ངེས་དོན་སྙིང་པོའི་གཏམ་འཇིགས་མེད་སེངྒེའི་སྒྲ་དབྱངས་ཞེས་བྱ།
དགེ་རྩེ་འགྱུར་མེད་ཚེ་དབང་མཆོག་གྲུབ།
ཨོཾ་སྭ་སྟི། བདེ་གཤེགས་སྙིང་པོའི་བསྟན་པ་སེང་གེའི་སྒྲས། །ལྟ་ངན་རི་དྭགས་མཐའ་དག་སྐྲག་མཛད་ཅིང༌། །སངས་རྒྱས་དགོངས་པའི་མཐར་ཐུག་གསལ་མཛད་པའི། །མཚུངས་མེད་བླ་མ་རྣམས་ལ་སྙིང་ནས་འདུད། ། སྐྱོན་བྲལ་རྒྱལ་བའི་བསྟན་པའི་སྒོ་ཇི་སྙེད། །མ་ལུས་བློ་ཡི་བྱི་དོར་ཁོ་ན་སྟེ། །
ཀུན་ཀྱང་ངེས་དོན་གཅིག་གི་ལམ་སྟེགས་དང༌། །མཐར་ཐུག་འབྲས་བུ་གཅིག་ཏུ་བཀྲི་བའི་ཐབས། ། འདི་ན་རྒྱལ་བའི་ཆོས་འཁོར་རིམ་གསུམ་གྱི། །དང་པོས་ཀུན་རྫོབ་རྒྱུ་འབྲས་བསླུ་མེད་དང༌། །གཉིས་པས་ཀུན་རྫོབ་རང་སྟོང་གསུམ་པ་ཡིས། །དོན་དམ་གཞན་སྟོང་ཆོས་ཉིད་ཟབ་མོ་བསྟན། །ཡུལ་གྱི་འཁྲུལ་སྣང་མེད་བཞིན་ཀུན་ཏུ་བརྟགས། །ཡུལ་ཅན་འཁྲུལ་སེམས་ཚོགས་བརྒྱད་གཞན་དབང་ལས། །རྣམ་གྲོལ་རིག་པའི་ཡེ་ཤེས་ཡོངས་གྲུབ་ཆེ། །འདི་ནི་ངེས་དོན་རྫོགས་ཆེན་ཁྱད་པར་ཆོས། །གཤིས་ཀྱི་བཞུགས་ཚུལ་འཁོར་ལོ་ཐ་མ་རུ། །ཕྱོགས་ཙམ་བསྟན་ནས་ཟབ་གསལ་གཉིས་མེད་དོན། །ཤིན་ཏུ་རྒྱས་པ་ཆེན་པོའི་མདོ་སྡེའི་གཞུང༌། །རིག་འཛིན་སྡེ་སྣོདཉིད་དུ་གསལ་བར་བསྟན། ། དེ་ལས་སྔོན་གྱི་སློབ་དཔོན་འགའ་ཞིག་གིས། །སྔགས་ཀྱི་ངེས་པར་མ་བརྟེན་དགོས་དབང་གིས། །མདོ་ལུང་ཙམ་ལ་བརྟེན་ནས་བཀྲལ་བ་ལས། །རྣམ་རིག་སྨྲ་བའི་གྲུབ་མཐར་འདོད་པའང་བྱུང༌། །སེམས་དང་སེམས་བྱུང་ཀུན་རྟོག་ཆུ་བོའི་ཀླུང༌། །བློ་ཡིས་དཀྲུགས་པའི་སྟོང་ཉིད་ཆུ་བུར་དང༌། །རྣམ་ཤེས་ཙམ་ལ་ཡོངས་གྲུབ་གནས་མ་ཡིན། །འདི་ནི་ཤེས་རབ་ཕ་རོལ་ཕྱིན་མཆོག་སྟེ། །ལམ་བདེན་འདུས་བྱས་ཁམས་ལའང་དེ་མི་གནས། །གང་དག་རིགས་པས་དཔྱད་པའི་དབུ་མ་བའི། །སྤྲོས་བྲལ་ནམ་མཁའ་ལྟ་བུའི་སྟོང་ཉིད་ཀྱང༌། །སྟོང་པ་ཉིད་དུ་སྙམ་བྱེད་བློ་ཡིན་ཕྱིར། །ནམ་ཡང་སྤྲོས་པའི་མཐའ་ལས་འདའ་བ་མེད། ། འདིར་ནི་ཚོགས་བརྒྱད་སེམས་ཀྱི་སྤྲིན་རུམ་ལས། །རྣམ་པར་གྲོལ་བའི་རིག་དངོས་ཉི་མ་བཞིན། །སོ་སོ་རང་རིག་ཡེ་ཤེས་སྤྱོད་ཡུལ་བ། །རྒྱལ་བ་ཀུན་གྱིས་གཟིགས་པའི་དེ་ཁོ་ན། །འདི་ཡིས་ཀུན་བརྟགས་རང་གི་ངོ་བོས་སྟོང༌། །རྣམ་ཤེས་གཞན་དབང་སྐྱེ་བ་མེད་པས་སྟོང༌། །ཡོངས་གྲུབ་རིག་པ་དོན་དམ་ངོ་བོས་སྟོང༌། །སྟོང་བའི་ཚུལ་འདི་དོན་དམ་ཡང་དག་མཐའ། །འཕགས་པ་རྣམས་ཀྱི་བདེན་མཐོང་ཡེ་ཤེས་དང༌། །རྗེས་མཐུན་རྣལ་འབྱོར་རྣམས་ལ་རིག་པའི་ཆ། །ལུས་ཅན་རྣམས་ལ་སྙིང་པོའི་ཚུལ་དུ་བཞུགས། །གནས་སྐབས་གསུམ་ཡང་བློ་ཡི་དྲི་མས་ཕྱེ། །གང་ཚེ་སྒྲིབ་ཀུན་སྤངས་པའི་ཡེ་ཤེས་ལས། །སྐུ་དང་ཞིང་སོགས་བསམ་མི་ཁྱབ་པའི་གཞིར། །སྣང་ཡང་རྡུལ་དང་ཤེས་སོགས་མཚན་མའི་ཆོས། །ཚིག་དང་སྨྲ་རྟོག་བློ་ཡི་མདུན་མི་གནས། །འདུས་བྱས་ལས་འདས་རྟག་མཐར་ལྷུང་མ་མྱོང༌། །ཆོས་ཀུན་རང་བཞིན་གནས་ལུགས་གཞན་རྐྱེན་ལས། །མ་བྱུང་གཞན་དུ་འཕོ་ཞིང་བསྒྱུར་མེད་པས། །འཇིག་རྟེན་ལས་འདས་སྐུ་དང་ཡེ་ཤེས་ཀྱི། །འཆར་གཞིར་བཞུགས་པས་ཆད་མཐར་ལྷུང་མ་མྱོང༌། ། དེ་ཕྱིར་གདོད་ནས་གྲུབ་པའི་གནས་ལུགས་དེ། །སེམས་ཅན་རྣམས་ལ་ཤིན་ཏུ་ལྐོག་གྱུར་གནས། །བློ་ཆེན་རྣམས་ཀྱིས་ཆ་ཤས་ཙམ་མཐོང་སྟེ། །སངས་རྒྱས་རྣམས་ཀྱིས་ཡོངས་སུ་རྫོགས་པར་གཟིགས། །དེ་ནི་གནས་ཚུལ་ཡིན་གྱི་སྣང་ཚུལ་མིན། །གདོད་ནས་ཡོད་མ་མྱོང་བའི་འཁྲུལ་སྣང་ཆོས། །སེམས་ཅན་རྣམས་ལ་མངོན་སུམ་འཛིན་བཅས་སྣང༌། །འཕགས་པ་རྣམས་ལ་རེས་འགའ་ཙམ་དུ་སྣང༌། །འཕགས་མཆོག་རྣམས་ཀྱིས་གཏན་དུ་མི་གཟིགས་སོ། །དེ་ནི་སྣང་ཚུལ་ཡིན་གྱི་གནས་ཚུལ་མིན། །དེ་ཕྱིར་རྣམ་ཤེས་ཡེ་ཤེས་ཁྱད་པར་དང༌། །འཁྲུལ་དང་མ་འཁྲུལ་སེམས་དང་རིག་པ་དང༌། །ཆོས་དང་ཆོས་ཉིད་ཀུན་རྫོབ་དོན་དམ་དང༌། །གནས་ཚུལ་སྣང་ཚུལ་མ་འཁྲུལ་རྟོགས་པ་ནི། །རྒྱལ་བ་ཀུན་གྱི་གཞུང་ལམ་ཆེན་པོའི་ཕུལ། །གང་དག་སེམས་ལས་འདས་པའི་རིག་པ་ནི། །ཚོགས་བརྒྱད་ཉེར་ལེན་སེམས་ཀྱིས་མ་བསྡུས་ཤིང༌། །ཡུལ་ལ་འཇུག་པའི་སྤྲོས་ཀུན་ཉེར་ཞི་བས། །དངོས་པོ་སྣང་བས་བསམ་གཟུགས་སྟོང་བའི་གཤིས། །སྟོང་པ་རང་བཞིན་གསལ་བའི་སྙིང་པོ་ནི། །ཡེ་ཤེས་དག་པས་མཐོང་ཐོས་སྣོམ་མྱང་དང༌། །ཡེ་ཤེས་སྣང་བའི་གཟུགས་སོགས་ཀུན་ཏུ་ཡོད། ། ཚོགས་བརྒྱད་སེམས་བྱུང་རྟོག་པ་ཀུན་བྲལ་ཡང༌། །ཆོས་ཉིད་རིག་པ་མ་འགགས་ཟང་ཐལ་ལེ། །རིག་པའི་ཡེ་ཤེས་རྣམ་པ་ཐམས་ཅད་པ། །འོན་ཀྱང་ལམ་པས་ཕྱོགས་རེ་མཐོང་བ་ནི། །གནས་ཚུལ་སྣང་ཚུལ་འདྲེས་མར་འབྱུང་བའི་ཕྱིར། །གནས་ཚུལ་རྗེན་པ་སངས་རྒྱས་ཁོ་ནས་གཟིགས། ། དེ་ལ་དམིགས་པའི་ཡུལ་ཅན་ཤེས་ངོ་ལ། །དྲི་མས་བསྒྲིབས་དང་མ་བསྒྲིབ་ཁྱད་པར་ལས། །བློ་ངོར་ཆོས་ཉིད་དྲི་མས་བསྒྲིབས་ལྟར་སྣང༌། །ཇི་ལྟར་རང་གི་སྟེང་དུ་སྤྲིན་བྱུང་ཚེ། །མ་བརྟགས་ཉི་མ་སྤྲིན་གྱིས་བསྒྲིབས་སོ་ཟེར། །སྤྲིན་དེ་རླུང་གིས་བདས་ནས་མི་གནས་ཚེ། །ཉི་མའི་སྒྲིབ་བྱེད་སངས་ཞེས་རྟོག་པ་ལྟར། །གང་དུ་བློ་ཡི་དྲི་མ་ཡོངས་སྤངས་ཚེ། །དྲི་བྲལ་སངས་རྒྱས་ཐོབ་ཅེས་རྒྱལ་བས་བསྟན། །དེ་ཕྱིར་ཆོས་ཉིད་ངོ་བོར་སྒྲིབ་ཚོགས་ཀྱིས། །གོས་མ་མྱོང་བས་ཀ་ནས་དག་པར་བརྗོད། །སྤྲོས་པ་མཐའ་དག་བྲལ་པ་ཡིན་པའི་ཕྱིར། །སྤྲོས་དང་བྲལ་བ་ཉིད་ཀྱིས་བདེན་པར་གྲུབ། །སྤྲོས་བྲལ་འདོད་ལ་བདེན་གྲུབ་མི་འདོད་པ། །ཉི་མའི་འོད་ཟེར་ཉི་མར་མི་འདོད་བཞིན། །རང་བཞིན་འགྱུར་མེད་འགྲོ་ལ་རྟག་ཁྱབ་ན། །རྟག་དངོས་སྤྲོས་པར་འགྱུར་སྙམ་དེ་བསལ་ཕྱིར། །རྒྱལ་བས་ཆོས་དབྱིངས་ཟབ་མོ་སྟོང་བར་གསུངས། །སྟོང་བ་དེ་ཡང་ནམ་ཡང་བདེན་མེད་དུ། །ཅི་ཡང་མེད་པ་ཙམ་ཞིག་བསྟན་པ་མིན། །ཀུན་རྫོབ་ཕྱོགས་ནས་མེད་དང་མ་ཡིན་སྟོང༌། །དོན་དམ་ཕྱོགས་ནས་རྟོག་པའི་ཡུལ་གྱིས་སྟོང༌། །དོན་དམ་ངོ་བོ་ཉིད་ཀྱིས་སྟོང་པ་ལྟར། །གསུངས་པའི་དགོངས་པ་དོན་དམ་ལ་དམིགས་ནས། །བློ་ཡིས་བཟུང་ལྟར་མ་གྲུབ་པ་ལ་དགོངས། །ཡེ་ཤེས་རང་ལས་གཞན་པའི་མཚན་ཉིད་ཅན། །གཟུང་འཛིན་སྤྲོས་ཀུན་སྟོང་བའི་སྟོང་ཉིད་དེ། །མྱང་འདས་བློ་ཡིས་ཟད་པའི་སྟོང་ཉིད་ཀྱང༌། །གང་ཟག་བློ་ཡི་སྒྲིབ་པ་ཟད་ལ་དགོངས། ། དེ་ཕྱིར་ཆོས་ཀུན་སྟོང་གཞིའི་ཆོས་ཉིད་གང༌། །འཕགས་པ་རྣམས་ཀྱི་ཡེ་ཤེས་མ་འཁྲུལ་བས། །ཉམས་སུ་མྱོང་བྱ་ཉིད་ཕྱིར་བདེན་པར་གྲུབ། །འགྱུར་བ་མེད་ཕྱིར་རྟག་བརྟན་ཐེར་ཟུག་གོ །མདོར་ན་རྒྱལ་བས་ཀུན་རྫོབ་རང་སྟོང་ལ། །དགོངས་ནས་ཆོས་ཀུན་ངོ་བོ་ཉིད་མེད་གསུངས། །དོན་དམ་གཟུང་འཛིན་སྤྲོས་པའི་ཆོས་གཞན་གྱིས། །སྟོང་ཡང་ཡེ་ཤེས་མེད་པར་བསྟན་པ་མིན། ། གང་ལ་བློ་ཡི་རིམ་པས་འཇལ་ལུགས་གསུམ། །སེམས་ཅན་རྣམས་ལ་གཞི་ཡི་ཚུལ་དུ་སྣང༌། །རྣལ་འབྱོར་རྣམས་ལ་ལམ་གྱི་ཚུལ་དུ་སྣང༌། །དག་པའི་འཕགས་པ་རྣམས་ལ་འབྲས་བུར་སྣང༌། །གསུམ་པོའང་བློ་ལ་སྣང་ཚུལ་ངོས་ནས་བཞག །ཀུན་ཀྱང་བདེ་གཤེགས་སྙིང་པོའི་ངོ་བོར་གཅིག །བློ་ཡི་དྲི་མས་ཤིན་ཏུ་ལྐོག་གྱུར་དང༌། །ཆ་ཤས་ཙམ་དང་ཡོངས་རྫོགས་མཐོང་བ་ལ། །གཞི་འབྲས་གཉིས་སུ་སྙིང་པོའི་སྒྲ་ཡིས་བརྗོད། །ལམ་ནི་གཞི་ཡི་མདངས་འོད་འཁོར་བའི་ཆོས། །ལྷན་ཅིག་འཛོམས་པ་དེ་ཡི་གཉེན་པོར་འགྲོ། །དྲི་མ་བྲལ་བྱེད་དང་ནི་གནས་འགྱུར་བྱེད། །ཐབས་ཚུལ་སྣ་ཚོགས་ལམ་བདེན་འདུ་བྱས་ཡིན། །འདི་ནི་བློ་ཡི་གྲུབ་མཐས་མ་རེག་པར། །རིག་པའི་ཤེས་རབ་རང་བྱུང་མཉམ་བཞག་གིས། །ཆོས་ཉིད་གཉུག་མའི་རང་ངོ་སྐྱོང་བྱས་ན། །མཐར་གྱིས་བདེན་པའི་དེ་ཉིད་མཇལ་བར་འགྱུར། ། ཇི་སྲིད་འབྱུང་བ་ཡོད་ཅིང་རྟོག་པ་ཡོད། །དེ་སྲིད་ཀུན་རྫོབ་རྒྱུ་འབྲས་སྒྱུ་མ་ཙམ། །འབྱུང་ཕྱིར་དྲང་དོན་ཐབས་ཀྱིས་རང་གཞན་རྣམས། །ཐར་བར་བཀྲི་བའི་ཚུལ་ཀྱང་འདོར་མི་བྱ། །
རྒྱལ་བ་སྲས་བཅས་གསང་ཚིག་རྨད་པོ་ཆེ། །བདེ་གཤེགས་སྙིང་པོ་ཕྱིར་མི་ལྡོག་པའི་ཚུལ། །མངོན་བྱེད་ཡང་སྙིང་མྱུར་ལམ་རྫོགས་པ་ཆེའི། །གསང་བ་ཟབ་མོ་སྐྱེ་ཀུན་འཛིན་གྱུར་ཅིག །ངེས་དོན་མཐར་ཐུག་འཛིན་པ་མཆོག་རྣམས་ཀྱིས། །ངེས་དོན་གཞུང་ལུགས་མཇལ་ཞིང་ཅུང་ཟད་མྱོང༌། །ངེས་དོན་སྙིང་ལ་མོས་པས་མ་བཟོད་ནས། །ངེས་དོན་གཏམ་འདི་ལྷུན་གྲུབ་སྟེང་ནས་ཐལ། །དགེའོ།། བེ་རི་རིག་པའི་རྡོ་རྗེས་རྩིས་འཁོར་དུ་བཅུག་ཅིང་དག་པར་ཕབ་པོ།། ༢༠༡༡ ༡༠ ༩ ཉིན།