གཞན་སྟོང་དབུ་མའི་དོགས་གཅོད་བསྡུས་པ་ངེས་དོན་གསལ་བའི་སྒྲོན་མེ། མཁན་ཆེན་ཚུལ་ཁྲིམས་བློ་གྲོས། ༄༅།། བླ་མ་དང་རྗེ་བཙུན་བྱམས་པ་མགོན་པོ་ལ་ཕྱག་འཚལ་ལོ།། དེ་ཡང་སྟོན་པ་མཉམ་མེད་ཐུབ་པའི་དབང་པོ་སྐྱེ་བོ་ཡོངས་ཀྱི་རྣམ་འདྲེན་གཅིག་པུར་གྱུར་བ། མཁྱེན་བརྩེ་ནུས་པའི་དཀྱིལ་འཁོར་ཡོངས་སུ་རྫོགས་པ་གང་གིས་ཆོས་ཀྱི་འཁོར་ལོ་རིམ་པ་གསུམ་དུ་བསྐོར་བ་ལས་ཐ་མ་ལེགས་པར་རྣམ་པར་ཕྱེས་པའི་ཆོས་འཁོར་འདི་ནི་སྟོན་པ་ཉིད་ཀྱིས་ཀྱང་རྔ་བོ་ཆེའི་མདོ་སོགས་ལས་བསྔགས་པ་ཆེ་ཐང་དུ་བརྗོད། མདོ་སྡེ་དྲང་ངེས་འབྱེད་པའི་དཔང་བོར་བཅོམ་ལྡན་འདས་རང་གིས་བསྐོས་པའི་འཕགས་པ་ཐོགས་མེད་ཞབས་ཀྱིས་ཀྱང་ངེས་པའི་དོན་དུ་བཞག་པའི་མདོ་སྡེ་ནི་འཕགས་པ་མྱ་ངན་ལས་འདས་པ་ཆེན་པོ་དང༌། རྔ་བོ་ཆེ་དང༌། སོར་མོའི་ཕྲེང་བའི་མདོ་ལ་སོགས་པ་ཡིན་ལ། དེ་རྣམས་ཀྱི་བརྗོད་བྱ་ཟབ་ཞི་སྤྲོས་བྲལ་འོད་གསལ་འདུས་མ་བྱས་པའི་རང་བཞིན་རིག་ཁམས་བདེ་བར་གཤེགས་པའི་སྙིང་པོ་དེ་ལ་གངས་ཅན་གྱི་ལྗོངས་འདིར་དཔལ་ལྡན་ཇོ་ནང་བའི་མཁས་གྲུབ་གཉིས་ལྡན་གྱི་དམ་པ་རྣམས་ཀྱིས་གཞན་སྟོང་དབུ་མ་ཆེན་པོ་ཞེས་པའི་མཚན་གསོལ་ཞིང༌། ལུང་དང་རིགས་པའི་ལམ་ནས་ཤིན་ཏུ་གསལ་བར་མཛད་དོ།། དེ་ལ་ཁ་ཅིག་གིས་ནི་འདི་བོད་ཀྱིས་རང་བཟོ་ཡིན་པ་དང༌། མུ་སྟེགས་པའི་ལུགས་ཡིན་སོགས་ཟེར་རོ།། འོན་ཀྱང་གཟུ་བོར་གནས་པའི་བློས་རྣམ་པར་བརྟགས་ན་འདི་ལྟར་སྣང་སྟེ། འདི་རང་བཟོ་ཡིན་ཞེས་པ་ནི་ཤིན་ཏུ་མི་འཐད་དེ། དཔལ་ལྡན་ཇོ་ནང་པ་རྣམས་ཀྱིས་སྙིང་པོ་བསྟན་པའི་མདོ་རྣམས་དང༌། རྒྱུད་བླ་རྩ་འགྲེལ། ཆོས་དབྱིངས་བསྟོད་པ། བླ་མེད་ཀྱི་རྒྱུད་སྡེ། སེམས་འགྲེལ་སོགས་ནས་གསུངས་པ་རྣམས་ཇི་ལྟ་བ་བཞིན་དུ་བཀྲལ་འདུག་གི དེ་རྣམས་ནས་གཏན་ནས་མ་བཤད་པའི་གཞན་སྟོང་ཞིག་གང་དུའང་བཤད་པ་མི་སྣང་བའི་ཕྱིར་རོ།། གལ་ཏེ་མིང་གཞན་སྟོང་ཞེས་བཏགས་པ་ཙམ་གྱིས་རང་བཟོའི་གྲུབ་མཐའ་ཉིད་དུ་འགྱུར་འགྲོ་བར་སྨྲ་བ་ནི་ཧ་ཅང་ཐལ་ལོ།། མུ་སྟེགས་པའི་ལུགས་སུ་སྨྲ་བ་ནི་དགོས་པའི་དབང་ངམ་གྱ་ཚོམ་དུ་སྨྲ་བ་སྟེ། ཇོ་ནང་བའི་གཞན་སྟོང་དང་མུ་སྟེགས་པའི་བར་དུ་མ་ཟད་རང་སྡེ་རྣམ་རིག་པ་དག་དང་གཞན་སྟོང་དབུ་མའི་བར་གྱི་བར་ཐག་ཀྱང་གནམ་ས་ལས་རིང་བའི་ཕྱིར་རོ།། དེས་ན་འདི་ལ་དོགས་པ་འགའ་ཞིག་སྤོངས་པ་ལ། སྣང་ཕྱོགས་ཀྱི་དོགས་པ་སྤོངས་པ་དང༌། སྟོང་ཕྱོགས་ཀྱི་དོགས་པ་སྤོངས་པ་དང༌། བརྗོད་ཚུལ་མི་འཐད་པའི་དོགས་པ་སྤོངས་པའོ།། དང་པོ་ནི།
རྩོམ་འཕྲོ་ཀློགས། »
