གསུངས་ཤིང༌། ཁོ་བོ་ཅག་ཀྱང་མི་འདོད་ལ། མིང་གཞན་ནི་ཤིན་ཏུ་མང་བར་གསུངས་བའི་ཕྱིར། མིང་ཙམ་ལས་འཁྲུལ་བར་མི་བྱ་སྟེ། དོན་ལ་རྟོན་པ་ཉིད་ལས་སོ།། ཞེས་གསུངས་པའི་ཕྱིར་རོ།།
གཉིས་པ་ལྟར་ན་ནི་ཁྱབ་པ་མ་གྲུབ་སྟེ། དེ་ལ་ཁྱབ་པ་ཡོད་ན་མདོ་རྒྱུད་ཀྱི་བཀའ་དང་བསྟན་བཅོས་ཤིན་ཏུ་མང་པོའང་དངོས་སྨྲ་བའམ་མུ་སྟེགས་པར་ཐལ་བ་བཟློག་ཏུ་མེད་པའི་ཕྱིར་རོ།། འཕགས་པ་ཀླུ་སྒྲུབ་དང་མཉམ་མེད་ཇོ་བོ་རིན་པོ་ཆེའང་ཧྭ་ཤང་གི་གྲུབ་མཐའ་འཛིན་པར་འགྱུར་ཏེ། ཀླུའི་སྐྱེ་མེད་རིན་པོ་ཆེའི་མཛོད་ལས། ཅིར་ཡང་མི་རྟོག་སྟོང་པ་སྟེ།། ཡིད་ལ་མི་བྱེད་སྐྱེ་འཆི་མེད།། ཅེས་དང༌། ཇོ་བོའི་དབུ་མའི་མན་ངག་རིན་པོ་ཆེའི་ཟ་མ་ཏོག་ཁ་ཕྱེ་བ་ཞེས་པ་ལས། བར་དེར་ཤེས་པ་ཅི་ཡང་མ་ཡིན་ལ། ཅིར་ཡང་མི་གནས་པ། ཅིར་ཡང་མ་གྲུབ་པ། ཅིའི་རྣམ་པར་ཡང་མ་སྐྱེས་པ། སྤྲོས་པ་མ་ལུས་པ་ཉེ་བར་ཞི་བ་ཞེས་སོགས་དང༌། དབུ་མའི་མན་ངག་བསྡུས་པ་ལས་ཀྱང༌། སྐབས་དེར་ཤེས་པ་ཅིར་ཡང་མི་རྟོག ཅིར་ཡང་མི་འཛིན། དྲན་པ་དང་ཡིད་ལ་བྱེད་པ་ཐམས་ཅད་སྤངས་ཏེ། ཞེས་སོགས་གསུངས་པའི་ཕྱིར་རོ།། ཕྱི་རོལ་མུ་སྟེགས་པ་རྣམས་ཀྱང་ནང་པ་ཡིན་པར་འགྱུར་ཏེ། མཁན་ཆེན་ཞི་བ་འཚོའི་དབུ་མ་རྒྱན་དུ་ཕྱི་རོལ་པའི་གཞུང་དྲངས་པ་འདི་ལྟ་སྟེ། དེ་ཉིད་ལས། བདུད་རྩིའི་ཐིགས་པ་གསང་བ་ལས་བསྟན་པ།། རྣམ་རིག་ཙམ་ནི་རྟག་ཏུ་རྣམ་པར་དག། འདི་ལྟར་སངས་རྒྱས་རྟག་ཏུ་གྲོལ་པ་ཡིན།། བླང་དང་དོར་བ་མེད་ཅེས་རབ་བརྟགས་པ།། ཚངས་པ་མྱ་ངན་མེད་པར་རྟག་གནས་བྱོས།། ཤེའོ།། ཞག་ལྔ་པ་ནས་འབྱུང་བ། མིང་ཙམ་ལས་ནི་རབ་འདས་ཤིང༌།། དངོས་དང་དངོས་མེད་རྣམ་སྤངས་པ།། དབྱུང་དང་བསྡུ་ལས་ངེས་གྲོལ་བ།། དེ་ནི་ནོར་ལྷའི་བུ་ཞེས་བྱ།། དངོས་ལ་དངོས་ཉིད་ཡོད་མ་ཡིན།། དངོས་མེད་ལ་ཡང་དངོས་ཉིད་མིན།། དངོས་དང་དངོས་མེད་རྣམ་གྲོལ་བར།། གང་དེ་ཤེས་དེ་རིག་བྱེད་རིག། ཅེའོ།། ཡང་ཇི་སྐད་དུ། རིག་བྱེད་མཐའ་ལ་ངེས་རྣམས་ཀྱིས།། རྨི་ལམ་སྒྱུ་མ་ཅི་འདྲ་དང༌།། དྲི་ཟའི་གྲོང་ཁྱེར་ཅི་འདྲར་མཐོང༌།། དེ་ལྟར་འཇིག་རྟེན་འདི་དག་མཐོང༌།། འགོག་པ་མེད་ཅིང་སྐྱེ་བ་མེད།། བཅིངས་པ་མེད་ཅིང་སྒྲུབ་པ་མེད།། ཐར་འདོད་མེད་ཅིང་ཐར་བ་མེད།། འདི་ནི་དོན་དམ་ཉིད་ཡིན་ནོ།། ཆགས་དང་འཇིགས་དང་ཁྲོ་བྲལ་བ།། རིག་བྱེད་མཐར་ཕྱིན་ཐུབ་རྣམས་ཀྱིས།། སྤྲོས་པ་ཉེར་ཞི་གཉིས་མེད་པའི།། རྣམ་པར་མི་རྟོག་འདི་མཐོང་ངོ༌།། ཞེས་རྣམ་རིག་ཙམ་དང༌། དངོས་དང་དངོས་མེད་རྣམ་པར་སྤངས་པ་དང༌། སྐྱེ་འགག་དང་བཅིངས་གྲོལ་མེད་པ། སྤྲོས་པ་ཉེ་བར་ཞི་བ། འཇིག་རྟེན་འདི་དག་སྒྱུ་མ་དང་རྨི་ལམ་བཞིན་དུ་མཐོང་བར་སྨྲས་ཏེ། ཚིག་ཙམ་གྱི་དབང་དུ་ན་ནང་པ་ལའང་དེ་ལས་ལྷག་པ་སྨྲ་རྒྱུ་མེད་པའི་ཕྱིར་རོ།།
གསུམ་པ་ནི། གལ་ཏེ་བདེར་གཤེགས་སྙིང་པོའི་ངོ་བོ་སྟོང་ཉིད་ཡིན་པར་འདོད་ན། བདེན་གྲུབ་ཏུ་སྨྲ་མི་རིགས་ཏེ་འཁྲུལ་གཞི་ཡོད་པའི་ཕྱིར་རོ་ཞེ་ན། ལེགས་པར་མ་བརྟགས་པ་འགའ་ཞིག་ལ་འཁྲུལ་བ་སྐྱེད་པར་ཟད་མོད། བདེར་གཤེགས་སྙིང་པོ་བདེན་གྲུབ་ཏུ་གསུང་པ་པོ་ནི་བདེ་བར་གཤེགས་པ་ཉིད་ཡིན་ཏེ། འཕགས་པ་མྱ་ངན་ལས་འདས་པ་ཆེན་པོ་ལས། དེ་ལྟར་སངས་རྒྱས་ཀྱི་རང་བཞིན་དེ་ནི་དངོས་པོ་རྣམ་པ་བདུན་དང་ལྡན་ཏེ། རྟག་པ་དང་བདག་དང་བདེ་བ་དང་ཡོངས་སུ་དག་པ་དང་ཡང་དག་པ་དང་བདེན་པ་དང་དགེ་བ་སྟེ་དེ་ནི་རྣམ་པར་ཕྱེ་ནས་ལན་བཏབ་པ་ཞེས་བྱའོ།། ཞེས་དང༌། ཡང་དག་པར་ན་བདག་མེད་པ་མ་ཡིན་ཏེ། བདག་ཅེས་བྱ་བ་ནི་ཆོས་གང་བདེན་པ། ཡང་དག་པ། རྟག་པ། གནས་པ། བདག་པོར་གྱུར་པ། མི་འགྱུར་བ། མི་འཕོ་བ་དེ་ནི་བདག་ཅེས་བྱ་སྟེ། ཞེས་དང༌། རིགས་ཀྱི་བུ། བདག་ཅེས་བྱ་བ་ནི་དེ་བཞིན་གཤེགས་པའི་སྙིང་པོའི་དོན་ནོ།། ཞེས་བདེར་གཤེགས་སྙིང་པོ་དེ་བདག་ཡིན་པ་དང་དེ་ཡང་བདེན་པར་གྲུབ་པ་ཡིན་པར་ཡང་ཡང་གསུངས་པའི་ཕྱིར་རོ།། དེ་ལྟར་རིག་ཁམས་བདེ་བར་གཤེགས་པའི་སྙིང་པོ་རང་གི་ངོ་བོ་སྤྲོས་པ་ཐམས་ཅད་དང་བྲལ་ན་ཡང་འོད་གསལ་འདུས་མ་བྱས་པའིརང་གདངས་མ་འགགས་པའི་སྣང་ཆ་ཙམ་ལ་བདག་དང་བདེན་གྲུབ་ཅེས་པའི་མིང་བཏགས་ཏེ། སྟོན་པ་བཅོམ་ལྡན་འདས་ཉིད་ཀྱི་ཞལ་སྔ་ནས་ཇི་ལྟར་བཀའ་རྩལ་བ་དེ་ཁོ་ན་རྩལ་ཏུ་བཏོན་ནས་བཤད་པ་ཡིན་པས་འདི་ལ་བརྗོད་ཚུལ་མི་ལེགས་པའི་སྐྱོན་ཅི་ཡང་མེད་དོ།། དེར་མ་ཟད་བཤད་ཚུལ་འདི་ནི་ངེས་པར་དུ་དགོས་པ་ཞིག་སྟེ། གངས་ཅན་གྱི་ལྗོངས་འདིར་འཁོར་ལོ་བར་བ་ཤེར་ཕྱིན་གྱི་དགོངས་པ་རྩལ་ཏུ་བཏོན་ནས་འཆད་པ་མང་ཡང་འཁོར་ལོ་ཐ་མའི་དགོངས་པ་ནི་གྲུབ་མཐའ་སོ་སོའི་ལུགས་ལ་རྒྱུད་བླ་མའི་འགྲེལ་བ་རེ་ཙམ་ལས་ཆེར་མ་དམིགས་པས། ངེས་དོན་སྙིང་པོ་བསྟན་པའི་མདོ་རྣམས་ཀྱི་དགོངས་པ་ཇི་བཞིན་པ་རྩལ་དུ་བཏོན་ནས་རྒྱ་ཆེར་བཤད་པ་ནི་དཔལ་ལྡན་ཇོ་ནང་པ་ཁོ་ནར་སྣང་བས་ལུགས་འདི་ནི་ཁ་བ་རི་པའི་ཐུབ་བསྟན་གསེར་གྱི་ལྷུན་པོ་མཛེས་པར་བྱེད་པའི་ཕྲ་ཚོམ་དུ་ཤེས་པར་བྱའོ།། དེས་ན་ཇོ་ནང་པ་རྣམས་ཀྱིས་བསྡུས་ཚན་གྱི་རིགས་པ་ཙམ་ལ་གཡེངས་ནས་མི་འདུག་པར་ངེས་དོན་སྙིང་པོའི་བསྟན་པ་རིན་པོ་ཆེའི་གསལ་བྱེད་གཞན་སྟོང་དབུ་མ་ཆེན་པོའི་གྲུབ་མཐའ་ཉིད་འཛིན་སྐྱོང་སྤེལ་བ་ལ་འབད་པར་བྱེད་པ་ནི་གལ་ཆེ་བར་སྣང་ངོ༌།། ཚུལ་འདིར་སྔ་འགྱུར་རྙིང་མ་པའི་ལུགས་ལ་ཀུན་མཁྱེན་ཀློང་ཆེན་རབ་འབྱམས་དང༌། རོང་ཟོམ་མ་ཧཱ་པཎྜི་ཏ་དང༌། འཇམ་པའི་དབྱངས་དངོས་མི་ཕམ་རྒྱ་མཚོ་སོགས་ནི་སྟོང་ཕྱོགས་ཁོ་ནའང་རྩལ་འདོན་མི་བྱེད། སྣང་ཕྱོགས་ཁོ་ནའང་རྩལ་འདོན་མི་མཛད་དེ། ངོ་བོ་སྟོང་པ་སྤྲོས་པའི་མཚན་མ་རྡུལ་ཙམ་ཡང་མི་དམིགས་པ་ཁས་ལེན་ཐམས་ཅད་དང་བྲལ་བ་དང༌། རང་མདངས་འགག་པ་མེད་པ་འོད་གསལ་འདུས་མ་བྱས་པ་གཉིས་ཟུང་འཇུག་མཉམ་པ་ཉིད་དུ་གཏན་ལ་འབེབས་པར་མཛད་དོ།། འཆད་ཚུལ་གང་ལྟར་ཡང་མཐར་ཐུག་ནི་དགོངས་པའི་ཞེ་ཕུག་གཅིག་ཏུ་འབབ་སྟེ། རིགས་དང་དཀྱིལ་འཁོར་ཡོངས་ཀྱི་ཁྱབ་བདག་མདོ་སྔགས་གྲུབ་མཐའ་རྒྱ་མཚོའི་ཕ་རོལ་ཏུ་ཕྱིན་པ་དོན་གྱི་སླད་དུ་མཚན་ནས་སྨྲས་ཏེ། ཆོས་ཀྱི་རྗེ་ངག་དབང་བློ་གྲོས་མཚུངས་མེད་དཔལ་བཟང་པོ་གང་གི་ཞལ་སྔ་ནས་ཀྱིས། བདེར་གཤེགས་སྙིང་པོ་ཡི་བཞུགས་ཚུལ་མཐར་ཐུག། ཚད་མ་རྣམ་གཉིས་ཀྱིས་འཇལ་ཚུལ་ཤེས་ན།། སྟོང་དང་བདེན་གྲུབ་སོགས་གང་སྨྲས་ཆོག་གིས།། ས་དགེ་ཇོ་ནང་རྣམས་ཐུགས་མཐུན་མཛོད་ཅིག། ཅེས་གསུངས་པ་ལྟར་དུ་ཤེས་པར་བྱའོ།།
ཞེས་པ་འདིའང་རིས་སུ་མ་ཆད་པའི་བསྟན་པ་རིན་པོ་ཆེ་ལ་དག་པའི་སྣང་བ་ཕྲན་ཙམ་ཐོབ་ཀྱང་ཆོས་དང་རང་རྒྱུད་ཅུང་ཟད་ཀྱང་མ་འདྲེས་པ་ཚུལ་ཁྲིམས་བློ་གྲོས་སུ་འབོད་པས་རབ་རྒྱན་ཆུ་ལུག་ལོའི་སྟོན་ཟླ་འབྲིང་པོའི་ཚེས་བཅོ་ལྔའི་ཉིན་གྲོང་ཁྱེར་པདྨ་ཅན་དུ་བྲིས་པ་དགེ་ལེགས་སུ་གྱུར་ཅིག །