བླ་རྣམ་བྱིན་རླབས་ཆར་འབེབས།

སྦྱོར་དྲུག་བླ་མའི་རྣལ་འབྱོར་བྱིན་རླབས་ཆར་འབེབས་ ཞེས་བྱ་བ། ཀུན་མཁྱེན་རྟོན་པ་བཞི་ལྡན ན་མཿཤྲིའ་ཀཱ་ལ་ཙཀྲ་ཡ། །བླ་མ་ཡི་དམ་དཀོན་མཆོག་གསུམ་ལ། །བདག་ཡིད་དངས་བས་སྐྱབས་སུ་མཆིའོ། །སེམས་ཅན་རྣམས་ལ་བྱམས་དང་སྙིང་རྗེ། །དགའ་དང་བཏང་སྙོམས་སྐྱེ་བར་གྱུར་ཅིག །སེམས་ཅན་དོན་དུ་ཟབ་ལམ་བླ་མའི། །རྣལ་འབྱོར་ཉིད་ལ་བརྩོན་པར་བགྱིའོ། །མ་དག་སྣོད་བཅུད་འཇིག་རྟེན་ཐམས་ཅད། །ཅིར་ཡང་མི་དམིགས་སྟོང་བར་གྱུར་ཅིག །རང་གི་སྤྱི་བོར་རིན་ཆེན་ཁྲི་སྟེང༌། །པད་ཟླ་ལ་སོགས་གདན་ལྔའི་སྟེང་དུ། །རྩ་བའི་བླ་མ་རྡོ་རྗེ་འཆང་ཆེན། །སྐུ་མདོག་སྔོན་པོ་ཞལ་གཅིག་ཕྱག་གཉིས། །ཞབས་གཉིས་རྡོ་རྗེ་སྐྱིལ་ཀྲུང་གིས་བཞུགས། །སྣ་ཚོགས་དར་གྱི་ན་བཟའ་ལྷུབ་མཛེས། །རིན་ཆེན་རུས་རྒྱན་འགྱིང་བག་དང་ལྡན། །རྡོ་རྗེ་དྲིལ་བུ་ཐུགས་ཀར་བསྣོལ་ཞིང༌།། སྐུ་ཡི་གནས་བཞིར་ཡི་གེ་བཞིས་མཚན། །ཐུགས་ཀའི་ཧཱུཾ་ལས་འོད་ཟེར་འཕྲོས་པས། །རྩ་བརྒྱུད་བླ་མ་སྐྱབས་གནས་ཐམས་ཅད། །ཛཿཧཱུཾ་བཾ་ཧོཿགཉིས་མེད་ཐིམ་གྱུར། །མི་འགྱུར་ཡིད་འོང་མཚན་དཔེས་ལེགས་སྤྲས།། འགགས་མེད་ཚངས་དབྱངས་ཕྱོགས་བཅུར་སྒྲོག་མཛད། །འཁྲུལ་མེད་ཕྱག་རྒྱ་ཆེ་ལ་གནས་པ། །བླ་མའི་སྐུ་གསུང་ཐུགས་ལ་ཕྱག་འཚལ། །སོར་སྡུད་ལ་སོགས་སྦྱོང་བྱེད་དྲུག་གིས། །ཕུང་པོ་ལ་སོགས་སྦྱང་བྱ་དྲུག་དྲུག། ལེགས་པར་སྦྱངས་བའི་བདེ་གཤེགས་སོ་དྲུག །གཅིག་ཏུ་བསྡུད་པའི་སྐུ་ལ་ཕྱག་འཚལ། །ལུས་ངག་ཡིད་གསུམ་དུས་གསུམ་དགེ་ཚོགས། །མཆོད་པའི་སྤྲིན་ཕུང་དཔག་ཏུ་མེད་པ། །ཀུན་ཏུ་བཟང་པོའི་རྣམ་འཕྲུལ་ཇི་བཞིན།། བདག་ཡིད་དངས་བས་མཆོད་པ་འབུལ་ལོ། །ལུས་ངག་ཡིད་ཀྱི་སྒོ་ནས་བསགས་པའི། །སྡིག་པའི་ཚོགས་ཀུན་མཐོལ་ལོ་བཤགས་སོ། །དགེ་ལ་ཡི་རང་ཆོས་འཁོར་བསྐོར་མཛད། །རྟག་ཏུ་བཞུགས་པར་གསོལ་བ་འདེབས་སོ། །ཚོགས་གསུམ་མཐར་ཕྱིན་བཅུ་གཉིས་ལམ་བགྲོད། །རྡོ་རྗེ་འཛིན་པ་ཀུན་གྱི་གཙོ་བོ། །སྐུ་བཞིའི་བདག་ཉིད་དཔལ་ལྡན་བླ་མར།། གསོལ་བ་འདེབས་སོ་བྱིན་གྱིས་རློབས་ཤིག །གཉིས་མེད་ཡེ་ཤེས་རྩེ་གཅིག་བསྒོམས་པས། །གཉིས་སྣང་ཚོགས་བརྒྱད་གནས་འགྱུར་ཐོབ་པ། །ཡེ་ཤེས་ལྔ་ལྡན་དཔལ་ལྡན་བླ་མར། །གསོལ་བ་འདེབས་སོ་བྱིན་གྱིས་རློབས་ཤིག །བསྐྱེད་རྫོགས་མཐར་ཕྱིན་བཅུ་གཉིས་དབང་གིས། །སྐལ་ལྡན་གདུལ་བྱ་སྨིན་གྲོལ་མཛད་པའི། །བླ་མ་ཀུན་འདུས་དཔལ་ལྡན་བླ་མར།། གསོལ་བ་འདེབས་སོ་བྱིན་གྱིས་རློབས་ཤིག །ཁྱེད་ཕུང་རིགས་དྲུག་སྐྱེ་མཆེད་སྲས་བརྒྱད། །ཕྱག་ཞབས་ལ་སོགས་ཁྲོ་བའི་ཚོགས་ཀུན། །ཡི་དམ་ཀུན་འདུས་དཔལ་ལྡན་བླ་མར། །གསོལ་བ་འདེབས་སོ་བྱིན་གྱིས་རློབས་ཤིག །དོན་གཉིས་མཐར་ཕྱིན་ཆོས་སྐུའི་ངོ་བོ། །སྣ་ཚོགས་སྤྲུལ་བས་འགྲོ་བའི་དོན་མཛད། །སངས་རྒྱས་ཀུན་འདུས་དཔལ་ལྡན་བླ་མར།། གསོལ་བ་འདེབས་སོ་བྱིན་གྱིས་རློབས་ཤིག །དོམ་དམ་བརྗོད་བྲལ་རྣམ་བྱང་བདེན་པའི། །གསུང་རབ་གླེགས་བམ་རྣམ་པར་སྟོན་མཛད། །དམ་ཆོས་ཀུན་འདུས་དཔལ་ལྡན་བླ་མར། །གསོལ་བ་འདེབས་སོ་བྱིན་གྱིས་རློབས་ཤིག །རིགས་གྲོལ་གཉིས་ལྡན་ས་བཅུའི་མངའ་བདག །འགྲོ་བའི་མགོན་སྐྱབས་བཤེས་གཉེན་དམ་པ། །དགེ་འདུན་ཀུན་འདུས་དཔལ་ལྡན་བླ་མར། །གསོལ་བ་འདེབས་སོ་བྱིན་གྱིས་རློབས་ཤིག །དམིགས་མེད་སྙིང་རྗེའི་བདེ་ཆེན་ངོ་བོ། །ཐབས་ཀྱི་སྒོ་ནས་དགྲ་བགེགས་འཇོམས་མཛད། །ཆོས་སྐྱོང་ཀུན་འདུས་དཔལ་ལྡན་བླ་མར། །གསོལ་བ་འདེབས་སོ་བྱིན་གྱིས་རློབས་ཤིག །ཞི་རྒྱས་དབང་དྲག་ལས་ལ་མངའ་བརྙེས།། མཆོག་དང་ཐུན་མོང་དངོས་གྲུབ་སྩོལ་མཛད། །དངོས་གྲུབ་འབྱུང་གནས་དཔལ་ལྡན་བླ་མར། །གསོལ་བ་འདེབས་སོ་བྱིན་གྱིས་རློབས་ཤིག །མདོ་རྒྱུད་མན་ངག་བསྟན་བཅོས་ཀུན་ལ། །འཆད་རྩོད་རྩོམ་གྱིས་ལོག་རྟོགས་སེལ་མཛད། །མ་རིག་མུན་སེལ་དཔལ་ལྡན་བླ་མར། །གསོལ་བ་འདེབས་སོ་བྱིན་གྱིས་རློབས་ཤིག །དེང་ནས་བདག་ནི་བླ་མ་ཁྱེད་དང༌། །ལུས་དང་གྲིབ་མ་ལྟ་བུར་འགྲོགས་སྟེ། །ཟབ་དོན་མན་ངག་བདུད་རྩི་འཐུང་བར། །དཔལ་ལྡན་བླ་མའི་བྱིན་གྱིས་རློབས་ཤིག །མ་དག་ལོག་པའི་འཚོ་བ་སྤངས་ནས། །བདུད་རྩི་ལྕེ་སྦྱོར་ཉམས་སུ་བླངས་ཏེ། །ཟས་གོས་སོགས་ལ་ལྟོས་པ་མེད་པར། །དཔལ་ལྡན་བླ་མའི་བྱིན་གྱིས་རློབས་ཤིག། དབེན་པའི་གནས་སུ་ཟབ་མོའི་དོན་ལ། །རྩེ་གཅིག་བསམ་གཏན་སྒྲུབ་པ་བྱས་ནས། །ཚེ་འདི་ཉིད་ལ་ཕྱག་ཆེན་ཐོབ་པར། །དཔལ་ལྡན་བླ་མའི་བྱིན་གྱིས་རློབས་ཤིག ། བླ་མའི་གནས་ཀྱི་ཡི་གེ་བཞི་བོ། །སངས་རྒྱས་ཀུན་གྱི་སྐུ་བཞིར་མོས་ཤིང༌། །དེ་ལ་དམིགས་ཏེ་དབང་བཞི་ལེན་པར། །དཔལ་ལྡན་བླ་མའི་བྱིན་གྱིས་རློབས་ཤིག །དཔྲལ་བའི་ཨོཾ་ལས་ཨོཾ་ཡིག་དཀར་པོ། །རང་གི་ལུས་ཀྱི་དཔྲལ་བར་ཞུགས་ཤིང༌། །དེ་ལ་བརྟེན་ནས་བུམ་དབང་ཐོབ་པར། །དཔལ་ལྡན་བླ་མའི་བྱིན་གྱིས་རློབས་ཤིག །ལུས་དང་སད་པའི་སྒྲིབ་པ་དག་ནས། །དགའ་བའི་དགའ་བཞི་ཉམས་སུ་མྱོང་བས། །སྐུ་ཡི་རྡོ་རྗེ་སྤྲུལ་སྐུ་ཐོབ་པར། །དཔལ་ལྡན་བླ་མའི་བྱིན་གྱིས་རློབས་ཤིག །མགྲིན་པའི་ཨཱཿལས་ཨཱཿཡིག་དམར་པོ། །རང་གི་ལུས་ཀྱི་མགྲིན་པར་ཞུགས་ཤིང༌། །དེ་ལ་བརྟེན་ནས་གསང་དབང་ཐོབ་པར། །དཔལ་ལྡན་བླ་མའི་བྱིན་གྱིས་རློབས་ཤིག །ངག་དང་རྨི་ལམ་སྒྲིབ་པ་དག་ནས། །མཆོག་གི་དགའ་བཞི་ཉམས་སུ་མྱོང་བས། །གསུང་གི་རྡོ་རྗེ་ལོངས་སྐུ་ཐོབ་པར། །དཔལ་ལྡན་བླ་མའི་བྱིན་གྱིས་རློབས་ཤིག། ཐུགས་ཀའི་ཧཱུཾ་ལས་ཧཱུཾ་ཡིག་ནག་པོ། །རང་གི་ལུས་ཀྱི་སྙིང་ཁར་ཞུགས་ཤིང༌། །དེ་ལ་བརྟེན་ནས་ཤེར་དབང་ཐོབ་པར། །དཔལ་ལྡན་བླ་མའི་བྱིན་གྱིས་རློབས་ཤིག །ཡིད་དང་གཉིད་འཐུགས་སྒྲིབ་པ་དག་ནས། །ཁྱད་པར་དགའ་བཞི་ཉམས་སུ་མྱོང་བས། །ཐུགས་ཀྱི་རྡོ་རྗེ་ཆོས་སྐུ་ཐོབ་པ། དཔལ་ལྡན་བླ་མའི་བྱིན་གྱིས་རློབས་ཤིག །ལྟེ་བའི་ཧོཿལས་ཧོཿཡིག་སེར་པོ། །རང་གི་ལུས་ཀྱི་ལྟེ་བར་ཞུགས་ཤིང༌། །དེ་ལ་བརྟེན་ནས་བཞི་དབང་ཐོབ་པར། །དཔལ་ལྡན་བླ་མའི་བྱིན་གྱིས་རློབས་ཤིག །ཆགས་པའི་བག་ཆགས་དྲི་མ་དག་ནས། །ལྷན་སྐྱེས་དགའ་བཞི་ཉམས་སུ་མྱོང་བས།། ཡེ་ཤེས་རྡོ་རྗེ་བདེ་སྟོང་ཐོབ་པར། །དཔལ་ལྡན་བླ་མའི་བྱིན་གྱིས་རློབས་ཤིག ། སྤྱི་བོའི་བླ་མ་འོད་དུ་ཞུ་ནས། །རང་གི་ལུས་ལ་གཉིས་མེད་ཐིམ་ཞིང༌། །སྙིང་གའི་པདྨ་འདབ་བརྒྱད་དབུས་སུ། །བརྟན་པར་བཞུགས་ནས་བྱིན་གྱིས་རློབས་ཤིག །དེ་ལྟར་བསྒོམས་པས་བདག་སོགས་སེམས་ཅན། །རང་རྒྱུད་ཁམས་ཀྱི་དྲི་མ་དག་ནས། །བདེ་གཤེགས་སྙིང་པོ་མྱུར་དུ་ཐོབ་པར། །དཔལ་ལྡན་བླ་མའི་བྱིན་གྱིས་རློབས་ཤིག །ཅེས་སྦྱོར་བ་ཡན་ལག་དྲུག་གི་བླ་མའི་རྣལ་འབྱོར་བྱིན་རླབས་ཆར་འབེབས་ཞེས་བྱ་བ་འདི་ནི་ཆོས་རྗེ་ཀུན་མཁྱེན་རྟོན་པ་བཞི་ལྡན་ཤེས་རབ་རྒྱལ་མཚན་དཔལ་བཟང་པོས་སྦྱར་བའོ། །དགེའོ།། དཔལ་ལྡན་བླ་མའི་རྣམ་པར་ཐར་བ་ལ། །སྐད་ཅིག་ཙམ་ཡང་ལོག་ལྟ་མི་སྐྱེ་ཞིང༌། །ཅི་མཛད་ལེགས་པར་མཐོང་ནས་མོས་གུས་ཀྱིས། །བླ་མའི་བྱིན་རླབས་སེམས་ལ་འཇུག་པར་ཤོག །སྐྱེ་བ་ཀུན་ཏུ་ཡང་དག༌སོགས་བརྗོད། བཀྲ་ཤིས། སརྦམངྒལཾ།།