ཀུན་མཁྱེན་ཡབ་སྲས་ཀྱི་གསོལ་འདེབས་བར་ཆད་ལམ་སེལ་ཞེས་བྱ་བ།
བློ་གྲོས་གྲགས་པ།
ཆོས་སྐུ་དོན་དམ་དབྱིངས་ལས་ཉེར་བཞེངས་པ། །ཀུན་རྫོབ་གཞན་ངོར་རླབས་ཆེན་འགྲོ་མགོན་རྗེ། །རིགས་ལྡན་སྤྲུལ་སྐུ་ཡབ་སྲས་བརྒྱུད་འཛིན་ཚོགས། །དགོངས་ཆེན་ཀློང་ནས་གཟིགས་རྒྱ་བསྐྱེད་དུ་གསོལ། །དུས་གསུམ་སངས་རྒྱས་རྟོན་པ་བཞི་ལྡན་ཆེ། །ཐུགས་སྲས་ཀུན་སྤངས་ཆེན་པོ་ཆོས་གྲགས་དཔལ། །གང་རྣམ་གཉིས་ལ་གུས་པས་སྐྱབས་གསོལ་ན། །བར་ཆད་ཀུན་སེལ་ཆོས་མཐུན་འགྲུབ་བྱིན་རློབས། །ཇོ་ནང་ལོ་ཙཱ་བློ་གྲོས་དཔལ་གྱི་མཚན། །མ་ཏི་པཎ་ཆེན་རྒྱལ་མཚན་དཔལ་བཟང་པོ། །གང་རྣམ་གཉིས་ལ་གུས་པས་སྐྱབས་གསོལ་ན། །བར་ཆད་ཀུན་སེལ་ཆོས་མཐུན་འགྲུབ་བྱིན་རློབས། །ཀུན་མཁྱེན་ཕྱོགས་ལས་རྣམ་པར་རྒྱལ་བའི་སྡེ། །འབྲི་གུང་ལོ་ཙཱ་མ་ཎི་ཀ་ཤྲི་མཚན། །གང་རྣམ་གཉིས་ལ་གུས་པས་སྐྱབས་གསོལ་ན། །བར་ཆད་ཀུན་སེལ་ཆོས་མཐུན་འགྲུབ་བྱིན་རློབས། །སྨན་ཆུ་ཁ་བ་བློ་གྲོས་རྒྱལ་མཚན་ཆེ། །རྒྱལ་སྲས་རིན་ཚུལ་མཛད་པ་ཟླ་བྲལ་བ། །གང་རྣམ་གཉིས་ལ་གུས་བས་སྐྱབས་གསོལ་ན། །བར་ཆད་ཀུན་སེལ་ཆོས་མཐུན་འགྲུབ་བྱིན་རློབས། །ཞང་སྟོན་རྒྱལ་བོ་བསོད་ནམས་གྲགས་པའི་མཚན། །གྷ་རུང་ལྷ་ཡི་རྒྱལ་མཚན་མཁས་པའི་ཕུལ། །གང་རྣམ་གཉིས་ལ་གུས་པས་སྐྱབས་གསོལ་ན། །བར་ཆད་ཀུན་སེལ་ཆོས་མཐུན་འགྲུབ་བྱིན་རློབས། །ཉ་དབོན་ཀུན་དགའ་དཔལ་བཟང་རིགས་པའི་གཏེར། །ཕུན་ཚོགས་དཔལ་བཟང་འགྲོ་བའི་འདྲེན་པ་རྗེ། །གང་རྣམ་གཉིས་ལ་གུས་པས་སྐྱབས་གསོལ་ན། །བར་ཆད་ཀུན་སེལ་ཆོས་མཐུན་འགྲུབ་བྱིན་རློབས། །ཐང་བོ་ཆེ་བ་ཀུན་དགའ་འབུམ་ཞེས་མཚན། །ཐང་ཆུང་བློ་གྲོས་དཔལ་གྱི་གྲགས་སྙན་ཅན། །གང་རྣམ་གཉིས་ལ་གུས་པས་སྐྱབས་གསོལ་ན། །བར་ཆད་ཀུན་སེལ་ཆོས་མཐུན་འགྲུབ་བྱིན་རློབས། །ཡབ་སྲས་དེ་དག་རྣམས་ཀྱི་ཐུགས་སློབ་མཆོག །མཚལ་མིན་བསོད་ནམས་བཟང་པོ་སྐྱེ་དགུའི་མགོན། །གང་ཉིད་ལའང་གུས་པས་སྐྱབས་གསོལ་ན། །བར་ཆད་ཀུན་སེལ་ཆོས་མཐུན་འགྲུབ་བྱིན་རློབས། །ངེས་དོན་བསྟན་བའི་རྩ་ལག་གང་དག་གི །བརྒྱུད་འཛིན་ཆེན་པོ་རྗེ་བཙུན་སྒྲོལ་བའི་མགོན། །གང་ཉིད་ལའང་གུས་པས་སྐྱབས་གསོལ་ན། །བར་ཆད་ཀུན་སེལ་ཆོས་མཐུན་འགྲུབ་བྱིན་རློབས། །གཞན་ཡང་ངེས་དོན་སྒྲུབ་བརྒྱུད་འཛིན་པའི་བཤེས། །ཇོ་ནང་རིང་ལུགས་འཛིན་བའི་སྐྱེས་ཆེན་ཚོགས། །དེ་དག་ཀུན་ལ་གུས་པས་སྐྱབས་གསོལ་ན། །བར་ཆད་ཀུན་སེལ་ཆོས་མཐུན་འགྲུབ་བྱིན་རློབས། །ངེས་དོན་ལུགས་བཟང་འཛིན་སྐྱོང་སྤེལ་བ་ཡི། །ཇོ་ནང་ཡབ་སྲས་བརྒྱུད་འཛིན་དང་བཅས་པའི། །རྣམ་པར་འཕྲུལ་ཆེན་ཡི་དམ་རབ་འབྱམས་དང༌། །མཆོག་གསུམ་མཁའ་འགྲོ་ཆོས་སྐྱོང་མ་ལུས་པ། །གང་འདུལ་མཛད་བཟང་བསམ་མི་ཁྱབ་པ་ཅན། །དེ་རྣམས་ཀུན་ལ་སྙིང་ནས་རེ་ལྟོས་འཆའ། །སྐྱབས་འོག་སྒྲུབ་བོའི་རེ་འབྲས་ཡོད་དོ་ཅོག །གང་ལ་གེགས་བྲལ་ཕ་མཐར་ཕྱིན་གྱུར་ཅིག ། ཅེས་པའི་བར་ཆད་ལམ་སེལ་ཉུང་བསྡུས་འདི་ཡང་བླ་མ་ཐུགས་རྗེ་དཔལ་གྱི་དགོངས་བཞེད་བཞིན་མ་ཏིས་སྦྱར་བ་དགེ།