དཔལ་འཁོར་ལོ་སྡོམ་པའི་རྩ་རྒྱུད།
ཤཱཀྱ་ཐུབ་པ།
རྒྱ་གར་སྐད་དུ། ཤྲཱི་ཧེ་རུ་ཀ་རཱ་ཛཾ་ཙཀྲ་སཾ་པ་ར་བྷི་དྷ་ན་ཡོ་གི་ནི་རུད་ཏ་ར་སརྦ་ཏན་ཏྲོད་ཏ་ར་སཾ་བ་ར་སཾ་གྲ་ཧ་ནཱ་མ། བོད་སྐད་དུ། དཔལ་ཁྲག་འཐུང་གི་རྒྱལ་བོ་འཁོར་ལོ་སྡོམ་པར་བརྗོད་པ་རྣལ་འབྱོར་མ་བླ་ན་མེད་པ་རྒྱུད་ཐམས་ཅད་ཀྱི་བླ་མ་བདེ་མཆོག་བསྡུས་པ་ཞེས་བྱ་བ། བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ།།
དེ་ནས་དེ་ལས་གསང་ཆེན་བཤད་པར་བྱ། མདོར་བསྡུས་པ་སྟེ་རྒྱས་པ་མིན།། ཤྲཱི་ཧེ་རུ་ཀར་ཡང་དག་སྦྱོར།། འདོད་པའི་དོན་ཀུན་སྒྲུབ་བྱེད་པ།། བླ་མ་ལས་ཀྱང་བླ་མ་སྟེ།། མཁའ་འགྲོ་མ་ཡི་དྲ་བའི་སྡོམ།། གསང་བ་མཆོག་གིས་དགྱེས་པ་ན།། ཐམས་ཅད་བདག་ཉིད་རྟག་ཏུ་བཞུགས།། མཁའ་འགྲོ་ཀུན་དངོས་སེམས་དཔའ་ནི།། རྡོ་རྗེ་སེམས་དཔའ་བདེ་བའི་མཆོག། འདི་ནི་རང་བྱུང་བཅོམ་ལྡན་དཔའ།། མཁའ་འགྲོ་དྲ་བའི་སྡོམ་པ་ཡིན།། འབྱུང་བ་སྒྲ་ཚུལ་ལས་བྱུང་རྣམས།། དམ་ཚིག་སྤྱོད་པའི་སྤྱོད་ཡུལ་ཡིན།། ཐོག་མ་དབུས་མཐར་ཡང་དག་གནས།། འཇིག་རྟེན་གསུམ་དུ་རྙེད་དཀའ་བ།། བསྲུབ་བྱ་སྲུབ་བྱེད་ཡང་དག་སྦྱོར།། ཇི་ལྟ་བ་ནི་དེ་བཞིན་ཏེ།། སྔགས་བཟླས་བསམ་གཏན་ལ་སོགས་ལྡན།། སྦྱོར་ཉིད་ཆོ་གའི་ཡེ་ཤེས་ནི།། རྣམ་འབྱོར་བླ་ན་མེད་པ་ཡི།། རྒྱུད་ནི་བཤད་ཀྱིས་མཉན་པར་གྱིས།། དབུགས་འབྱིན་པར་མ་མཆོག་དག་དང༌།། དྲི་ཡི་ཆུ་དང་བཅས་པས་ཀྱང༌།། རྣལ་འབྱོར་དུས་ཀྱི་ཁྱད་པར་གྱིས།། རིགས་ལྡན་རྟག་ཏུ་མཆོད་པར་བྱ།། ཕོ་ཉ་ལྷན་ཅིག་སྐྱེས་གྲུབ་པ།། མཆོག་དང་འབྲིང་དང་ཐ་མ་སྟེ།། ཡིད་ནི་ནང་དུ་ཆུད་པ་ཡིས།། འདོད་པ་ཡི་ནི་དངོས་གྲུབ་བྱ།། རང་རྫས་ཐིག་ལེ་སངས་རྒྱས་དང༌།། བྱང་ཆུབ་སེམས་དཔའ་མཆོད་པར་བྱ།། མཐོང་བ་དང་ནི་རེག་པ་དང༌།། ཐོས་པ་དང་ནི་དྲན་པ་ཡིས།། སྡིག་པ་ཀུན་ལས་གྲོལ་འགྱུར་བ།། དེ་ལྟ་ཉིད་དུ་ཐེ་ཚོམ་མེད།། རྣལ་འབྱོར་པ་ཉིད་བསོད་ནམས་མཆོག། དག་བྱེད་སྡིག་པ་འཇིག་བྱེད་པ།། གསང་སྔགས་ཟློས་པའི་བཟླས་བརྗོད་དང༌།། བསམ་གཏན་གྱིས་ཀྱང་འགྲུབ་པར་འགྱུར།། ཤིན་ཏུ་མཉམ་བཞག་སྒྲུབ་པ་པོས།། དམ་ཚིག་རྟག་ཏུ་བསྐྱང་བར་བྱ།། དམ་ཚིག་ཉམས་པའི་དཀྱིལ་འཁོར་དུ།། དབང་བསྐུར་དངོས་གྲུབ་ཐོབ་མི་འགྱུར།། སྦྲང་རྩི་མཚལ་དང་ག་བུར་བཅས།། ཙན་དན་དམར་པོ་དང་སྦྱར་བ།། ཚོགས་ཀྱི་ནང་དུ་གཞག་པ་ནི།། རྡོ་རྗེ་ཀུན་མཚན་མཚན་མ་འཛིན།། སྦོམ་པོ་མཐའ་ལྟག་རྩེ་སྦྱར་བས།། རྣལ་འབྱོར་རིག་པས་རྟག་ཏུ་སྤྱད།། ཞི་བའི་བཏུང་བ་བཞིན་མྱངས་ན།། དངོས་གྲུབ་རྟག་པ་ཐོབ་པར་འགྱུར།། འདི་ནི་མི་འཆི་བཅུ་ཕྱེད་འགྱུར།། དངོས་གྲུབ་ཐམས་ཅད་འཇིག་བྱེད་ཡིན།། མཆོད་བཞི་དཔའ་བོ་ཆེན་པོ་ནི།། ཡིད་ལ་འདོད་པ་བྱེད་པ་སྟེ།། དབང་གཉིས་སྙོམས་པར་འཇུག་པ་ཡི།། སྙོམས་པར་ཞུགས་པའང་དེ་ཉིད་འཛིན།། ལྷ་དང་མི་ཡི་བདེ་བ་ནི།། བསྡུས་བྱས་རྡོ་རྗེ་འཛིན་པ་ཡིས།། དེ་ལྟ་བུར་ནི་བྱེད་པ་ཡི།། བཅུ་དྲུག་ཆར་ཡང་མི་ཕོད་དོ།། རི་བོ་ཚང་ཚིང་སྨན་ལྗོངས་སམ།། ཆུ་བོའི་ཆེན་པོའི་ངོགས་དག་དང༌།། གདོད་ནས་གྲུབ་པའི་དུར་ཁྲོད་དུ།། དེར་ནི་དཀྱིལ་འཁོར་བྲི་བར་བྱ།། དཔལ་ཧེ་རུ་ཀར་བརྗོད་པ་ལས། དཀྱིལ་འཁོར་ལ་འཇུག་པའི་ལེའུ་སྟེ་དང་པོའོ།། །།དེ་ནས་གཞན་ཡང་བཤད་པར་བྱ།། མན་ངག་ཤིན་ཏུ་རྙེད་དཀའ་སྟེ།། དཔའ་བོའི་བརྡ་ཡི་སྐད་དུ་ནི།། ང་ཡིས་རྒྱུད་དུ་སྦས་པ་ཡིན།། གོས་དང་ཕྱག་རྒྱ་ལྔ་ལ་སོགས།། ཤེས་རབ་ཡན་ལག་ཕུར་བུ་གུར།། ཨཱ་ལི་ཀཱ་ལི་ཞེས་བརྗོད་ནས།། རྒྱུ་སོགས་སྟོང་པ་སྔོན་འགྲོ་བ།། འཇུག་པ་སྒྲ་ལ་སོགས་པ་ནས།། ཇི་སྲིད་བསྡུས་པའི་སྦྱོར་ལྡན་པ།། བདུད་རྩིས་ཚིམ་བྱེད་མྱ་ངན་འདས།། ལག་པའི་མཆོད་པ་དབང་བསྐུར་བ།། གོ་ཆ་ཆེན་པོས་ཡང་དག་བསྲུང༌།། སྔགས་རྣམས་ཀུན་གྱིས་མཆོད་པར་བྱ།། དེ་ལྟར་དེ་ཉིད་བཅུ་བཞི་ནི།། མདོར་བསྡུས་ནས་ནི་བཤད་པ་ཡིན།། མི་མཆོག་གང་ཞིག་ཀུན་སྤྱོད་པ།། སྡིག་པ་ཐམས་ཅད་རྣམ་དག་བདག། དེ་བཞིན་གཤེགས་པའི་ས་ཐོབ་ཀྱང༌།། སྐྱེ་དང་སྐྱེ་བར་བདེ་གཤེགས་ཀྱི།། རིགས་སྐྱེ་ཆོས་ལྡན་རྒྱལ་པོར་འགྱུར།། ཇི་ལྟར་སྔོན་བསགས་སྡིག་པ་ཡི།། མཚན་ཉིད་ཐམས་ཅད་དམན་པ་སྟེ།། གང་ཞིག་འདི་ནི་རྟག་བསྒོམ་པ།། ས་ལ་འདོད་པ་ཀུན་དབང་ཕྱུག། དཔེར་ན་མར་གྱིས་གང་བའི་སྣོད།། མེ་ཡི་དབུས་སུ་བཞག་ན་ནི།། མར་སར་སྟེང་དུ་ཞུ་འགྱུར་ཞིང༌།། སྣོད་ཀྱི་དྲི་མ་འཇིག་པར་འགྱུར།། དེ་བཞིན་ཤྲཱི་ཧེ་རུ་ཀ་ཡི།། མཚན་གྱིས་སྡིག་པ་འཇིག་པར་འགྱུར།། བསམ་གཏན་བསམ་པ་ཙམ་གྱིས་སམ།། ཀློག་ཅིང་ཁ་ཏོན་བྲིས་པ་ཡིས།། མཐོ་རིས་ལོངས་སྤྱོད་ཐོབ་འགྱུར་པའམ།། ཡང་ན་འཁོར་ལོས་སྒྱུར་བ་འཐོབ།། རྣལ་འབྱོར་བ་རྣམས་འཕོ་ཚེ་དཔལ།། ཁྲག་འཐུང་སོགས་དཔའ་རྣལ་འབྱོར་མ།། མེ་ཏོག་སྣ་ཚོགས་ལག་ན་ཐོགས།། རྒྱལ་མཚན་བ་དན་སྣ་ཚོགས་དང༌།། རོལ་མོའི་སྒྲ་ནི་སྣ་ཚོགས་དང༌།། གླུ་ཡི་མཆོད་པ་སྣ་ཚོགས་ཀྱིས།། མཁའ་སྤྱོད་གནས་སུ་འཁྲིད་པར་བྱེད།། འཆི་བ་ཞེས་འདི་རྣམ་རྟོག་ཡིན།། དེ་འདྲའི་དཔའ་ཆེན་རྣལ་འབྱོར་མ།། ས་སྟེང་ན་ནི་རྙེད་པར་དཀའ།། དཔལ་ལྡན་ཧེ་རུ་ཀའི་རྒྱུད་ཆེན།། གང་གིས་ཤེས་ནས་མ་དད་པ།། དབུལ་བོ་སྡུག་བསྔལ་གྱིས་གདུངས་པར།། དེ་ལ་རྟག་ཏུ་འབྱུང་བར་འགྱུར།། མགུལ་རྒྱན་གདུ་བུ་དཔུང་རྒྱན་དང༌།། རྣ་རྒྱན་ཚངས་པའི་སྐུད་པ་དང༌།། དོ་ཤལ་མགོ་ཡི་ཕྲེང་བ་དང༌།། སྐ་རགས་སིལ་སིལ་སྒྲ་སྒྲོག་པར།། རི་སྟེང་སྣ་ཚོགས་པདྨ་ཡི།། ལྟེ་བར་ཨཱ་ལི་ཀཱ་ལི་སྐྱེས།། དཀར་མོ་བདག་པོ་རྣམ་གནོན་ཅིང༌།། རྡོ་རྗེ་དྲིལ་བུས་སྐུ་ལ་འཁྱུད།། ཉི་ཤུ་རྩ་བཞིའི་ཕྱེད་ལྡན་པའི།། དཔའ་བོ་རྣལ་འབྱོར་མ་ཚོགས་དང༌།། ཤྲཱི་ཧེ་རུ་ཀ་རྒྱལ་ཆེན་པོའི།། གོ་འཕང་མཆོག་ནི་བསྒོམ་པར་བྱ།། དཔའ་བོ་ཀུན་དང་རྣལ་འབྱོར་མའི།། འཁོར་བཅས་དབུས་སུ་སྦྱོར་ལྡན་པ།། ཐམས་ཅད་དགྱེས་ཤིང་གཉིས་མེད་གྱུར།། འབྱིན་དང་སྡུད་པར་མཛད་པ་ཡིན།། མོས་པ་དུ་མའི་སེམས་ཅན་ལ།། སྤྱོད་པ་སྣ་ཚོགས་སྟོན་མཛད་དེ།། སྣ་ཚོགས་ཚུལ་གྱིས་གདུལ་བྱ་བ།། ཐབས་ནི་སྣ་ཚོགས་སྟོན་པ་ཡིན།། ཟབ་མོའི་ཆོས་ནི་སྟོན་པ་ལ།། གལ་ཏེ་མོས་པར་མ་གྱུར་ཀྱང༌།། སྨོད་པ་དག་ཏུ་མི་བྱ་སྟེ།། ཆོས་ཉིད་བསམ་མི་ཁྱབ་དྲན་བྱ།། གང་གིས་འདིར་བདག་ཡུལ་མིན་པ།། བདག་གིས་ཆོས་ཉིད་མི་ཤེས་ཡིན།། རྫོགས་སངས་རྒྱས་དང་དེ་སྲས་ནི།། བདག་ཉིད་ཆེན་པོ་རྣམས་ཀྱིས་མཁྱེན།། སངས་རྒྱས་རྣམས་ནི་བྱུང་གྱུར་ཏམ།། མ་བྱུང་ན་ཡང་རྣམ་ཀུན་ཏུ།། བསམ་མི་ཁྱབ་པའི་ཆོས་ཉིད་ནི།། འཕེལ་ཕྲི་སྤངས་པས་གནས་པ་ཡིན།། དེ་ལྟར་རྣམ་པར་བཞག་བྱས་ཀྱང༌།། འཇིག་རྟེན་པ་ཀུན་ཡོང་མི་སྨད།། དེ་ཡི་བགྲོད་པ་བསམ་ཡས་ཤིང༌།། སངས་རྒྱས་རོལ་བ་བསམ་མི་ཁྱབ།། མདོ་སྡེ་བྱ་བ་སྤྱོད་པ་དང༌།། རྣལ་འབྱོར་གསང་མཐའི་དབྱེ་བ་ཉིད།། སེམས་ཅན་མོས་པས་འཇུག་པ་རྣམས།། དེ་དང་དེ་ལ་དགའ་བ་བཞིན།། དཔལ་ཧེ་རུ་ཀ་ཞེས་བརྗོད་པ་རྒྱུད་ཀྱི་རྒྱལ་པོ་འབུམ་པའི་ནང་ན་གནས་པ་རྒྱུད་ཐམས་ཅད་ཀྱི་བླ་མ་དཔལ་ཧེ་རུ་ཀ་དཔའ་བོ་ཆེན་པོ་ཀླགས་པས་གྲུབ་པ། ཐམས་ཅད་དུ་གཞན་གྱིས་མི་ཐུབ་པ། གདོད་ནས་གྲུབ་པའི་ཕྱི་མ། དཔལ་ཧེ་རུ་ཀ་དཔལ་འཁོར་ལོ་སྡོམ་པ་ཞེས་བྱ་བ། རྣལ་འབྱོར་མ་ཆེན་མོའི་རྒྱུད་ཀྱི་རྒྱལ་པོ་ལས། ལེའུ་ལྔ་བཅུ་རྩ་གཅིག་པ་རྫོགས་སོ།། །
།སྲིད་པ་གསུམ་འབར་སྐུ་ནི་རྗེས་ཆགས་དུལ་བར་ལྡན།། འོད་ཟེར་སྔོན་པོ་སྟོང་ལྡན་ཉི་མ་བརྒྱ་སྟོང་ལྡན།། རྣམ་མང་སྐུ་དང་ཆ་ལུགས་རྗེས་ཆགས་སེམས་དཔར་ལྡན།། ཧེ་རུ་ཀ་དཔལ་དེ་དང་ལྷན་ཅིག་གར་བྱེད་ཤོག། ལྷ་མོ་ཚད་མ་དམ་ཚིག་ཚད་མ་དང༌།། དེ་བརྗོད་གསུང་ཡང་མཆོག་ཏུ་ཚད་མ་སྟེ།། བདེན་པ་འདི་དག་གིས་ནི་ལྷ་མོ་རྣམས།། བདག་ཅག་རྗེས་སུ་འཛིན་པའི་རྒྱུར་གྱུར་ཅིག། །། དགེའོ།། དགེའོ།། དགེའོ།།
དེ་ནས་དོན་ཀུན་འདོད་པ་ཡི།། སྦས་པ་བརྒྱད་མཐར་སྦྱར་བྱས་ཏེ།། མོས་པ་དམན་པའི་སེམས་ཅན་དག། རྨོངས་ཤིང་མི་ཤེས་སེམས་ལྡན་པའོ།། དེ་ལ་དཔའ་བོ་དང་རྣལ་འབྱོར་མ་རྣམས་ཀྱིས་གསལ་བར་གསུངས་པའི་གསང་སྔགས་ནི་འདི་ཡིན་ཏེ། ཨོཾ་ན་མོ་བྷ་ག་ཝ་ཏེ་ཝི་རེ་ཤཱ་ཡ། མ་ཧཱ་ཀལྤཱགནི་སཾ་ནི་བྷ་ཡ། ཛ་ཊཱ་མ་ཀུ་ཊོདཀ་ཊཱ་ཡ། དཾ་ཥྟཱ་ཀ་རཱ་ལོ་གྲ་བྷཱི་ཥ་ཎ་མུ་ཁཱ་ཡ། ས་ཧ་སྲ་བྷུ་ཛ་བྷཱ་སུ་རཱ་ཡ། པ་ར་ཤུ་བཱ་ཤུ་ཏྱ་ཏ་ཤཱུ་ལ་ཁ་ཌཱཾ་ག་དྷ་རི་ཎེ། བྱཱ་གྷྲ་ཛི་ནཱམྤ་ར་དྷ་རཱ་ཡ། མ་ཧཱ་དྷཱུ་མྦྲཱནདྷ་ཀཱ་ར་ཝ་པུ་ཥཱ་ཡ། ཀ་ར་ཀ་ར། ཀུ་རུ་ཀུ་རུ། བྷན་དྷ་བྷན་དྷ། ཏྲཱ་ས་ཡ་ཏྲཱ་ས་ཡ། ཀྵོ་བྷ་ཡ་ཀྵཱོ་བྷ་ཡ། ཧྲཽཾ་ཧྲཽཾ། ཧྲཿཧྲཿ ཕེཾ་ཕེཾ། ཕཊ་ཕཊ། ད་ཧ་ད་ཧ། པ་ཙ་པ་ཙ། བྷ་ཀྵ་བྷ་ཀྵ་བ་ས་རུ་དྷི་རཱནྟྲ་མཱ་ལཱ་བ་ལམ་ཝི་ནེ། གྲི་ཧྣ་གྲི་ཧྣ་སཔྟ་པཱ་ཏཱ་ལ་ག་ཏ་བྷུ་ཛཾ་གཱཾ་སརྦཾ་པཱ་ཏརྫ་ཡ་ཏརྫ་ཡ། ཨཱ་ཀཌྜྷ་ཨཱ་ཀཌྜྷ། ཧྲཱིཾ་ཧྲཱི།ཾ ཛ་ཎཽཾ་ཛ་ཎཽཾ། ཀྵ་མཱཾ་ཀྵ་མཱཾ། ཧཾ་ཧཾ། ཧིཾ་ཧིཾ། ཧུཾ་ཧུཾ། ཀི་ལི་ཀི་ལི། སི་ལི་སི་ལི། ཧི་ལི་ཧི་ལི། དྷི་ལི་དྷི་ལི། ཧཱུཾ་ཧཱུཾ་ཕཊ། དཔལ་ཧེ་རུ་ཀར་བརྗོད་པ་ལས་རྩ་བའི་སྔགས་ཀྱི་གསང་བའི་ཆོ་གའི་ལེའུ་སྟེ་ཉི་ཤུ་རྩ་ལྔ་པོ།། །།