བསྟན་འགྱུར།

བསྟན་འགྱུར་དཀར་ཆག

མཛད་པ་པོ། ཕྱོགས་ལས་རྣམ་རྒྱལ།

བརྗོད་བྱ། བསྟན་འགྱུར་དཀར་ཆག

སྤྱིའི་དེབ་ཨང་། 00326

དེབ་ཨང་།  k-j001

མ་ཕྱི།  ཤིང་དཔར།

འཕྲུལ་དེབ་བཟོ་སྐྲུན་པ། བེ་རི་རིག་པའི་རྡོ་རྗེ།

ལོ་ཟླ་ཚེས།  ཕྱི་ལོ།  ༢༠༡༨ ཟླ། ༤ ཚེས། ༥

ཕབ་ལེན་གནོངས།

རྒྱན་སྟུག་པོ་བཀོད་པའི་མདོ།

མཛད་པ་པོ། སངས་རྒྱས་ཤཱཀྱ་ཐུབ་པ།

བརྗོད་བྱ། གནས་ལུགས་དོན་དམ་བདེན་པ།

སྤྱིའི་དེབ་ཨང་། 00311

དེབ་ཨང་།  ng-j007

མ་ཕྱི།  སྡེ་དགེའི་ཤིང་དཔར།

འཕྲུལ་དེབ་བཟོ་སྐྲུན་པ། བེ་རི་རིག་པའི་རྡོ་རྗེ།

ལོ་ཟླ་ཚེས།  ཕྱི་ལོ།  ༢༠༡༧ ཟླ། ༧ ཚེས། ༢༨

ཕབ་ལེན་གནོངས།

ལངྐར་གཤེགས་པའི་མདོ།

མཛད་པ་པོ། སངས་རྒྱས་ཤཱཀྱ་ཐུབ་པ།

བརྗོད་བྱ། འཕགས་པའི་ཡེ་ཤེས་སྟོང་བ་ཆེན་པོ།

སྤྱིའི་དེབ་ཨང་། 00310

དེབ་ཨང་།  ng-j006

མ་ཕྱི།  སྡེ་དགེའི་ཤིང་དཔར།

འཕྲུལ་དེབ་བཟོ་སྐྲུན་པ། བེ་རི་རིག་པའི་རྡོ་རྗེ།

ལོ་ཟླ་ཚེས།  ཕྱི་ལོ།  ༢༠༡༧ ཟླ། ༧ ཚེས། ༢༠

ཕབ་ལེན་གནོངས།

ཆོས་མངོན་པའི་མཛོད།

འཕགས་པ་དབྱིག་གཉེན།

༄༅།།རྒྱ་གར་སྐད་དུ།ཨ་བྷི་དྷརྨ་ཀོ་ཥཱ་ཀཱ་རི་ཀཱ།བོད་སྐད་དུ། ཆོས་མངོན་པའི་མཛོད་ཀྱི་ཚིག་ལེའུར་བྱས་པ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ།། གང་ཞིག་ཀུན་ལ་མུན་པ་གཏན་བཅོམ་ཞིང་།།འཁོར་བའི་འདམ་ལས་འགྲོ་བ་དྲང་མཛད་པ།།དོན་བཞིན་སྟོན་པ་དེ་ལ་ཕྱག་འཚལ་ནས།།ཆོས་མངོན་མཛོད་ཀྱི་བསྟན་བཅོས་རབ་བཤད་བྱ།།

ཆོས་མངོན་ཤེས་རབ་དྲི་མེད་རྗེས་འབྲང་བཅས།།དེ་ཐོབ་བྱ་ཕྱིར་གང་དང་བསྟན་བཅོས་གང་།།འདིར་དེའི་དོན་དུ་ཡང་དག་ཆུད་ཕྱིར་རམ།།འདི་ཡི་གནས་དེ་ཡིན་པས་ཆོས་མངོན་མཛོད།། གནས་དང་པོ་ཁམས་བསྟན་པ། ཆོས་རྣམས་རབ་ཏུ་རྣམ་འབྱེད་མེད་པར་ཉོན་མོངས་རྣམས།།གང་ཕྱིར་ཉེ་བར་ཞི་བར་བྱ་བའི་ཐབས་མེད་ལ།།ཉོན་མོངས་པས་ཀྱང་འཇིག་རྟེན་སྲིད་མཚོ་འདིར་འཁྱམས་ཏེ།།དེ་བས་དེ་ཕྱིར་འདི་ནི་སྟོན་པས་གསུངས་སོ་ལོ།།ཟག་བཅས་ཟག་པ་མེད་ཆོས་རྣམས།།ལམ་མ་གཏོགས་པའི་འདུས་བྱས་རྣམས།།ཟག་བཅས་གང་ཕྱིར་དེ་དག་ལ།།ཟག་རྣམས་ཀུན་ཏུ་རྒྱས་པར་འགྱུར།།ཟག་མེད་ལམ་གྱི་བདེན་པ་དང་།།འདུས་མ་བྱས་རྣམ་གསུམ་ཡང་སྟེ།།ནམ་མཁའ་དང་ནི་འགོག་པ་གཉིས།།དེ་ལ་ནམ་མཁའ་མི་སྒྲིབ་པའོ།།

སོ་སོར་བརྟགས་པས་འགོག་པ་གང་།།བྲལ་བའོ་སོ་སོ་སོ་སོ་ཡིན།།སྐྱེ་ལ་གཏན་དུ་གེགས་བྱེད་པ།།འགོག་གཞན་སོ་སོར་བརྟགས་མིན་པས།།འདུས་བྱས་ཆོས་རྣམས་དེ་དག་ཀྱང་།།གཟུགས་ལ་སོགས་པའི་ཕུང་པོ་ལྔ།།དེ་དག་ཉིད་དུས་གཏམ་གཞི་དང་།།ངེས་པར་འབྱུང་བཅས་གཞི་དང་བཅས།།གང་དག་ཟག་བཅས་ཉེར་ལེན་པའི།།ཕུང་པོའང་དེ་དག་འཐབ་བཅས་ཀྱང་།།སྡུག་བསྔལ་ཀུན་འབྱུང་འཇིག་རྟེན་དང་།།ལྟ་གནས་སྲིད་པའང་དེ་དག་ཡིན།།གཟུགས་ནི་དབང་པོ་ལྔ་དང་དོན།།ལྔ་དང་རྣམ་རིག་བྱེད་མིན་ཉིད།།དེ་དག་རྣམས་ཀྱི་རྣམ་ཤེས་རྟེན།།མིག་ལ་སོགས་གཟུགས་དྭང་བ་རྣམས།།གཟུགས་རྣམ་གཉིས་དང་རྣམ་ཉི་ཤུ།།སྒྲ་ནི་རྣམ་པ་བརྒྱད་ཡོད་དེ།།རོ་ནི་རྣམ་དྲུག་དྲི་རྣམ་བཞི།།རེག་བྱ་བཅུ་གཅིག་བདག་ཉིད་དོ།།

གཡེངས་དང་སེམས་མེད་པ་ཡི་ཡང་།།དགེ་དང་མི་དགེ་རྗེས་འབྲེལ་གང་།།འབྱུང་བ་ཆེ་རྣམས་རྒྱུར་བྱས་པ།།དེ་ནི་རྣམ་རིག་བྱེད་མིན་བརྗོད།།འབྱུང་བ་དག་ནི་ས་ཁམས་དང་།།ཆུ་དང་མེ་དང་རླུང་ཁམས་རྣམས།།འཛིན་པ་ལ་སོགས་ལས་སུ་གྲུབ།།སྲ་གཤེར་དྲོ་ཉིད་གཡོ་བ་རྣམས།།འཇིག་རྟེན་གྱི་ནི་ཐ་སྙད་དུ།།ཁ་དོག་དབྱིབས་ལ་ས་ཞེས་བརྗོད།།ཆུ་མེ་ཡང་ངོ་རླུང་ཚོགས་ཁམས།།ཉིད་ཡིན་དེ་དང་འདྲ་བའང་ཡིན།།དབང་དོན་དེ་དག་ཁོ་ན་ལ།།སྐྱེ་མཆེད་དང་ནི་ཁམས་བཅུར་འདོད།།ཚོར་བ་མྱོང་བའོ་འདུ་ཤེས་ནི།།མཚན་མར་འཛིན་པའི་བདག་ཉིད་དོ།།འདུ་བྱེད་ཕུང་པོ་བཞི་ལས་གཞན།།དེ་གསུམ་རྣམ་རིག་བྱེད་མིན་དང་།།འདུས་མ་བྱས་རྣམས་བཅས་པ་ནི།།ཆོས་ཀྱི་སྐྱེ་མཆེད་ཁམས་ཞེས་བྱ།།རྣམ་ཤེས་སོ་སོར་རྣམ་རིག་པ།།ཡིད་ཀྱི་སྐྱེ་མཆེད་ཀྱང་དེ་ཡིན།།ཁམས་བདུན་དག་ཏུའང་འདོད་པ་སྟེ།།རྣམ་པར་ཤེས་པ་དྲུག་དང་ཡིད།།དྲུག་པོ་འདས་མ་ཐག་པ་ཡི།།རྣམ་ཤེས་གང་ཡིན་དེ་ཡིད་དོ།།དྲུག་པའི་རྟེན་ནི་རབ་བསྒྲུབ་ཕྱིར།།ཁམས་ནི་བཅོ་བརྒྱད་དག་ཏུ་འདོད།།ཕུང་པོ་དང་ནི་སྐྱེ་མཆེད་དང་།ཁམས་གཅིག་གིས་ནི་ཐམས་ཅད་བསྡུས།།རང་གི་ངོ་བོ་ཉིད་ཀྱིས་ཏེ།གཞན་གྱི་དངོས་དང་མི་ལྡན་ཕྱིར།།མིག་ལ་སོགས་པ་གཉིས་མོད་ཀྱི།།རིགས་དང་སྤྱོད་ཡུལ་རྣམ་པར་ཤེས།།འདྲ་བའི་ཕྱིར་ན་ཁམས་གཅིག་ཉིད།།མཛེས་བྱའི་ཕྱིར་ན་གཉིས་བྱུང་ངོ་།།སྤུངས་དང་སྐྱེ་སྒོ་རིགས་ཀྱི་དོན།།ཕུང་པོ་སྐྱེ་མཆེད་ཁམས་རྣམས་ཡིན།།རྨོངས་དབང་འདོད་རྣམ་གསུམ་གྱི་ཕྱིར།ཕུང་པོ་ལ་སོགས་གསུམ་བསྟན་ཏོ།།རྩོད་པའི་རྩ་བར་གྱུར་པ་དང་།འཁོར་བའི་རྒྱུ་ཕྱིར་རིམ་རྒྱུའི་ཕྱིར།།སེམས་བྱུང་རྣམས་ལས་ཚོར་བ་དང་།།འདུ་ཤེས་ལོགས་ཤིག་ཕུང་པོར་བཞག།ཕུང་པོར་དག་ཏུ་འདུས་མ་བྱས།།དོན་དུ་མི་རུང་ཕྱིར་མ་བཤད།།རིམ་ནི་རགས་དང་ཀུན་ཉོན་མོངས།།སྣོད་སོགས་དོན་ཁམས་ཇི་བཞིན་ནོ།།ད་ལྟའི་དོན་ཕྱིར་དང་པོ་ལྔ།།འབྱུང་བ་ལས་གྱུར་དོན་ཕྱིར་བཞི།།གཞན་ནི་ཆེས་རིང་མྱུར་འཇུག་ཕྱིར།།ཡང་ན་ཇི་ལྟར་གནས་བཞིན་རིམ།།བྱེ་བྲག་དོན་དང་གཙོ་བོའི་ཕྱིར།།ཆོས་མང་བ་དང་མཆོག་བསྡུས་ཕྱིར།།གཅིག་ནི་གཟུགས་ཀྱི་སྐྱེ་མཆེད་དང་།།གཅིག་ནི་ཆོས་ཞེས་བྱ་བར་བརྗོད།།ཆོས་ཀྱི་ཕུང་པོ་བརྒྱད་ཁྲི་དག།གང་རྣམས་ཐུབ་པས་གསུངས་དེ་དག།ཚིག་གམ་མིང་ཡིན་དེ་དག་ནི།།གཟུགས་དང་འདུ་བྱེད་དག་ཏུ་འདུས།།ཁ་ཅིག་བསྟན་བཅོས་ཚད་ཅེས་ཟེར།།ཕུང་པོ་ལ་སོགས་གཏམ་རེ་ཡིན།།སྤྱོད་པ་རྣམས་ཀྱི་གཉེན་པོར་ནི།།ཆོས་ཀྱི་ཕུང་པོ་མཐུན་པར་གསུངས།།དེ་བཞིན་གཞན་ཡང་ཅི་རིགས་པར།།ཕུང་པོ་སྐྱེ་མཆེད་ཁམས་རྣམས་ནི།།རང་གི་མཚན་ཉིད་ལེགས་དཔྱད་དེ།།ཇི་སྐད་བཤད་པར་བསྡུ་བར་བྱ།།བུ་ག་ནམ་མཁའི་ཁམས་ཞེས་བྱ།།སྣང་དང་མུན་པ་དག་ཡིན་ལོ།།ཟག་དང་བཅས་པའི་རྣམ་ཤེས་ནི།།རྣམ་ཤེས་ཁམས་ཡིན་སྐྱེ་བའི་རྟེན།།བསྟན་ཡོད་འདིར་ནི་གཟུགས་གཅིག་པུ།།ཐོགས་དང་བཅས་པ་གཟུགས་ཅན་བཅུ།།ལུང་མ་བསྟན་བརྒྱད་དེ་དག་ཉིད།།གཟུགས་སྒྲ་མ་གཏོགས་གཞན་རྣམ་གསུམ།།འདོད་ཁམས་གཏོགས་པ་ཐམས་ཅད་དོ།།གཟུགས་ཀྱི་ཁམས་ན་བཅུ་བཞིའོ།།དྲི་དང་རོ་དང་སྣ་དང་ནི།།ལྕེ་ཡི་རྣམ་ཤེས་ཁམས་མ་གཏོགས།།གཟུགས་མེད་གཏོགས་པ་ཡིད་དང་ནི།།ཆོས་དང་ཡིད་ཀྱི་རྣམ་ཤེས་ཁམས།།དེ་གསུམ་ཟག་བཅས་ཟག་པ་མེད།།ལྷག་མ་རྣམས་ནི་ཟག་བཅས་སོ།།རྟོག་དང་དཔྱོད་དང་བཅས་པ་ནི།།རྣམ་པར་ཤེས་པའི་ཁམས་ལྔ་ཡིན།།ཐ་མ་གསུམ་ནི་རྣམ་གསུམ་མོ།།ལྷག་མ་རྣམས་ནི་གཉིས་ཀ་སྤངས།།ངེས་པར་རྟོག་དང་རྗེས་དྲན་པའི།།རྣམ་པར་རྟོག་པས་རྣམ་མི་རྟོག།དེ་དག་ཡིད་ཀྱི་ཤེས་རབ་གཡེང་།།ཡིད་ཀྱི་དྲན་པ་ཐམས་ཅད་ཉིད།།དམིགས་བཅས་སེམས་ཀྱི་ཁམས་བདུན་ནོ།།ཆོས་ཀྱི་ཕྱེད་ཀྱང་མ་ཟིན་དགུ།།བརྒྱད་པོ་དེ་དག་རྣམས་དང་སྒྲ།།དགུ་པོ་གཞན་ནི་རྣམ་པ་གཉིས།།རེག་བྱ་རྣམ་པ་གཉིས་ཡིན་ཏེ།།ལྷག་མ་གཟུགས་ཅན་དགུ་པོ་ནི།།འབྱུང་གྱུར་ཆོས་ཁམས་ཕྱོགས་གཅིག་ཀྱང་།།གཟུགས་ཅན་བཅུ་ནི་བསགས་པའོ།།གཅོད་བྱེད་གཅད་པར་བྱ་བ་ཉིད།།ཕྱི་རོལ་གྱི་ནི་ཁམས་བཞི་ཡིན།།དེ་བཞིན་བསྲེག་བྱ་འཇལ་བྱེད་པའོ།།སྲེག་དང་གཞལ་ལ་མི་མཐུན་སྨྲ།།རྣམ་པར་སྨིན་ལས་བྱུང་བ་དང་།།རྒྱས་ལས་བྱུང་བ་ནང་གི་ལྔ།།སྒྲ་ནི་རྣམ་སྨིན་ལས་སྐྱེས་མིན།།རྒྱུ་མཐུན་ལས་བྱུང་རྣམ་སྨིན་སྐྱེས།།ཐོགས་པ་མེད་བརྒྱད་གཞན་རྣམ་གསུམ།།རྫས་དང་ལྡན་གཅིག་ཐ་མ་གསུམ།།སྐད་ཅིག་མ་སྟེ་མིག་དང་ནི།།རྣམ་ཤེས་ཁམས་དག་སོ་སོ་དང་།།ལྷན་ཅིག་ཏུ་ཡང་ཐོབ་པ་ཡོད།།ནང་གི་བཅུ་གཉིས་གཟུགས་ལ་སོགས།།མ་གཏོགས་ཆོས་ཞེས་བྱ་བ་ནི།།བརྟེན་པ་དང་བཅས་ལྷག་མ་ནི།།དེ་དང་མཚུངས་པ་དག་ཀྱང་ཡིན།།གང་ཞིག་རང་གི་ལས་མི་བྱེད།།བཅུ་ནི་སྒོམ་པས་སྤང་བྱ་ཡིན།།ལྔ་ཡང་ཐ་མ་གསུམ་རྣམ་གསུམ།།ཉོན་མོངས་ཅན་མིན་མཐོང་སྤང་མིན།།གཟུགས་མིན་དྲུག་པ་མིན་སྐྱེས་མིན།།མིག་དང་ཆོས་ཀྱི་ཁམས་ཕྱོགས་ནི།།ལྟ་བ་ཡིན་ཏེ་རྣམ་པ་བརྒྱད།།རྣམ་ཤེས་ལྔ་དང་མཚུངས་སྐྱེས་བློ།།ངེས་རྟོག་མེད་ཕྱིར་ལྟ་མ་ཡིན།།མིག་གིས་གཟུགས་རྣམས་མཐོང་རྟེན་བཅས།།དེ་ལ་བརྟེན་པའི་རྣམ་ཤེས་མིན།།གང་ཕྱིར་བར་དུ་ཆོད་པ་ཡི།།གཟུགས་ནི་མཐོང་བ་མིན་ཕྱིར་ལོ།།མིག་ནི་གཉིས་ཀ་དག་གིས་ཀྱང་།།མཐོང་སྟེ་གསལ་བར་མཐོང་ཕྱིར་རོ།།མིག་དང་ཡིད་དང་རྣ་བ་ནི།།ཡུལ་དང་མ་ཕྲད་གསུམ་གཞན་དུ།།སྣ་ལ་སོགས་པ་གསུམ་གྱིས་ནི།།ཡུལ་ནི་མཉམ་པ་འཛིན་པར་འདོད།།ཐ་མའི་རྟེན་འདས་ལྔ་རྣམས་ཀྱི།།དེ་དང་ལྷན་ཅིག་སྐྱེས་པའང་ཡིན།།དེ་དག་གྱུར་པས་འགྱུར་ཉིད་ཕྱིར།།རྟེན་ནི་མིག་ལ་སོགས་པ་ཡིན།།དེ་ཕྱིར་ཐུན་མོང་མ་ཡིན་ཕྱིར།།དེ་དག་གིས་ནི་རྣམ་ཤེས་བསྟན།།ལུས་ལ་འོག་མའི་མིག་མ་ཡིན།།མིག་གིས་གོང་མའི་གཟུགས་མ་ཡིན།།རྣམ་པར་ཤེས་པའང་དེ་ཡི་གཟུགས།།ལུས་ཀྱིའང་གཉིས་ཀ་ཐམས་ཅད་དུ།།རྣ་བའང་དེ་བཞིན་གསུམ་དག་ནི།།ཐམས་ཅད་རང་གི་ས་པ་ཉིད།།ལུས་ཀྱི་རྣམ་ཤེས་འོག་དང་ནི།།རང་གི་ས་ཡིད་མ་ངེས་ཏེ།།གཉིས་ཀྱིས་རྣམ་ཤེས་ཕྱི་ཡི་ལྔ།།འདུས་མ་བྱས་ཆོས་རྟག་པའོ།།ཆོས་ཀྱི་ཕྱེད་དང་གང་དག་ནི།།བཅུ་གཉིས་ནང་གིར་བཤད་དབང་པོ།།ཆོས་མངོན་པའི་མཛོད་ཀྱི་ཚིག་ལེའུར་བྱས་པ་ལས་ཁམས་བསྟན་པ་ཞེས་བྱ་བ་སྟེ་གནས་དང་པོའོ།།།། གནས་གཉིས་པ་དབང་པོ་བསྟན་པ། ༈ལྔ་པོ་རྣམས་ནི་དོན་བཞི་ལ།།དབང་བྱེད་བཞི་རྣམས་གཉིས་ལ་ལོ།།ལྔ་དང་བརྒྱད་པོ་དེ་རྣམས་ནི།།ཀུན་ནས་ཉོན་མོངས་རྣམ་བྱང་ལ།།རང་གི་དོན་དང་ཐམས་ཅད་ལ།།དམིགས་པར་དབང་བྱེད་ཕྱིར་དབང་དྲུག།མོ་ཉིད་ཕོ་ཉིད་ལ་དབང་ཕྱིར།།ལུས་ལས་མོ་དང་ཕོ་དབང་དག།རིས་གནས་ཀུན་ནས་ཉོན་མོངས་དང་།།རྣམ་པར་བྱང་ལ་དབང་བྱེད་ཕྱིར།།སྲོག་དང་ཚོར་བ་རྣམས་དང་ནི།།དད་སོགས་དབང་པོ་ལྔར་འདོད་དོ།།མྱ་ངན་འདས་སོགས་གོང་ནས་གོང་།།ཐོབ་པ་ལ་ནི་དབང་བྱེད་ཕྱིར།།ཀུན་ཤེས་བྱེད་དང་ཀུན་ཤེས་དང་།།དེ་བཞིན་ཀུན་ཤེས་ལྡན་དབང་པོ།།སེམས་ཀྱི་རྟེན་དང་དེའི་བྱེ་བྲག།གནས་དང་ཀུན་ནས་ཉོན་མོངས་ཉིད།།ཚོགས་དང་རྣམ་བྱང་ཇི་སྙེད་པ།།དབང་པོ་དག་ཀྱང་དེ་སྙེད་དུ།།ཡང་ན་འཇུག་པའི་རྟེན་དང་ནི།།སྐྱེ་དང་གནས་དང་ཉེར་སྤྱོད་ལས།།བཅུ་བཞི་དེ་བཞིན་ལྡོག་པ་ལ།།དབང་པོ་རྣམས་ནི་གཞན་ཡིན་ནོ།།ལུས་ཚོར་སིམ་པ་མ་ཡིན་གང་།།སྡུག་བསྔལ་དབང་པོའོ་སིམ་པ་ནི།།བདེ་བའོ་བསམ་གཏན་གསུམ་པ་ན།།སེམས་ཀྱི་དེ་ནི་བདེ་དབང་པོ།།གཞན་ན་དེ་ཡིད་བདེ་བ་ཡིན།།སེམས་ཀྱི་སིམ་པ་མ་ཡིན་པ།།ཡིད་མི་བདེ་བའོ་བཏང་སྙོམས་ནི།།བར་མའོ་གཉིས་ཀའི་མི་རྟོག་ཕྱིར།།མཐོང་སྒོམ་མི་སློབ་ལམ་ལ་དགུ།།གསུམ་ཡིན་གསུམ་ནི་དྲི་མ་མེད།།གཟུགས་ཅན་སྲོག་དང་སྡུག་བསྔལ་དག།ཟག་དང་བཅས་པ་དགུ་རྣམ་གཉིས།།སྲོག་ནི་རྣམ་སྨིན་བཅུ་གཉིས་གཉིས།།ཐ་མ་བརྒྱད་དང་ཡིད་མི་བདེ།།མ་གཏོགས་པ་སྟེ་དེ་གཅིག་ནི།།རྣམ་པར་སྨིན་བཅས་བཅུ་རྣམ་གཉིས།།ཡིད་དང་ཚོར་གཞན་དད་ལ་སོགས།།དགེ་བ་བརྒྱད་ཡིད་མི་བདེ་བ།།རྣམ་གཉིས་ཡིད་དང་ཚོར་གཞན་ནི།།རྣམ་གསུམ་གཞན་ནི་རྣམ་པ་གཅིག།དྲི་མེད་མ་གཏོགས་འདོད་པར་གཏོགས།།ཕོ་མོའི་དབང་དང་སྡུག་བསྔལ་དང་།།མ་གཏོགས་གཟུགས་གཏོགས་གཟུགས་ཅན་དང་།།བདེ་བའང་མ་གཏོགས་གཟུགས་མེད་གཏོགས།།ཡིད་དང་ཚོར་བ་གསུམ་རྣམ་གསུམ།།གཉིས་ཀྱིས་སྤང་བྱ་ཡིད་མི་བདེ།།དགུ་ནི་སྒོམ་པས་ལྔ་པོ་ནི།།སྤང་བར་བྱ་མིན་ཡང་གསུམ་མིན།།འདོད་པར་དང་པོར་རྣམ་སྨིན་གཉིས།།རྙེད་དེ་བརྫུས་ཏེ་སྐྱེ་བས་མིན།།དེ་ཡིས་དྲུག་གམ་བདུན་ནམ་བརྒྱད།།གཟུགས་ན་དྲུག་གོ་གོང་མར་གཅིག།གཟུགས་མེད་དག་ཏུ་འཆིབ་ནི།།སྲོག་དང་ཡིད་དང་བཏང་སྙོམས་ཉིད།།འགག་པར་འགྱུར་རོ་གཟུགས་ན་བརྒྱད།།འདོད་པར་བཅུ་འམ་དགུ་འམ་བརྒྱད།།རིམ་གྱིས་འཆི་བ་དག་ལ་བཞི།།དགེ་ལ་ཐམས་ཅད་དག་ཏུ་ལྔ།།འབྲས་བུ་ཐ་མ་གཉིས་དགུས་འཐོབ།།གཉིས་ནི་བདུན་དང་བརྒྱད་དང་དགུས།།བཅུ་གཅིག་དག་གིས་དགྲ་བཅོམ་ཉིད།།འགའ་ཞིག་སྲིད་ཕྱིར་བཤད་པ་ཡིན།།བཏང་སྙོམས་དང་ནི་སྲོག་དང་ནི།།ཡིད་དང་ལྡན་ལ་ངེས་གསུམ་ལྡན།།བདེ་ལུས་ལྡན་ལ་བཞི་དག་དང་།།མིག་སོགས་ལྡན་ལ་ལྔ་དང་ལྡན།།ཡིད་བདེ་ལྡན་ཡང་སྡུག་བསྔལ་ལྡན།།བདུན་དང་མོ་ཡི་དབང་སོགས་ལྡན།།བརྒྱད་དང་ཀུན་ཤེས་ལྡན་པ་ཡི།།དབང་པོ་ལྡན་ལ་བཅུ་གཅིག་ལྡན།།ཀུན་ཤེས་བྱེད་པའི་དབང་ལྡན་ལ།།བཅུ་གསུམ་དག་དང་ལྡན་པ་ཡིན།།དགེ་མེད་ནང་ན་ཉུང་ལྡན་པ།།ལུས་ཚོར་སྲོག་ཡིད་བརྒྱད་དང་ལྡན།།གཟུགས་མེད་བྱིས་པའང་དེ་བཞིན་ཏེ།།བཏང་སྙོམས་སྲོག་ཡིད་དགེ་རྣམས་དང་།།མང་པོར་ལྡན་ལ་བཅུ་དགུ་སྟེ།།དྲི་མ་མེད་རྣམས་མ་གཏོགས་སོ།།མཚན་གཉིས།།འཕགས་པ་ཆགས་བཅས་ཏེ།།མཚན་གཅིག་དྲི་མེད་གཉིས་མ་གཏོགས།།འདོད་ན་དབང་པོ་མེད་པ་དང་།།སྒྲ་མེད་ཕྲ་རབ་རྡུལ་རྫས་བརྒྱད།།ལུས་དབང་ལྡན་ལ་རྫས་དགུ་སྟེ།།དབང་པོ་གཞན་ལྡན་རྫས་བཅུའོ།།སེམས་དང་སེམས་བྱུང་ངེས་ལྷན་ཅིག།ཐམས་ཅད་འདུས་བྱས་མཚན་ཉིད་དང་།།ཐོབ་པའམ་སེམས་བྱུང་རྣམ་ལྔ་སྟེ།།ས་མང་ལ་སོགས་ཐ་དད་ཕྱིར།།ཚོར་དང་སེམས་པ་འདུ་ཤེས་དང་།འདུན་དང་རེག་པར་བློ་གྲོས་དྲན།།ཡིད་ལ་བྱེད་དང་མོས་པ་དང་།།ཏིང་ངེ་འཛིན་སེམས་ཐམས་ཅད་ལ།།དད་དང་བག་ཡོད་ཤིན་ཏུ་སྦྱངས།།བཏང་སྙོམས་ངོ་ཚ་ཤེས་ཁྲེལ་ཡོད།།རྩ་བ་གཉིས་རྣམ་མི་འཚེ་དང་།།བརྩོན་འགྲུས་རྟག་ཏུ་དགེ་ལ་འབྱུང་།།རྨོངས་དང་བག་མེད་ལེ་ལོ་དང་།།མ་དད་པ་དང་རྨུགས་དང་རྒོད།།ཉོན་མོངས་ཅན་ལ་རྟག་ཏུ་འབྱུང་།།མི་དགེ་ལ་ནི་ཁྲེལ་མེད་དང་།།ངོ་ཚ་མེད་པའོ།།ཁྲོ་བ་དང་།།འཁོན་དུ་འཛིན་དང་གཡོ་དང་ནི།།ཕྲག་དོག་འཚིག་འཆབ་སེར་སྣ་དང་།།སྒྱུ་དང་རྒྱགས་དང་རྣམ་འཚེ་ནི།།ཉོན་མོངས་ཆུང་ངུའི་ས་པ་རྣམས།།འདོད་པའི་དགེ་བའི་སེམས་ལ་ནི།།རྟོག་དང་དཔྱོད་དང་བཅས་པའི་ཕྱིར།།སེམས་ལས་བྱུང་བ་ཉི་ཤུ་གཉིས།།ལ་ལ་དག་ཏུ་འགྱོད་པ་བསྣན།།མི་དགེ་ལ་ནི་མ་འདྲེས་དང་།།ལྟ་དང་ལྡན་ལའང་ཉི་ཤུ་འབྱུང་།།ཉོན་མོངས་བཞི་དང་ཁྲོ་སོགས་དང་།།འགྱོད་པ་དང་ནི་ཉི་ཤུ་གཅིག།བསྒྲིབས་ལ་བཅོ་བརྒྱད།།ལུང་མ་བསྟན།།གཞན་ལ་བཅུ་གཉིས་དག་ཏུ་འདོད།།གཉིད་ནི་ཀུན་ལ་མི་འགལ་ཕྱིར།།གང་ལ་ཡོད་པ་དེ་བསྣན་ནོ།།དེ་ལས་འགྱོད་གཉིད་མི་དགེ་རྣམས།།བསམ་གཏན་དང་པོ་དག་ན་མེད།།རྟོག་པའང་བསམ་གཏན་ཁྱད་པར་ཅན།།དེ་ཡི་གོང་ན་དཔྱོད་པ་ཡང་།།མ་གུས་ངོ་ཚ་མེད་ཁྲེལ་མེད།ཁ་ན་མ་ཐོ་འཇིགས་མི་ལྟ།།དགའ་དང་གུས་ཉིད་ངོ་ཚ་ཤེས།།དེ་གཉིས་འདོད་དང་གཟུགས་དག་ན།།རྟོག་དང་དཔྱོད་པ་རྩིང་ཞིབ་ཉིད།།ང་རྒྱལ་ཁེངས་པ་རྒྱགས་པ་ནི།།རང་གི་ཆོས་ལ་ཆགས་པ་ཡི།།སེམས་ནི་ཡོངས་སུ་གཏུགས་པའོ།།སེམས་དང་ཡིད་དང་རྣམ་ཤེས་ནི།།དོན་གཅིག་སེམས་དང་སེམས་བྱུང་དང་།།རྟེན་དང་དམིགས་དང་རྣམ་བཅས་དང་།།མཚུངས་པར་ལྡན་པའང་རྣམ་པ་ལྔ།།མི་ལྡན་པ་ཡི་འདུ་བྱེད་རྣམས།།ཐོབ་དང་མ་ཐོབ་སྐལ་མཉམ་དང་།།འདུ་ཤེས་མེད་སྙོམས་འཇུག་དག་དང་།།སྲོག་དང་མཚན་ཉིད་རྣམས་དང་ནི།།མིང་གི་ཚོགས་ལ་སོགས་པ་ཡང་།།ཐོབ་པ་རྙེད་དང་ལྡན་པའོ།།ཐོབ་དང་མ་ཐོབ་རང་རྒྱུད་དུ།གཏོགས་པ་རྣམས་ཀྱིའོ་འགོག་གཉིས་ཀྱི།།དུས་གསུམ་པ་ཡི་རྣམ་པ་གསུམ།།དགེ་ལ་སོགས་ཀྱི་དགེ་ལ་སོགས།།དེར་གཏོགས་རྣམས་ཀྱི་རང་ཁམས་པ།།མ་གཏོགས་རྣམས་ཀྱི་རྣམ་པ་བཞི།།སློབ་དང་མི་སློབ་མིན་གྱི་གསུམ།།སྤང་བྱ་མིན་པའི་རྣམ་གཉིས་འདོད།།ལུང་བསྟན་མིན་ཐོབ་ལྷན་ཅིག་སྐྱེ།།མངོན་ཤེས་སྤྲུལ་པ་མ་གཏོགས་པ།།བསྒྲིབས་པའི་གཟུགས་ཀྱིའང་།།འདོད་པ་ན་གཟུགས་ཀྱི་སྔར་ནི་སྐྱེ་བ་མེད།།མ་ཐོབ་མ་བསྒྲིབས་ལུང་མ་བསྟན།།འདས་མ་སྐྱེས་ཀྱི་དེ་རྣམ་གསུམ།།འདོད་སོགས་གཏོགས་དང་དྲི་མེད་ཀྱིའང་།།ལམ་མ་ཐོབ་པ་སོ་སོ་ཡི།།སྐྱེ་བོར་འདོད་དོ་དེ་ཐོབ་དང་།།ས་འཕོས་ནས་ནི་རྣམ་ཉམས་འགྱུར།།སྐལ་མཉམ་སེམས་ཅན་འདྲ་བའོ།།འདུ་ཤེས་མེད་པ་པ་འདུ་ཤེས།།མེད་པར་སེམས་དང་སེམས་བྱུང་རྣམས།།འགོག་པའོ་རྣམ་སྨིན་དེ་འབྲས་ཆེ།།དེ་བཞིན་འདུ་ཤེས་མེད་སྙོམས་འཇུག།བསམ་གཏན་ཐ་མར་འབྱུང་འདོད་པས།།དགེ་བའོ་སྐྱེས་ནས་མྱོང་འགྱུར་ཉིད།།འཕགས་པའི་མ་ཡིན་དུས་གཅིག་འཐོབ།།་འགོག་པ་ཞེས་པའང་དེ་བཞིན་ཉིད།།འདི་གནས་དོན་དུ་སྲིད་རྩེ་སྐྱེ།།དགེ་བའོ་གཉིས་སུ་མྱོང་འགྱུར་དང་།།མ་ངེས་འཕགས་པའི་སྦྱོར་བས་འཐོབ།།ཐུབ་པའི་བྱང་ཆུབ་ཀྱིས་ཐོབ་བྱ།།དང་པོར་མ་ཡིན་སྐད་ཅིག་མ།།སུམ་ཅུ་རྩ་བཞིས་ཐོབ་ཕྱིར་རོ།།གཉིས་ཀ་འདོད་དང་གཟུགས་རྟེན་ཅན།།འགོག་པ་དང་པོར་མིའི་ནང་དུ།།སྲོག་ནི་ཚེ་ཡིན་དྲོད་དང་ནི།།རྣམ་ཤེས་རྟེན་གང་ཡིན་པའོ།།མཚན་ཉིད་དག་ནི་སྐྱེ་བ་དང་།།རྒ་དང་གནས་དང་མི་རྟག་ཉིད།།དེ་དག་སྐྱེ་བའི་སྐྱེ་ལ་སོགས།།དེ་ཆོས་བརྒྱད་དང་གཅིག་ལ་འཇུག།རྒྱུ་དང་རྐྱེན་དག་མེད་པར་ནི།།སྐྱེ་བས་བསྐྱེད་བྱ་སྐྱེད་བྱེད་མིན།།མིང་གི་ཚོགས་ལ་སོགས་པ་ནི།།མིང་དང་ངག་དང་ཡི་གེའི་ཚོགས།།འདོད་དང་གཟུགས་གཏོགས་སེམས་ཅན་སྟོན།།རྒྱུ་མཐུན་ལུང་བསྟན་མིན་དེ་བཞིན།།སྐལ་མཉམ་རྣམ་པར་སྨིན་པའང་ཡིན།།ཁམས་གསུམ་པ་སྟེ་ཐོབ་རྣམ་གཉིས།།མཚན་ཉིད་རྣམས་ཀྱང་སྙོམས་འཇུག་དང་།།མི་ལྡན་པ་དག་རྒྱུ་མཐུན་པ།།བྱེད་རྒྱུ་ལྷན་ཅིག་འབྱུང་བ་དང་།སྐལ་མཉམ་མཚུངས་པར་ལྡན་པ་དང་།།ཀུན་ཏུ་འགྲོ་དང་རྣམ་སྨིན་དང་།།རྒྱུ་ནི་རྣམ་པ་དྲུག་ཏུ་འདོད།།རང་ལས་གཞན་པ་བྱེད་རྒྱུའི་རྒྱུ།།ལྷན་ཅིག་འབྱུང་གང་ཕན་ཚུན་འབྲས།།འབྱུང་བཞིན་སེམས་ཀྱི་རྗེས་འཇུག་དང་།།སེམས་དང་མཚན་ཉིད་མཚན་གཞི་བཞིན།།སེམས་ལས་བྱུང་དང་སྡོམ་གཉིས་དང་།།སེམས་དང་དེ་དག་གི་མཚན་ཉིད།།སེམས་ཀྱི་རྗེས་འཇུག་དུས་དང་ནི།།འབྲས་སོགས་དགེ་ལ་སོགས་པས་སོ།།སྐལ་མཉམ་རྒྱུ་ནི་འདྲ་བའོ།།རང་རིས་ས་པའོ་སྔར་སྐྱེས་རྣམས།།ས་དགུའི་ལམ་ནི་ཕན་ཚུན་དུ།།མཉམ་དང་ཁྱད་པར་ཅན་གྱི་ཡིན།།སྦྱོར་བྱུང་དེ་གཉིས་ཁོ་ནའི་ཡིན།།ཐོས་དང་བསམ་བྱུང་ལ་སོགས་པ།།མཚུངས་ལྡན་རྒྱུ་ནི་སེམས་དག་དང་།།སེམས་བྱུང་རྟེན་མཚུངས་ཅན་རྣམས་སོ།།ཀུན་འགྲོ་ཞེས་བྱ་ཉོན་མོངས་ཅན།།རྣམས་ཀྱི་རང་ས་ཀུན་འགྲོ་ལྔ།།རྣམ་སྨིན་རྒྱུ་ནི་མི་དགེ་དང་།།དགེ་བ་ཟག་བཅས་རྣམས་ཁོ་ན།།ཀུན་འགྲོ་སྐལ་མཉམ་དུས་གཉིས་པ།།གསུམ་པོ་དག་ནི་དུས་གསུམ་པ།།འདུས་བྱས་བྲལ་བཅས་འབྲས་བུ་ཡིན།།འདུས་མ་བྱས་ལ་དེ་དག་མེད།།རྣམ་སྨིན་འབྲས་བུ་ཐ་མའི་ཡིན།།བདག་པོའི་འབྲས་བུ་དང་པོའི་ཡིན།།རྒྱུ་མཐུན་སྐལ་མཉམ་ཀུན་འགྲོ་བའི།།སྐྱེས་བུ་པ་ནི་གཉིས་ཀྱི་ཡིན།།རྣམ་སྨིན་ལུང་དུ་མ་བསྟན་ཆོས།།སེམས་ཅན་བརྗོད་ལུང་བསྟན་ཕྱིས་འབྱུང་།།རྒྱུ་མཐུན་རྒྱུ་དང་འདྲ་བའོ།།བྲལ་བ་བློ་ཡིས་ཟད་པའོ།།གང་གི་སྟོབས་ཀྱིས་གང་སྐྱེས་པའི།།འབྲས་དེ་སྐྱེས་བུ་བྱེད་ལས་སྐྱེས།།སྔོན་བྱུང་མ་ཡིན་འདུས་བྱས་ནི།།འདུས་བྱས་ཁོ་ནའི་བདག་པོའི་འབྲས།།ལྔ་པོ་ད་ལྟར་འབྲས་བུ་འཛིན།།གཉིས་ནི་རབ་ཏུ་འབྱིན་པར་བྱེད།།ད་ལྟར་གྱི་དང་འདས་པ་དག།གཅིག་ནི་འདས་པས་འབྱིན་པར་འགྱུར།།ཉོན་མོངས་ཅན་དང་རྣམ་སྨིན་སྐྱེས།།ལྷག་དང་དང་པོ་འཕགས་རིམ་བཞིན།།རྣམ་སྨིན་ཀུན་འགྲོ་དེ་གཉིས་དང་།།སྐལ་མཉམ་མ་གཏོགས་ལྷག་ལས་སྐྱེ།།སེམས་དང་སེམས་ལས་བྱུང་བ་ཡིན།།མཚུངས་ལྡན་མ་གཏོགས་གཞན་དེ་བཞིན།།རྐྱེན་ནི་བཞི་པོ་དག་ཏུ་གསུངས།།རྒྱུ་ཞེས་བྱ་བ་རྒྱུ་ལྔ་ཡིན།།སེམས་དང་སེམས་བྱུང་སྐྱེས་པ་རྣམས།།ཐ་མ་མིན་མཚུངས་དེ་མ་ཐག།དམིགས་པ་ཆོས་རྣམས་ཐམས་ཅད་དོ།།བྱེད་རྒྱུ་ཞེས་བྱ་བདག་པོར་བཤད།།རྒྱུ་གཉིས་པོ་དག་འགག་པ་ལ།།བྱ་བ་བྱེད་དོ་གསུམ་པོ་ནི།།སྐྱེ་ལའོ་དེ་ལས་གཞན་པ་ཡི།།རྐྱེན་དག་དེ་ལས་ཟློག་པ་ཡིན།།བཞི་ཡིས་སེམས་དང་སེམས་བྱུང་རྣམས།།གསུམ་གྱིས་སྙོམས་པར་འཇུག་པ་གཉིས།།གཞན་ནི་གཉིས་པོ་དག་ལས་སྐྱེ།།དབང་ཕྱུག་སོགས་མིན་རིམ་སོགས་ཕྱིར།།དེའི་རྒྱུ་འབྱུང་བ་རྣམ་པ་གཉིས།།འབྱུང་ལས་གྱུར་པའི་རྣམ་པ་ལྔ།།འབྱུང་གྱུར་རྣམ་གསུམ་ཕན་ཚུན་དུ།།འབྱུང་བ་རྣམས་ཀྱི་དེ་རྣམ་གཅིག།འདོད་ཡིད་དགེ་དང་མི་དགེ་དང་།།བསྒྲིབས་པ་དང་ནི་མ་བསྒྲིབས་པ།།གཟུགས་དང་གཟུགས་མེད་པ་དག་ན།།མི་དགེ་ལས་གཞན་ཟག་མེད་གཉིས།།འདོད་སེམས་དགེ་བ་ལ་སེམས་དགུ།།དེ་ནི་བརྒྱད་པོ་ཁོ་ན་ལས།།མི་དགེ་བ་ནི་བཅུ་དག་ལས།།དེ་ལས་བཞི་སྟེ་བསྒྲིབས་དེ་བཞིན།།མ་བསྒྲིབས་པ་ནི་ལྔ་དག་ལས།།དེ་ལས་མཇུག་ཐོགས་སེམས་བདུན་ནོ།།གཟུགས་ན་དགེ་ལས་བཅུ་གཅིག་གོ།དེ་ནི་དགུ་ཡི་མཇུག་ཐོགས་སུ།།བསྒྲིབས་པ་བརྒྱད་ལས་དེ་ལས་དྲུག།མ་བསྒྲིབས་པ་ནི་གསུམ་ལས་སོ།།དེ་ལས་དྲུག་སྟེ་གཟུགས་མེད་པའང་།།དེ་ཡི་ཚུལ་ལོ་དགེ་བ་ལས།།སེམས་དགུ་དག་གོ་དེ་དྲུག་གི།བསྒྲིབས་པ་ལས་བདུན་དེ་དེ་བཞིན།།སློབ་པ་བཞི་ལས་དེ་ལས་ལྔ།།མི་སློབ་པ་ནི་ལྔ་དག་ལས།།དེ་ལས་སེམས་ནི་བཞི་དག་གོ།བཅུ་གཉིས་དེ་དག་ཉི་ཤུར་ཡང་།།གསུམ་དུ་སྐྱེས་ནས་ཐོབ་པ་དང་།།སྦྱོར་བྱུང་དགེ་རྣམ་གཉིས་ཕྱེ་ནས།།རྣམ་སྨིན་སྐྱེས་དང་སྤྱོད་ལམ་པ།།བཟོ་ཡི་གནས་དང་སྤྲུལ་པ་དང་།།འདོད་ན་ལུང་བསྟན་མིན་རྣམ་བཞིར།།གཟུགས་ན་བཟོ་མ་གཏོགས་པའོ།།ཁམས་གསུམ་པ་ཡི་ཉོན་མོངས་ཅན།།དྲུག་དང་དྲུག་དང་གཉིས་རྙེད་དོ།།གཟུགས་སྐྱེས་དགེ་ལ་གསུམ་དག་གོ།སློབ་པ་ལ་བཞི་ལྷག་ལ་དེ།།ཆོས་མངོན་པའི་མཛོད་ཀྱི་ཚིག་ལེའུར་བྱས་པ་ལས་དབང་པོ་བསྟན་པ་ཞེས་བྱ་བ་སྟེ་གནས་གཉིས་པའོ།།།། གནས་གསུམ་པ་འཇིག་རྟེན་བསྟན་པ། ༈དམྱལ་བ་ཡི་དྭགས་དུད་འགྲོ་དང་།།མི་རྣམས་དང་ནི་ལྷ་དྲུག་དག།འདོད་པའི་ཁམས་ཡིན་དམྱལ་བ་དང་།།གླིང་དབྱེ་བ་ལས་དེ་ཉི་ཤུ།།གོང་མའི་གནས་དག་བཅུ་བདུན་ནི།།གཟུགས་ཁམས་ཡིན་དེར་སོ་སོ་ཡི།།བསམ་གཏན་ས་ནི་གསུམ་པ་ཡིན།།བཞི་པ་ས་ནི་བརྒྱད་པ་ཡིན།།གཟུགས་མེད་ཁམས་ན་གནས་མེད་དོ།།སྐྱེ་བ་ལས་ནི་རྣམ་པ་བཞི།།དེར་ནི་རིས་དང་སྲོག་ལ་ཡང་།།སེམས་ཀྱི་རྒྱུད་ནི་བརྟེན་པ་ཡིན།།དེར་ནི་དམྱལ་སོགས་འགྲོ་བ་ལྔ།།རང་གི་མིང་གིས་བསྟན་དེ་དག།ཉོན་མོངས་ཅན་མིན་ལུང་བསྟན་མིན།།སེམས་ཅན་ཞེས་བྱ་བར་སྲིད་མིན།།ལུས་དང་འདུ་ཤེས་ཐ་དད་དང་།།ལུས་ཐ་དད་ཅིང་འདུ་ཤེས་གཅིག།བཟློག་དང་ལུས་དང་འདུ་ཤེས་གཅིག།གཟུགས་ཅན་མ་ཡིན་གསུམ་པོ་དག།རྣམ་ཤེས་གནས་པ་བདུན་ལྷག་མ།།དེ་འཇོམས་བྱེད་ལྡན་སྲིད་རྩེ་དང་།།འདུ་ཤེས་མེད་པའི་སེམས་ཅན་རྣམས།།སེམས་ཅན་གྱི་ནི་གནས་དགུར་བཤད།།མི་འདོད་བཞིན་གནས་ཕྱིར་གཞན་མིན།།གནས་པ་དག་ནི་ཡང་བཞི་སྟེ།།ཟག་དང་བཅས་པའི་ཕུང་པོ་བཞི།།རང་གི་ས་པ་ཉིད་རྣམ་ཤེས།།འབའ་ཞིག་གནས་པར་མ་བཤད་དོ།།བསྡུ་ན་མུ་ནི་བཞི་ཡིན་ནོ།།དེར་ནི་སྒོ་ང་ལས་སྐྱེས་སོགས།།སེམས་ཅན་སྐྱེ་གནས་བཞི་དག་ཏུ།།མི་དང་དུད་འགྲོ་རྣམ་པ་བཞི།།དམྱལ་བ་རྣམས་དང་ལྷ་རྣམས་དང་།།སྲིད་པ་བར་མ་བརྫུས་ཏེ་སྐྱེ།།ཡི་དྭགས་མངལ་ནས་སྐྱེ་བའང་ཡིན།།འདིར་གང་འཆི་དང་སྐྱེ་བ་ཡི།།སྲིད་པའི་བར་དུ་འབྱུང་བའོ།།བགྲོད་པའི་ཡུལ་དུ་མ་ཕྱིན་ཕྱིར།།སྲིད་པ་བར་མ་བྱུང་བ་མིན།།འབྲུ་ཡི་རྒྱུན་དང་ཆོས་མཐུན་ཕྱིར།།སྲིད་པ་ཆད་ལས་འབྱུང་བ་མིན།།གཟུགས་བརྙན་མ་གྲུབ་ཕྱིར་བ་དང་།།མི་འདྲའི་ཕྱིར་ན་དཔེ་མ་ཡིན།།གཅིག་ན་ལྷན་ཅིག་གཉིས་མེད་ཕྱིར།།རྒྱུན་མིན་ཕྱིར་གཉིས་ལས་བྱུང་ཕྱིར།།མགུར་ནས་གསུངས་ཕྱིར་ཡོད་དྲི་ཟ།།ལྔར་གསུངས་འགྲོ་མདོ་ལས་ཀྱང་གྲུབ།།དེ་ནི་འཕེན་པ་གཅིག་པའི་ཕྱིར།སྔུན་དུས་སྲིད་འབྱུང་ཤ་ཚུགས་ཅན།།དེ་ནི་འཆི་བའི་སྔོན་རོལ་ཏེ།།སྐྱེ་བའི་སྐད་ཅིག་ཕན་ཆད་དོ།།རིགས་མཐུན་ལྷ་མིག་དག་པས་མཐོང་།།ལས་ཀྱི་རྫུ་འཕྲུལ་ཤུགས་དང་ལྡན།།དབང་པོ་ཀུན་ཚང་ཐོགས་མེད་ལྡན།།མི་ལྡོག་དེ་ནི་དྲི་ཟའོ།།བློ་ནི་ཕྱིན་ཅི་ལོག་གྱུར་པས།།རྩེ་དགས་འགྲོ་བའི་ཡུལ་དུ་འགྲོ།།དྲི་དང་གནས་ལ་མངོན་འདོད་གཞན།།དམྱལ་བ་ཡི་ནི་སྤྱིའུ་ཚུགས་ཡིན།།གཅིག་ནི་ཤེས་བཞིན་དུ་འཇུག་གོ།གཞན་ནི་གནས་པ་ཡང་གཞན་ནི།།འབྱུང་བའང་གཞན་ནི་ཐམས་ཅད་རྨོངས།།སྒོ་ང་ལས་སྐྱེས་རྟག་ཏུའོ།།མངལ་དུ་འཇུག་པ་གསུམ་དག་སྟེ།།འཁོར་ལོས་བསྒྱུར་དང་རང་བྱུང་གཉིས།།ལས་སམ་ཡེ་ཤེས་སམ་གཉིས་ཀ།རྒྱ་ཆེའི་ཕྱིར་ན་གོ་རིམ་བཞིན།།བདག་མེད་ཕུང་པོ་ཙམ་ཉིད་དོ།།ཉོན་མོངས་ལས་ཀྱིས་མངོན་འདུས་བྱས།།སྲིད་པ་བར་མའི་རྒྱུན་གྱིས་ན།།མར་མེ་བཞིན་དུ་མངལ་དུ་འགྲོ།།ཇི་ལྟར་འཕངས་བཞིན་རིམ་གྱིས་རྒྱུན།།སྐྱེས་ནས་ལས་དང་ཉོན་མོངས་ཀྱིས།།འཇིག་རྟེན་ཕ་རོལ་དག་ཏུ་འགྲོ།།སྲིད་པའི་འཁོར་ལོ་ཐོག་མ་མེད།།དེ་ནི་རྟེན་ཅིང་འབྲེལ་འབྱུང་བའི།།ཡན་ལག་བཅུ་གཉིས་ཆ་གསུམ་མོ།།སྔོན་དང་ཕྱི་མཐར་གཉིས་གཉིས་དང་།།བར་དུ་བརྒྱད་ཡོངས་རྫོགས་ལྡན་ལ།།མ་རིག་ཉོན་མོངས་སྔོན་གནས་སྐབས།།འདུ་བྱེད་དག་ནི་སྔོན་ལས་ཀྱི།།རྣམ་ཤེས་མཚམས་སྦྱོར་ཕུང་པོ་ཡིན།།མིང་དང་གཟུགས་ནི་དེ་ཕན་ཆད།།སྐྱེ་མཆེད་དྲུག་དོད་ཚུན་ཆད་དོ།།དེ་ནི་གསུམ་འདུས་ཚུན་ཆད་དོ།།རེག་པ་བདེ་སྡུག་ལ་སོགས་ཀྱི།།རྒྱུ་ཤེས་ནུས་པ་ཚུན་ཆད་དོ།།ཚོར་འཁྲིག་ཚུན་ཆད་སྲེད་པ་ནི།།ལོངས་སྤྱོད་འཁྲིག་པ་ཆགས་ཅན་གྱི།།ཉེ་བར་ལེན་པ་ལོངས་སྤྱོད་རྣམས།།ཐོབ་པར་བྱ་ཕྱིར་ཡོངས་རྒྱུག་པའི།།དེ་སྲིད་འབྲས་བུ་འབྱུང་འགྱུར་བའི།།ལས་བྱེད་དེ་ནི་སྲིད་པ་ཡིན།།ཉིང་མཚམས་སྦྱོར་བ་སྐྱེ་བ་ཡིན།།ཚོར་བའི་བར་ནི་རྒ་ཤི་ཡིན།།འདི་ནི་གནས་སྐབས་པར་འདོད་ལོ།།གཙོ་བོའི་ཕྱིར་ན་ཡན་ལག་བསྒྲགས།།སྔོན་དང་ཕྱི་མཐའ་བར་དག་ལ།།རྨོངས་པ་རྣམ་པར་བཟློག་ཕྱིར་རོ།།ཉོན་མོངས་གསུམ་མོ་ལས་གཉིས་སོ།།གཞི་བདུན་དེ་བཞིན་འབྲས་བུ་ཡིན།།གཉིས་ཀྱི་རྒྱུ་འབྲས་མདོར་བསྡུས་པ།།བར་མའི་རྗེས་སུ་དཔག་པ་ལས།།ཉོན་མོངས་པ་ལས་ཉོན་མོངས་དང་།།བྱ་བ་ཉིད་དོ་དེ་ལས་གཞི།།དེ་ལས་གཞི་དང་ཉོན་མོངས་སྐྱེ།།འདི་ནི་སྲིད་པའི་ཡན་ལག་ལུགས།།འདིར་ནི་འབྱུང་བ་རྒྱུ་ཡིན་ཏེ།བྱུང་བ་འབྲས་བུ་ཡིན་པར་འདོད།།རིག་པའི་མི་མཐུན་ཕྱོགས་ཆོས་གཞན།།མ་རིག་མི་མཛའ་རྫུན་སོགས་བཞིན།།ཀུན་སྦྱོར་སོགས་ཚིག་ཕྱིར་གལ་ཏེ།།ཤེས་རབ་ངན་པའོ་མིན་ལྟ་ཕྱིར།།ལྟ་བ་དེ་དང་མཚུངས་ལྡན་ཕྱིར།།ཤེས་རབ་ཉོན་མོངས་བསྟན་ཕྱིར་རོ།།མིང་ནི་གཟུགས་ཅན་མིན་ཕུང་པོ།།རེག་དྲུག་འདུས་ཏེ་བྱུང་བ་ཡིན།།ལྔ་ནི་ཐོགས་པའི་རེག་པ་ཡིན།།དྲུག་པ་བླ་དྭགས་ཚིག་ཅེས་བྱ།།རིག་དང་མ་རིག་དང་གཞན་རེག།།དྲི་མེད་ཉོན་མོངས་ཅན་ལྷག་མ།།གནོད་སེམས་རྗེས་སུ་ཆགས་པའི་རེག།བདེ་བ་མྱོང་འགྱུར་ལ་སོགས་གསུམ།།དེ་ལས་བྱུང་བའི་ཚོར་བ་དྲུག།ལྔ་ནི་ལུས་ཀྱིའོ་སེམས་ཀྱི་གཞན།།དེ་ཡིད་ཉེ་བར་རྒྱུ་བ་ལས།།རྣམ་པ་དག་ནི་ཡང་བཅོ་བརྒྱད།།འདོད་ན་ཐམས་ཅད་རང་དམིགས་ཅན།།སྤྱོད་ཡུལ་གཟུགས་ཅན་བཅུ་གཉིས་སོ།།གོང་མ་གསུམ་གྱི་བསམ་གཏན་ནི།།གཉིས་ན་བཅུ་གཉིས་འདོད་འགྲོ་རྣམས།།རང་ལ་དམིགས་བརྒྱད་གཟུགས་མེད་པ།།གཉིས་ཀྱིའོ་བསམ་གཏན་གཉིས་ན་དྲུགདྲུག་གི་འདོད་པའོ་རང་ནི་བཞིའི།།གོང་མ་གཅིག་གི་དམིགས་པ་ཡིན།།གཟུགས་མེད་ཉེ་བར་བསྡོགས་ན་བཞི།།གཟུགས་འགྲོ་གོང་མར་འགྲོ་བ་གཅིག།དངོས་གཞི་ན་གཅིག་རང་ཡུལ་ཅན།།བཅོ་བརྒྱད་ཐམས་ཅད་ཟག་དང་བཅས།།བཤད་དང་འཆད་པར་འགྱུར་བ་གཞན།།འདིར་ནི་ཉོན་མོངས་ས་བོན་བཞིན།ཀླུ་བཞིན་རྩ་བཞིན་ལྗོན་ཤིང་བཞིན།།དེ་བཞིན་ཤུན་པ་བཞིན་དུ་འདོད།།ལས་ནི་ཤུན་བཅས་འབྲས་དང་འདྲ།།དེ་བཞིན་སྨན་དང་མེ་ཏོག་བཞིན།།གཞི་ནི་བཟའ་བཏུང་གྲུབ་པ་བཞིན།།སྲིད་པ་བཞི་པོ་དེ་དག་ལས།།སྐྱེ་བའི་སྲིད་པ་ཉོན་མོངས་ཅན།།རང་གི་ས་པའི་ཉོན་མོངས་ཀུན།།གཞན་རྣམ་གསུམ་པོ་གཟུགས་མེད་གསུམ།།འགྲོ་བ་ཟས་ཀྱིས་གནས་པ་ཡིན།།ཁམ་གྱི་ཟས་ནི་འདོད་པ་ན།།སྐྱེ་མཆེད་གསུམ་གྱི་བདག་ཉིད་དོ།།གཟུགས་ཀྱི་སྐྱེ་མཆེད་མ་ཡིན་དེས།།རང་དབང་གྲོལ་ལ་མི་ཕན་ཕྱིར།།རེག་དང་སེམས་པ་རྣམ་ཤེས་ནི།།ཟག་བཅས་ཟས་ཡིན་གསུམ་དག་ན།།ཡིད་ལས་བྱུང་དང་སྲིད་འཚོལ་དང་།།དྲི་ཟ་སྲིད་པ་བར་མ་དང་།།འགྲུབ་པའོ་འདི་ལ་གནས་དང་ནི།།བརྟེན་པ་རྒྱས་པའི་དོན་དུ་གཉིས།།སྲིད་གཞན་འཕེན་དང་འགྲུབ་པ་ཡི།།དོན་དུ་གཉིས་ཏེ་གོ་རིམ་བཞིན།།ཆད་དང་མཚམས་སྦྱོར་འདོད་ཆགས་བྲལ།།ཉམས་དང་འཆི་འཕོ་སྐྱེ་བ་རྣམས།།ཡིད་ཀྱི་རྣམ་ཤེས་ཁོ་ནར་འདོད།།འཆི་འཕོ་སྐྱེ་བ་བཏང་སྙོམས་ལ།།རྩེ་གཅིག་སེམས་མེད་ལ་དེ་མེད།།མྱ་ངན་འདའ་ལུང་བསྟན་མིན་གཉིས།།འོག་མི་ལྷར་འགྲོ་མི་སྐྱེ་རྣམས།།རིམ་གྱིས་འཆི་ན་རྐང་པ་དང་།།ལྟེ་བ་སྙིང་གར་ཡིད་འཆི་འཕོ།།གནད་གཅོད་པ་ནི་ཆུ་སོགས་ཀྱིས།།འཕགས་དང་མཚམས་མེད་བྱེད་པ་དག།ཡང་དག་ལོག་པ་ཉིད་དུ་ངེས།།དེ་ལ་སྣོད་ཀྱི་འཇིག་རྟེན་གྱི།།གནས་པར་འདོད་པའི་འོག་དག་གི།རླུང་གི་དཀྱིལ་འཁོར་རྔམས་སུ་ནི།།ས་ཡ་དྲུག་འབུམ་གྲངས་མེད་དོ།།ཆུ་རྔམས་འབུམ་ཕྲག་བཅུ་གཅིག་དང་།།སྟོང་ཕྲག་དག་ནི་ཉི་ཤུའོ།།ཕྱིས་ནི་རྔམས་སུ་འབུམ་ཕྲག་བརྒྱད།།ལྷག་མ་དག་ནི་གསེར་དུ་འགྱུར།།ཆུ་དང་གསེར་གྱི་དཀྱིལ་འཁོར་གྱི།།ཐད་ཀར་འབུམ་ཕྲག་བཅུ་གཉིས་དང་།།སྟོང་ཕྲག་གསུམ་དང་བརྒྱ་ཕྲག་ནི།།ཕྱེད་དང་ལྔ་རྣམས་ཁོ་ནའོ།།ཁོར་ཡུག་ཏུ་ནི་སུམ་འགྱུར་རོ།།དེ་ལ་ལྷུན་པོ་གཉའ་ཤིང་འཛིན།།གཤོལ་མདའ་འཛིན་དང་སེང་ལྡེང་ཅན།།དེ་བཞིན་ལྟ་ན་སྡུག་རི་དང་།།རྟ་རྣ་དང་ནི་རྣམ་འདུད་དང་།།མུ་ཁྱུད་འཛིན་རིའོ་དེ་ནས་ནི།།གླིང་རྣམས་ཡིན་ནོ་དེ་དག་གི།ཕྱི་རོལ་ན་ནི་ཁོར་ཡུག་སྟེ།།བདུན་ནི་གསེར་ཡིན་དེ་ལྕགས་སོ།།ལྷུན་པོ་རིན་ཆེན་བཞིའི་རང་བཞིན།།ཆུ་ཡི་ནང་དུ་བརྒྱད་ཁྲི་དག།ནུབ་བོ་དེ་བཞིན་སྟེང་དུ་ཡང་།།དཔག་ཚད་དག་ནི་བརྒྱད་ཁྲིའོ།།བརྒྱད་པོ་འཕང་དུ་ཕྱེད་ཕྱེད་དབྲི།།དེ་དག་རྔམས་སུའང་འཕང་དང་མཉམ།།དེ་དག་བར་བདུན་རོལ་མཚོ་ཡིན།།དང་པོ་སྟོང་ཕྲག་བརྒྱད་ཅུའོ།།དེ་ནི་ནང་གི་རྒྱ་མཚོ་ཡིན།།དེ་ཡི་ངོས་ལ་སུམ་འགྱུར་རོ།།རོལ་མཚོ་གཞན་ནི་ཕྱེད་ཕྱེད་དོ།།ལྷག་མ་ཕྱི་ཡི་མཚོ་ཆེན་ཡིན།།འབུམ་ཕྲག་གསུམ་དང་སྟོང་ཕྲག་ནི།།ཉི་ཤུ་གཉིས་སོ་དེ་ལ་ནི།།འཛམ་བུའི་གླིང་སྟེ་ངོས་གསུམ་ལ།།སྟོང་ཕྲག་གཉིས་སོ་ཤིང་རྟའི་དབྱིབས།།གཅིག་ལ་དཔག་ཚད་ཕྱེད་དང་བཞི།།ཤར་གྱི་ལུས་འཕགས་ཟླ་གམ་འདྲ།།ངོས་གསུམ་འདི་དང་འདྲ་གཅིག་ལ།།དཔག་ཚད་སུམ་བརྒྱ་ལྔ་བཅུའོ།།བ་ལང་སྤྱོད་གླིང་ཟླུམ་པོ་སྟེ།སྟོང་ཕྲག་ཕྱེད་དང་བརྒྱད་ཡིན་ནོ།།དེའི་དབུས་སྟོང་ཕྲག་ཕྱེད་དང་གསུམ།།སྒྲ་མི་སྙན་བརྒྱད་གྲུ་བཞིར་མཉམ།།དེ་ཡི་བར་གྱི་གླིང་བརྒྱད་ནི།།ལུས་དང་ལུས་འཕགས་སྒྲ་མི་སྙན།།སྒྲ་མི་སྙན་གྱི་ཟླ་དང་ནི།།རྔ་ཡབ་དང་ནི་རྔ་ཡབ་གཞན།།གཡོ་ལྡན་དང་ནི་ལམ་མཆོག་འགྲོ།།འདི་ནས་བྱང་དུ་རི་ནག་པོ།།དགུ་འདས་གངས་རིའོ་དེ་ནས་ནི།།སྤོས་ངད་ལྡང་བའི་ཚུ་རོལ་ན།།ཆུ་ཞེང་ལྔ་བཅུ་ཡོད་པའི་མཚོ།།འདི་འོག་སྟོང་ཕྲག་ཉི་ཤུ་ན།།མནར་མེད་པའོ་དེ་ཙམ་མོ།།དེ་ཡི་སྟེང་ན་དམྱལ་བ་བདུན།།བརྒྱད་པོ་ཀུན་ལ་ལྷག་བཅུ་དྲུག།དེ་དག་གི་ནི་ངོས་བཞི་ན།།མེ་མར་མུར་དང་རོ་མྱགས་དང་།།སྤུ་གྲིའི་ལམ་སོགས་ཆུ་བོ་ཡིན།།ཆུ་བུར་ཅན་སོགས་གྲང་བརྒྱད་གཞན།།ཉི་ཟླ་ལྷུན་པོའི་ཕྱེད་ན་འོ།།དཔག་ཚད་ལྔ་བཅུ་གཅིག་དང་བཅས།།ནམ་ཕྱེད་ཉི་མ་ནུབ་པ་དང་།།ཉི་མ་ཕྱེད་དང་འཆར་དུས་གཅིག།དབྱར་གྱི་ཟླ་བ་གཉིས་པ་ཡི།།ཐ་མའི་ཚེས་དགུ་ནས་མཚན་རིང་།།དགུན་རྣམས་ཀྱི་ནི་བཞི་པ་ལ།།ཐུང་དུ་འགྱུར་རོ་ཉིན་མོ་ཟློག།ཉིན་མཚན་རིང་བ་ཐང་གཅིག་གོ།ཉི་མ་ལྷོ་བྱང་འགྲོ་ཚེ་འོ།།ཉི་མ་དང་ནི་ཉེ་བ་ལས།།རང་གི་གྲིབ་མས་འགྲིབ་པར་སྣང་།།འདི་ལ་བང་རིམ་བཞི་ཡོད་དེ།།བར་གྱི་ཐག་ནི་སྟོང་ཕྲག་བཅུ།།སྟོང་ཕྲག་དག་ནི་བཅུ་དྲུག་དང་།།བརྒྱད་དང་བཞི་དང་གཉིས་འཕགས་སོ།།དེ་ལ་ལག་ན་གཞོང་ཐོགས་དང་།།ཕྲེང་ཐོགས་དང་ནི་རྟག་མྱོས་དང་།།རྒྱལ་ཆེན་བཞི་པའི་ལྷ་རྣམས་གནས།།རི་ནི་བདུན་པོ་དག་ལ་ཡང་།།ལྷུན་པོའི་རྩེ་ན་སུམ་ཅུ་གསུམ།།དེ་ཡི་ངོས་ལ་བརྒྱད་ཁྲིའོ།།ཕྱོགས་མཚམས་བརྩེགས་པ་བཞི་ལ་ནི།།ལག་ན་རྡོ་རྗེ་གནས་དབུས་ན།།གྲོང་ཁྱེར་ལྟ་ན་སྡུག་ཅེས་པ།།ངོས་ལ་ཉིས་སྟོང་ལྔ་བརྒྱ་པ།།དཔག་ཚད་ཕྱེད་དང་གཉིས་གསེར་གྱི།།རང་བཞིན་གཞི་བཀྲ་མཉེན་པ་ཡོད།།དེ་ན་རྣམ་པར་རྒྱལ་བྱེད་དེ།།ངོས་ལ་ཉིས་བརྒྱ་ལྔ་བཅུའོ།།ཕྱི་རོལ་ཤིང་རྟ་སྣ་ཚོགས་དང་།།རྩུབ་འགྱུར་འདྲེས་ཚལ་དགའ་བས་བརྒྱན།།དེ་དག་གི་ནི་ཕྱོགས་བཞི་ན།།ཉི་ཤུས་བཅད་ན་ས་གཞི་བཟང་།།བྱང་ཤར་མཚམས་ན་ཡོངས་འདུ་སྟེ།།ལྷོ་ནུབ་མཚམས་ན་ཆོས་བཟང་ངོ་།།དེ་སྟེང་ལྷ་རྣམས་གཞལ་མེད་ཁང་།།འདོད་པ་སྤྱོད་པ་དྲུག་ཡིན་ནོ།།གཉིས་གཉིས་འཁྱུད་དང་ལག་བཅངས་དང་།།རྒོད་དང་བལྟས་པས་འཁྲིག་པ་ཡིན།།བྱིས་པ་ལོ་ལྔ་ལོན་པ་ནས།།ལོ་བཅུ་ལོན་པ་ལྟ་བུའི་བར།།དེ་དག་ཏུ་སྐྱེ་གཟུགས་ཅན་རྣམས།།ཀུན་རྫོགས་གོས་དང་བཅས་པ་ཉིད།།འདོད་པ་སྐྱེ་བ་གསུམ་པོ་ནི།།འདོད་པའི་ལྷ་དང་མིར་བཅས་རྣམས།།བདེ་བ་སྐྱེ་བ་གསུམ་པོ་ནི།།བསམ་གཏན་གསུམ་ལ་ས་དགུ་ཡིན།།གནས་ནས་གནས་འོག་ཇི་སྲིད་པ།།དེ་ནས་དེ་ཡི་གོང་དེ་སྲིད།།རྫུ་འཕྲུལ་གཞན་བརྟེན་མ་གཏོགས་པ།།དེ་དག་གོང་མ་མཐོང་བ་མེད།།གླིང་བཞི་པ་དང་ཉི་ཟླ་དང་།།རི་རབ་དང་ནི་འདོད་ལྷ་དང་།།ཚངས་པའི་འཇིག་རྟེན་སྟོང་ལ་ནི།།སྟོང་ནི་སྤྱི་ཕུད་ཡིན་པར་འདོད།།དེ་སྟོང་ལ་ནི་སྟོང་གཉིས་པ།།བར་མའི་འཇིག་རྟེན་ཁམས་ཡིན་ནོ།།དེ་སྟོང་ལ་ནི་སྟོང་གསུམ་མོ།།མཉམ་དུ་འཇིག་ཅིང་འབྱུང་བ་ཡིན།།འཛམ་བུ་གླིང་པ་རྣམས་ཀྱི་ཚད།།ཁྲུ་བཞི་པ་དང་ཕྱེད་དང་བཞི།།ཤར་དང་བ་ལང་སྤྱོད་དང་ནི།།བྱང་ཞེས་བྱ་བ་ཉིས་འགྱུར་བསྐྱེད།།འདོད་དང་ལྡན་པའི་ལྷ་ཡི་ལུས།།བཞི་ཆ་ནས་ནི་རྒྱང་གྲགས་དག།ཕྱེད་དང་གཉིས་ཀྱི་བར་དུ་བསྐྱེད།།གཟུགས་ཅན་དང་པོ་དཔག་ཚད་ཕྱེད།།དེ་ཡི་གོང་མ་ཕྱེད་ཕྱེད་བསྐྱེད།།འོད་ཆུང་རྣམས་ཀྱི་ལྟག་ཡན་ཆད།།ལུས་ནི་ཉིས་འགྱུར་ཉིས་འགྱུར་ཏེ།།སྤྲིན་མེད་དཔག་ཚད་གསུམ་དོར་རོ།།སྒྲ་མི་སྙན་ན་ཚེ་སྟོང་སྟེ།།གཉིས་ན་ཕྱེད་ཕྱེད་སྤངས་པའོ།།འདི་ན་མ་ངེས་ཐ་མར་ནི།།ལོ་བཅུ་དང་པོ་དཔག་ཏུ་མེད།།མི་རྣམས་ཀྱི་ལོ་ལྔ་བཅུ་ལ།།འདོད་པ་དག་གི་ལྷ་རྣམས་ལས།།འོག་མ་དག་གི་ཉིན་ཞག་གཅིག།དེས་ན་ཚེ་ལོ་ལྔ་བརྒྱའོ།།གོང་མ་གཉིས་ཀ་ཉིས་འགྱུར་རོ།།གཟུགས་ཅན་ཉིན་མཚན་མེད་ཚེ་ནི།།རང་ལུས་གཞལ་བའི་བསྐལ་པ་ཡི།།གཟུགས་མེད་བསྐལ་པ་སྟོང་ཕྲག་ནི།།ཉི་ཤུ་ལྷག་པས་ལྷག་པ་ཡིན།།འོད་ཆུང་ནས་བཟུང་བསྐལ་ཆེན་ཏེ།།དེ་ཡི་འོག་མ་ཕྱེད་ཡིན་ནོ།།ཡང་སོས་ལ་སོགས་དྲུག་རིམ་བཞིན།།འདོད་ལྷའི་ཚེ་དང་ཉིན་ཞག་མཉམ།།དེས་ན་དེ་དག་རྣམས་ཀྱི་ཚེ།།འདོད་པའི་ལྷ་དང་འདྲ་བ་ཡིན།།རབ་ཏུ་ཚ་ཕྱེད་མནར་མེད་ནི།།བར་གྱི་བསྐལ་པའོ་དུད་འགྲོ་རྣམས།།མཆོག་རིང་བསྐལ་པའོ་ཡི་དྭགས་རྣམས།།ཟླ་བ་ཉིན་ཞག་གི་ལྔ་བརྒྱ།།ཏིལ་རྫང་ནང་ནས་ལོ་བརྒྱ་ཞིང་།།ཏིལ་གཅིག་ཕྱུང་བས་ཟད་གྱུར་པ།།ཆུ་བུར་ཅན་གྱི་ཚེ་ཡིན་ཏེ།།གཞན་གྱི་ཚེ་ནི་ཉི་ཤུས་བསྒྱུར།།སྒྲ་མི་སྙན་མ་གཏོགས་པར་འཆི།།གཟུགས་མིང་དུས་མཐའ་རྡུལ་ཡིག་དང་།།སྐད་ཅིག་ཕྲ་རབ་རྡུལ་དང་ནི།།རྡུལ་ཕྲན་དང་ནི་དེ་བཞིན་དུ།།ལྕགས་ཆུ་རི་བོང་ལུག་དང་གླང་།།ཉི་ཟེར་རྡུལ་དང་སྲོ་མ་དང་།།དེ་ལས་བྱུང་དང་དེ་བཞིན་དུ།།སོར་ཚིགས་ཞེས་བྱ་གོང་བདུན་བསྒྱུར།།སོར་མོ་ཉི་ཤུ་བཞི་ལ་ཁྲུ།།ཁྲུ་བཞི་ལ་ནི་གཞུ་གང་ངོ་།།དེ་དག་ལྔ་བརྒྱ་རྣམས་ལ་ནི།།རྒྱང་གྲགས་དེ་ལ་དགོན་པར་འདོད།།དེ་བརྒྱད་དཔག་ཚད་ཅེས་བྱའོ།།སྐད་ཅིག་མ་བརྒྱ་ཉི་ཤུ་ལ།།དེ་ཡི་སྐད་ཅིག་དེ་དག་ཀྱང་།།དྲུག་ཅུ་ལ་ནི་ཐང་གཅིག་གོ།ཡུད་ཙམ་ཉིན་ཞག་ཟླ་གསུམ་ནི།།གོང་ནས་གོང་དུ་སུམ་ཅུ་འགྱུར།།ཞག་མི་ཐུབ་དང་བཅས་པ་ཡི།།ཟླ་བ་བཅུ་གཉིས་ལ་ལོ་གཅིག།བསྐལ་པ་རྣམ་པ་མང་བཤད་པ།།འཇིག་པའི་བསྐལ་པ་དམྱལ་བ་ཡི།།སྲིད་པ་མེད་ནས་སྣོད་ཟད་པ།།ཆགས་པ་དང་པོའི་རླུང་ནས་ནི།།དམྱལ་བའི་སྲིད་པའི་བར་དུའོ།།བར་གྱི་བསྐལ་པ་དཔག་མེད་ནས།།ཚེ་ལོ་བཅུ་པའི་བར་དུ་འོ།།དེ་ནས་ཡར་སྐྱེ་མར་འབྲི་བའི།།བསྐལ་པ་གཞན་ནི་བཅོ་བརྒྱད་དང་།།ཡར་སྐྱེ་བ་ནི་གཅིག་ཡིན་ཏེ།།དེ་དག་ཚེ་ནི་བརྒྱད་ཁྲིའི་བར།།དེ་ལྟར་འཇིག་རྟེན་ཆགས་པ་འདི།།བར་གྱི་བསྐལ་པ་ཉི་ཤུར་གནས།།ཆགས་པ་དང་ནི་འཇིག་པ་དང་།།ཞིག་ནས་འདུག་པ་དག་མཉམ་མོ།།དེ་དག་བརྒྱད་ཅུ་ལ་བསྐལ་ཆེན།།དེ་གྲངས་མེད་གསུམ་ལ་སངས་རྒྱས།།འབྱུང་ངོ་མར་ནི་འགྲིབ་པ་ཡི།།བརྒྱ་ཡི་བར་ལ་དེ་དག་འབྱུང་།།རང་སངས་རྒྱས་རྣམས་གཉིས་ཀ་ལ།།བསེ་རུ་བསྐལ་པ་བརྒྱ་ཡི་རྒྱུས།།འཁོར་ལོས་བསྒྱུར་བ་འབྱུང་བ་ནི།།སྟོང་ཕྲག་བརྒྱད་ཅུ་ལས་མི་འཕྱི།།གསེར་དངུལ་ཟངས་ལྕགས་འཁོར་ལོ་ཅན།།དེ་དག་གླིང་གཅིག་གླིང་གཉིས་དང་།།གསུམ་དང་བཞི་ལ་མས་རིམ་བཞིན།།ལྷན་ཅིག་གཉིས་མིན་སངས་རྒྱས་བཞིན།།ཕས་བསུ་རང་འགྲོ་གཡུལ་བཤམས་དང་།།མཚོན་བརྩམས་པས་རྒྱལ་གནོད་པ་མེད།།ཐུབ་མཚན་ཡུལ་ན་གནས་པ་དང་།།གསལ་ལ་རྫོགས་པས་འཕགས་པ་ཡིན།།སྔར་བྱུང་སེམས་ཅན་གཟུགས་ཅན་བཞིན།།དེ་ནས་རིམ་གྱིས་རོ་ལ་ཆགས།།ལེ་ལོས་གསོག་འཇོག་བྱས་ནས་ནི།།འཛིན་བཅས་རྣམས་ཀྱིས་ཞིང་དཔོན་བསྟབས།།དེ་ནས་ལས་ཀྱི་ལམ་ལྷག་པས།།ཚེ་ཐུང་ལོ་ནི་བཅུ་ཡིན་ནོ།།བསྐལ་པ་མཚོན་དང་ནད་དང་ནི།།མུ་གེ་དག་གིས་ཚར་ཕྱིན་ཏོ།།ཞག་རྣམས་དང་ནི་ཟླ་བ་དང་།།ལོ་བདུན་དག་ཏུ་གོ་རིམ་བཞིན།།མེ་དང་ཆུ་དང་རླུང་དག་གིས།།འཇིག་པ་དག་ནི་ཡང་གསུམ་ཡིན།།བསམ་གཏན་གཉིས་སོགས་གསུམ་པོ་ནི།།དེ་དག་གི་རྩེ་གོ་རིམ་བཞིན།།དེ་ཡི་སྐྱོན་དང་ཆོས་མཐུན་ཕྱིར།།བཞི་པ་ན་མེད་མི་གཡོའི་ཕྱིར།།མི་རྟག་དེ་ཡི་གཞལ་མེད་ཁང་།།སེམས་ཅན་བཅས་ཏེ་འབྱུང་འཇིག་ཕྱིར།།མེ་ཡིས་བདུན་ནོ་ཆུ་ཡིས་གཅིག།དེ་ལྟར་ཆུ་བདུན་ཐལ་ནས་ཀྱང་།།མེ་ཡིས་བདུན་ནོ་དེ་ནས་ནི།།མཇུག་ཏུ་རླུང་གིས་འཇིག་པ་ཡིན།།ཆོས་མངོན་པའི་མཛོད་ཀྱི་ཚིག་ལེའུར་བྱས་པ་ལས་འཇིག་རྟེན་བསྟན་པ་ཞེས་བྱ་བ་སྟེ་གནས་གསུམ་པའོ།།།། གནས་བཞི་བ་ལས་བསྟན་པ། ༈ལས་ལས་འཇིག་རྟེན་སྣ་ཚོགས་སྐྱེས།།དེ་ནི་སེམས་པ་དང་དེས་བྱས།།སེམས་པ་ཡིད་ཀྱི་ལས་ཡིན་ནོ།།དེས་བསྐྱེད་ལུས་དང་ངག་གི་ལས།།དེ་དག་རྣམ་རིག་རྣམ་རིག་མིན།།ལུས་རྣམ་རིག་བྱེད་དབྱིབས་སུ་འདོད།།འགྲོ་མིན་གང་ཕྱིར་འདུས་བྱས་ནི།།སྐད་ཅིག་མ་ཡིན་འཇིག་ཕྱིར་རོ།།རྒྱུ་མེད་པ་ལས་འགའ་མི་འབྱུང་།།རྒྱུ་ཡང་འཇིག་པ་པོར་འགྱུར་རོ།།གཉིས་བཟུང་འགྱུར་ཏེ་རྡུལ་ལ་མེད།།ངག་རྣམ་རིག་བྱེད་ནི་ངག་སྒྲ།།རྣམ་གསུམ་དྲི་མེད་གཟུགས་གསུངས་དང་།།འཕེལ་དང་མ་བྱས་ལམ་སོགས་ཕྱིར།།འདོད་གཏོགས་རྣམ་རིག་མིན་སྐད་ཅིག།ཕྱིན་ཆད་འདས་པའི་འབྱུང་ལས་སྐྱེ།།ཟག་བཅས་ལུས་དང་ངག་གི་ལས།།རང་གི་འབྱུང་བ་དག་རྒྱུར་བྱས།།ཟག་མེད་གང་དུ་སྐྱེས་པའི་ཡིན།།རྣམ་རིག་བྱེད་མིན་མ་ཟིན་དང་།།རྒྱུ་མཐུན་ལས་བྱུང་སེམས་ཅན་སྟོན།།རྒྱུ་མཐུན་ཟིན་པའི་འབྱུང་ལས་སྐྱེ།།ཏིང་འཛིན་སྐྱེས་འབྱུང་མ་ཟིན་དང་།།རྒྱས་བྱུང་ཐ་དད་མིན་ལས་སྐྱེ།།རྣམ་རིག་མིན་ལུང་བསྟན་མིན་མེད།།གཞན་ནི་རྣམ་གསུམ་མི་དགེ་ནི།།འདོད་ནའོ་གཟུགས་ནའང་རྣམ་རིག་མིན།།རྣམ་རིག་དཔྱོད་དང་བཅས་དག་ན།།འདོད་པ་ན་ཡང་བསྒྲིབས་པ་མེད།།གང་ཕྱིར་ཀུན་སློང་མེད་ཐར་པ།།དམ་པའི་དོན་དུ་དགེ་རྩ་བ།།ངོ་ཚ་ཁྲེལ་ཡོད་བདག་ཉིད་ཀྱི།།དེ་དག་དང་ལྡན་མཚུངས་ལྡན་གྱི།།བྱ་བ་ལ་སོགས་ཀུན་སློང་པས།།ཟློག་པ་མི་དགེ་དོན་དམ་པར།།ལུང་མ་བསྟན་པ་བསྟན་པ་དག།ཀུན་སློང་རྣམ་གཉིས་རྒྱུ་དང་ནི།།དེ་ཡི་དུས་ཀྱི་སློང་ཞེས་བྱ།།གཉིས་ལས་དང་པོ་རབ་འཇུག་བྱེད།།གཉིས་པ་རྗེས་སུ་འཇུག་བྱེད་ཡིན།།མཐོང་བས་སྤང་བྱའི་རྣམ་ཤེས་ནི།།རབ་ཏུ་འཇུག་བྱེད་ཡིན་ཡིད་ནི།།སྒོམ་པས་སྤང་བྱ་གཉིས་ཀ་ཡིན།།ལྔ་ནི་རྗེས་སུ་འཇུག་བྱེད་ཡིན།།རབ་ཏུ་འཇུག་བྱེད་དགེ་སོགས་ལས།།རྗེས་འཇུག་བྱེད་ཀྱང་རྣམ་གསུམ་འགྱུར།།ཐུབ་པའི་འདྲ་བའམ་དེ་དགེ་བ།།རྣམ་སྨིན་ལས་སྐྱེས་གཉིས་ཀ་མིན།།རྣམ་རིག་མིན་རྣམ་གསུམ་ཞེས་བྱ།།སྡོམ་དང་སྡོམ་པ་མིན་དང་གཞན།།སྡོམ་པ་སོ་སོར་ཐར་ཞེས་བྱ།།དེ་བཞིན་ཟག་མེད་བསམ་གཏན་སྐྱེས།།སོ་སོར་ཐར་ཞེས་བྱ་རྣམ་བརྒྱད།།རྫས་སུ་རྣམ་པ་བཞི་ཡིན་ནོ།།མཚན་ལས་མིང་ནི་འཕོ་བའི་ཕྱིར།།ཐ་དད་དེ་དག་འགལ་བ་མེད།།སྤང་བྱ་ལྔ་བརྒྱད་བཅུ་དང་ནི།།ཐམས་ཅད་སྤོང་བར་མནོས་པ་ལས།།དགེ་བསྙེན་དང་ནི་བསྙེན་གནས་དང་།།དགེ་ཚུལ་ཆེད་དང་དགེ་སློང་ཉིད།།ཚུལ་ཁྲིམས་དང་ནི་ལེགས་སྤྱད་དང་།།ལས་དང་སྡོམ་པ་ཞེས་བྱའོ།།དང་པོའི་རྣམ་རིག་རྣམ་རིག་མིན།སོ་སོར་ཐར་དང་བྱ་བའི་ལམ།།སོ་སོར་ཐར་དང་ལྡན་པ་བརྒྱད།།བསམ་གཏན་སྐྱེས་དང་དེ་ལྡན་པ།།ཟག་མེད་འཕགས་པའི་སེམས་ཅན་དང་།།ཐ་མ་གཉིས་ནི་སེམས་རྗེས་འབྲང་།།བར་ཆད་མེད་ལམ་སྐྱེས་དེ་གཉིས།།མི་ལྕོགས་མེད་ལ་སྤོང་ཞེས་བྱ།།ཤེས་བཞིན་དང་ནི་དྲན་དག་གཉིས།།ཡིད་དང་དབང་པོའི་སྡོམ་པ་ཡིན།།སོ་སོར་ཐར་གནས་ཇི་སྲིད་དུ།མ་བཏང་བར་དག་ད་ལྟར་གྱི།།རྣམ་རིག་མི་ལྡན་སྐད་ཅིག་མ།།དང་པོ་ཕྱིན་ཆད་འདས་པ་དང་།།སྡོམ་མིན་གནས་པའང་དེ་དང་འདྲ།།བསམ་གཏན་སྡོམ་དང་ལྡན་པ་ནི།།རྟག་ཏུ་འདས་དང་མ་འོངས་དང་།།འཕགས་ནི་དང་པོ་འདས་དང་མིན།།མཉམ་བཞག་འཕགས་ལམ་གནས་དེ་གཉིས།།ད་ལྟར་དང་ལྡན་བར་གནས་ལ།།ཡོད་ན་དང་པོ་བར་གྱི་དང་།།ཕྱིན་ཆད་དུས་ནི་གཉིས་དང་ངོ་།།སྡོམ་མིན་གནས་པ་དགེ་བ་དང་།།སྡོམ་ལ་གནས་པ་མི་དགེ་བའི།།རྣམ་རིག་མི་ལྡན་ཇི་སྲིད་དུ།།རབ་དང་ཉོན་མོངས་ཤུགས་ལྡན་བར།།རྣམ་རིག་བྱེད་ནི་ཐམས་ཅད་ལ།།བྱེད་པ་དག་ལ་ད་ལྟར་ལྡན།།མ་བཏང་བར་དུ་སྐད་ཅིག་མ།།ཕྱིན་ཆད་འདས་ལྡན་མ་འོངས་མེད།།བསྒྲིབས་པ་དང་ནི་མ་བསྒྲིབས་པ།།འདས་པ་དག་དང་ལྡན་པའང་མེད།།སྡོམ་པ་མིན་དང་ཉེས་སྤྱད་དང་།།འཆལ་བའི་ཚུལ་ཁྲིམས་ལས་དེའི་ལམ།།བར་མ་དོར་གནས་སེམས་ཞན་པས།བྱེད་ན་རྣམ་རིག་ཉིད་དང་ལྡན།།རྣམ་རིག་བཏང་དང་མ་སྐྱེས་པའི།།འཕགས་པའི་གང་ཟག་རྣམ་རིག་མིན།།བསམ་གཏན་ལས་སྐྱེས་བསམ་གཏན་གྱི།།ས་ཉིད་ཀྱིས་འཐོབ་ཟག་མེད་ནི།།འཕགས་དེས་སོ་སོར་ཐར་ཞེས་པ།།གཞན་གྱི་རྣམ་རིག་བྱེད་སོགས་ཀྱིས།།ཇི་སྲིད་འཚོ་དང་ཉིན་ཞག་ཏུ།།སྡོམ་པ་ཡང་དག་བླང་བར་བྱ།།ཉིན་ཞག་པ་ཡི་སྡོམ་མིན་མེད།།དེ་དེ་ལྟར་ནོད་མེད་ཅེས་གྲག།དམའ་བར་འདུག་སྨྲས་བཟླས་པ་ཡིས།།མི་བརྒྱན་ནམ་ནི་ནངས་བར་དུ།།བསྙེན་གནས་ཡན་ལག་ཚང་བར་ནི།།ནང་པར་གཞན་ལས་ནོད་པར་བྱ།།ཚུལ་ཁྲིམས་ཡན་ལག་བག་ཡོད་པའི།།ཡན་ལག་བརྟུལ་ཞུགས་ཡན་ལག་སྟེ།།བཞི་གཅིག་དེ་བཞིན་གསུམ་རིམ་བཞིན།།དེ་ཡིས་དྲན་ཉམས་དྲེགས་པར་འགྱུར།།གཞན་ལའང་བསྙེན་གནས་ཡོད་མོད་ཀྱི།།སྐྱབས་སུ་མ་སོང་བ་ལ་མེད།།དགེ་བསྙེན་ཉིད་དུ་ཁས་བླངས་པས།སྡོམ་པ་བསྟན་པ་དགེ་སློང་བཞིན།།གལ་ཏེ་ཐམས་ཅད་བསྡམས་ཡིན་ན།།སྣ་གཅིག་སྤྱོད་སོགས་ཇི་ལྟ་བུ།།དེ་བསྲུང་བ་ལ་གསུངས་ཞེས་གྲག།ཆུང་ངུ་ལ་སོགས་ཡིད་ཇི་བཞིན།།གང་ཞིག་གསུམ་ལ་སྐྱབས་འགྲོ་དེ།།སངས་རྒྱས་དགེ་འདུན་བྱེད་པའི་ཆོས།།མི་སློབ་པ་དང་གཉིས་ཀ་དང་།།མྱ་ངན་འདས་ལ་སྐྱབས་སུ་འགྲོ།།ལོག་གཡེམ་ཤིན་ཏུ་སྨད་ཕྱིར་དང་།།སླ་ཕྱིར་མི་བྱེད་ཐོབ་ཕྱིར་རོ།།སྡོམ་པ་ཇི་ལྟར་ཁས་བླངས་བཞིན།།ཐོབ་ཀྱི་རྒྱུད་ལས་མ་ཡིན་ནོ།།བསླབ་པ་ཐམས་ཅད་འདས་གྱུར་ན།།རྫུན་དུ་ཐལ་བར་འགྱུར་བའི་ཕྱིར།།བཅས་པའི་ཁ་ན་མ་ཐོ་བ།།མྱོས་འགྱུར་ལས་གཞན་བསྲུང་ཕྱིར་རོ།།འདོད་གཏོགས་ཐམས་ཅད་གཉིས་ཀ་དང་།།ད་ལྟར་དག་ལས་ཐོབ་པར་འགྱུར།།བསམ་གཏན་ཟག་མེད་སྡོམ་པ་ནི།།དངོས་དང་དུས་ནི་ཐམས་ཅད་ལས།།སྡོམ་པ་སེམས་ཅན་ཐམས་ཅད་ལས།།ཡན་ལག་རྒྱུ་ལ་དབྱེ་བ་ཡོད།།སྡོམ་པ་མིན་པ་ཐམས་ཅད་དང་།།ཡན་ལག་ཀུན་ལས་རྒྱུས་མིན་ནོ།།སྡོམ་པ་མིན་པ་བྱ་བའམ།ཁས་ལེན་པ་ལས་ཐོབ་པར་འགྱུར།།ལྷག་མའི་རྣམ་རིག་མིན་ཞིང་དང་།།ལེན་དང་གུས་པར་བྱེད་པས་འཐོབ།།བསླབ་པ་ཕུལ་དང་ཤི་འཕོས་དང་།།མཚན་གཉིས་དག་ནི་བྱུང་བ་དང་།།རྩ་བ་ཆད་དང་མཚན་འདས་ལས།།སོ་སོར་ཐར་པའི་འདུལ་བ་གཏོང་།།ཁ་ཅིག་ལྟུང་བར་འགྱུར་ལས་སྨྲ།།གཞན་དག་དམ་ཆོས་ནུབ་པ་ལས།།ཁ་ཆེ་རྣམས་ནི་བྱུང་བ་ལ།།བུ་ལོན་ནོར་བཞིན་གཉིས་སུ་འདོད།།བསམ་གཏན་གཏོགས་པའི་དགེ་བ་ནི།།ས་འཕོས་ཉམས་པ་དག་གིས་གཏོང་།།དེ་བཞིན་གཟུགས་མེད་གཏོགས་འཕགས་པ།།འབྲས་བུ་ཐོབ་སྦྱངས་ཉམས་པ་ལས།།སྡོམ་མིན་སྡོམ་པ་ཐོབ་པ་དང་།།ཤི་དང་མཚན་གཉིས་བྱུང་བ་ལས།།བར་མ་ཤུགས་བླངས་བྱ་བ་དང་།།དོན་ཚེ་རྩ་བ་ཆད་པ་ལས།།འདོད་གཏོགས་དགེ་བ་གཟུགས་མིན་ནི།།རྩ་ཆད་གོང་དུ་སྐྱེས་པ་ལས།།ཉོན་མོངས་པ་ཅན་གཟུགས་མིན་ནི།།གཉེན་པོ་སྐྱེས་པས་རྣམ་ཉམས་འགྱུར།།ཟ་མ་མ་ནིང་སྒྲ་མི་སྙན།།མཚན་གཉིས་མ་གཏོགས་མི་རྣམས་ལ།།སྡོམ་མིན་སྡོམ་པའང་དེ་བཞིན་ལ།ལྷ་ལའང་མི་རྣམས་ལ་གསུམ་མོ།།འདོད་དང་གཟུགས་སྐྱེས་ལྷ་རྣམས་ལ།།བསམ་གཏན་སྐྱེས་ཡོད་ཟག་མེད་ནི།།བསམ་གཏན་ཁྱད་པར་འདུ་ཤེས་མེད།།སེམས་ཅན་མ་གཏོགས་གཟུགས་མེད་ནའང་།།ལས་བདེ་མི་བདེ་དང་གཞན་ནི།།དགེ་དང་མི་དགེ་དང་གཞན་ཡིན།།བསོད་ནམས་བསོད་ནམས་མིན་མི་གཡོ།།བདེ་བ་མྱོང་འགྱུར་ལ་སོགས་གསུམ།།བསོད་ནམས་འདོད་ཁམས་དགེ་བའི་ལས།།མི་གཡོ་གོང་མ་ལས་སྐྱེས་པའི།།གང་ཕྱིར་ས་ནི་དེ་དག་ཏུ།།ལས་རྣམ་སྨིན་ཕྱིར་མི་གཡོའི་ཕྱིར།།བསམ་གཏན་གསུམ་པའི་བར་དགེ་བ།།བདེ་བ་མྱོང་འགྱུར་དེ་ཡན་ཆད།།སྡུག་མིན་བདེ་མིན་མྱོང་འགྱུར་བ།།སྡུག་བསྔལ་མྱོང་འགྱུར་འདིའི་མི་དགེ།འོག་ནའང་བར་མ་ཡོད་དོ་ཞེས།།ཁ་ཅིག་ཟེར་ཏེ་གང་གི་ཕྱིར།།བསམ་གཏན་ཁྱད་པར་རྣམ་སྨིན་ལས།།སྔ་ཕྱི་མེད་གསུམ་སྨིན་འདོད་ཕྱིར།།ངོ་བོ་ཉིད་དང་མཚུངས་ལྡན་དང་།།དམིགས་པ་དང་ནི་རྣམ་སྨིན་དང་།།མངོན་སུམ་དུ་ནི་གྱུར་པ་ལས།།མྱོང་འགྱུར་རྣམ་པ་ལྔ་ཡིན་ནོ།།དེ་ཡང་ངེས་དང་མ་ངེས་དང་།།མཐོང་བའི་ཆོས་ལ་སོགས་པ་ལ།།མྱོང་འགྱུར་ཕྱིར་ན་ངེས་རྣམ་གསུམ།།ཁ་ཅིག་ལས་རྣམ་ལྔ་ཞེས་ཟེར།།གཞན་དག་མུ་ནི་བཞི་ཞེས་ཟེར།།གསུམ་གྱིས་རིས་ནི་འཕེན་པར་བྱེད།།ཐམས་ཅད་ན་ནི་འཕེན་པ་བཞི།།དམྱལ་བ་ན་ནི་དགེ་བའི་གསུམ།།གང་ལས་འདོད་ཆགས་བྲལ་བརྟན་པའི།།བྱིས་པ་དེར་སྐྱེས་མྱོང་མི་བྱེད།།འཕགས་པ་གཞན་དུའང་མྱོང་མི་བྱེད།།འདོད་རྩེའི་མི་བརྟན་པ་ཡང་མིན།།སྲིད་པ་བར་མ་འདོད་ཁམས་སུ།།འཕེན་པ་རྣམ་པ་ཉི་ཤུ་གཉིས།།དེ་ནི་མཐོང་ཆོས་འབྲས་བུ་ཡིན།།དེ་ནི་རིས་གཅིག་ཁོ་ན་ཡིན།།ཉོན་མོངས་རབ་དང་དྲག་པོ་དང་།།ཡོན་ཏན་ཞིང་དང་རྒྱུན་ཆགས་སུ།།བྱས་པ་གང་ཞིག་ཡིན་པ་དང་།།ཕ་མ་གསོད་གང་དེ་ངེས་སོ།།མཐོང་ཆོས་འབྲས་བུ་ཅན་གྱི་ལས།།ཞིང་དང་བསམ་པའི་ཁྱད་པར་ལས།།ས་དེའི་འདོད་ཆགས་གཏན་བྲལ་ཕྱིར།།རྣམ་སྨིན་ངེས་པ་གང་ཡིན་པའོ།།གང་དག་འགོག་བྱམས་ཉོན་མོངས་མེད།།མཐོང་དང་དགྲ་བཅོམ་འབྲས་ལངས་པ།།དེ་ལ་ཕན་གནོད་བྱས་པ་ཡི།།འབྲས་བུ་འཕྲལ་དུ་མྱོང་བར་འགྱུར།།རྣམ་པར་རྟོག་པ་མེད་པ་ཡི།།དགེ་བའི་ལས་ཀྱི་རྣམ་སྨིན་ནི།།སེམས་ཀྱི་ཚོར་བ་ཁོ་ནར་འདོད།།མི་དགེ་བའི་ནི་ལུས་ཀྱི་ཡིན།།གཡེངས་པའི་སེམས་ནི་ཡིད་སེམས་ལ།།དེ་ནི་ལས་ཀྱི་རྣམ་སྨིན་སྐྱེས།།སྐྲག་གནོད་མ་མཉམ་མྱ་ངན་གྱིས།།སྒྲ་མི་སྙན་མིན་འདོད་ལྡན་རྣམས།།ཡོན་སྐྱོན་སྙིགས་མར་གསུངས་པ་ནི།།གཡོ་དང་ཞེ་སྡང་འདོད་ཆགས་སྐྱེས།།དཀར་གནག་ལ་སོགས་བྱེ་བྲག་གིས།།ལས་ནི་རྣམ་པ་བཞི་ཡིན་ནོ།།མི་དགེ་གཟུགས་དང་འདོད་གཏོགས་པའི།།དགེ་བ་ཉིད་ནི་རིམ་བཞིན་དུ།།གནག་དང་དཀར་དང་གཉིས་ཀའི་ལས།།དེ་ཟད་བྱེད་པ་ཟག་མེད་ཡིན།།ཆོས་བཟོད་འདོད་ཆགས་བྲལ་བ་ཡི།།བར་ཆད་མེད་ལམ་བརྒྱད་ཀྱི་གང་།།སེམས་པ་རྣམ་པ་བཅུ་གཉིས་དེ།།ནག་པོ་ཟད་པར་བྱེད་པའི་ལས།།དགུ་པའི་སེམས་པ་གང་ཡིན་པ།དེ་ནི་དཀར་གནག་ཟད་བྱེད་ཡིན།།དཀར་པོ་བསམ་གཏན་ཆགས་བྲལ་བའི།།བར་ཆད་མེད་ལམ་སྐྱེས་ཐ་མས།།གཞན་ནི་དམྱལ་བ་མྱོང་འགྱུར་དང་།།འདོད་གཞན་མྱོང་འགྱུར་གཉིས་སུ་རིགས།།གཞན་ནི་མཐོང་བས་སྤང་བྱ་གནག།འདོད་པ་ལས་སྐྱེས་གཞན་དཀར་གནག།མི་སློབ་ལུས་ངག་ལས་ཡིད་ཉིད།ཐུབ་པའི་གསུམ་སྟེ་གོ་རིམ་བཞིན།།ལེགས་སྤྱད་གསུམ་པོ་ཐམས་ཅད་ནི།།གཙང་བྱེད་རྣམ་པ་གསུམ་ཡིན་ནོ།།ལུས་ཀྱི་ལ་སོགས་མི་དགེ་བ།།ཉེས་པར་སྤྱད་པ་གསུམ་དུ་འདོད།།བརྣབ་སེམས་ལ་སོགས་ལས་མིན་ཡང་།།ཡིད་ཀྱི་ཉེས་སྤྱད་རྣམ་གསུམ་མོ།།ལྡོག་པ་ལེགས་པར་སྤྱད་པ་ཡིན།།དེ་ལས་ཆེ་ལོང་བསྡུས་ནས་ནི།།དགེ་དང་མི་དགེ་ཅི་རིགས་པར།།ལས་ཀྱི་ལམ་ནི་བཅུར་གསུངས་སོ།།མི་དགེ་དྲུག་ནི་རྣམ་རིག་མིན།།གཅིག་རྣམ་གཉིས་སོ་དེ་དག་ཀྱང་།།བྱེད་ན་དགེ་བ་བདུན་རྣམ་གཉིས།ཏིང་འཛིན་ལས་སྐྱེས་རྣམ་རིག་མིན།།ཉེར་བསྡོགས་རྣམས་ནི་རྣམ་རིག་བྱེད།།རྣམ་རིག་བྱེད་མིན་འགྱུར་བའམ།།མ་ཡིན་ལྡོག་པ་མཇུག་ཡིན་ནོ།།སྦྱོར་བ་རྩ་བ་གསུམ་ལས་སྐྱེས།།དེ་ཡི་མཇུག་ཐོགས་ལས་བྱུང་ཕྱིར།།བརྣབ་སེམས་སོགས་རྩ་གསུམ་ལས་སྐྱེས།།དགེ་བ་སྦྱོར་དང་མཇུག་བཅས་རྣམས།།ཆགས་སྡང་གཏི་མུག་མེད་ལས་སྐྱེས།།གསོད་དང་གནོད་སེམས་ཚིག་རྩུབ་པོ།།ཞེ་སྡང་གིས་ནི་མཐར་ཕྱིན་བྱེད།།ལོག་གཡེམ་བརྣབ་སེམས་མ་བྱིན་ལེན།ཆགས་པ་ཡིས་ནི་རྫོགས་པར་བྱེད།།ལོག་པར་ལྟ་བ་གཏི་མུག་གིས།།ལྷག་མ་གསུམ་གྱིས་རྫོགས་པར་འདོད།།གཞི་ནི་སེམས་ཅན་ལོངས་སྤྱོད་དང་།།མིང་དང་གཟུགས་ནི་མིང་ཡིན་ནོ།།སྔ་དང་མཉམ་དུ་ཤི་བ་ལ།དངོས་མེད་ལུས་གཞན་སྐྱེས་ཕྱིར་རོ།།དམག་ལ་སོགས་པར་དོན་གཅིག་ཕྱིར།།ཐམས་ཅད་བྱེད་པ་པོ་བཞིན་ལྡན།།སྲོག་གཅོད་པ་ནི་བསམས་བཞིན་དུ།།མ་ནོར་བར་ནི་གཞན་བསད་པའོ།།མ་བྱིན་ལེན་པ་གཞན་གྱི་ནོར།།མཐུ་དང་འཇབ་བུས་བདག་གིར་བྱེད།།བགྲོད་མིན་འགྲོ་བར་འདོད་པ་ཡིས།།ལོག་པར་གཡེམ་པ་རྣམ་པ་བཞི།།རྫུན་ཚིག་འདུ་ཤེས་གཞན་བསྒྱུར་བའི།།ཚིག་དོན་མངོན་པར་གོ་བའོ།།མིག་རྣ་ཡིད་ཀྱི་རྣམ་ཤེས་དང་།།གསུམ་གྱིས་ཉམས་སུ་མྱོང་གང་དེ།།མཐོང་ཐོས་རྣམ་པར་ཤེས་པ་དང་།།རྟོགས་པ་ཡིན་ཏེ་རིམ་བཞིན་བཤད།།ཕྲ་མ་ཕ་རོལ་དབྱེ་བའི་ཕྱིར།།ཉོན་མོངས་ཅན་གྱི་སེམས་ཀྱི་ཚིག།ཚིག་རྩུབ་པོ་ནི་མི་སྙན་པ།།ཉོན་མོངས་ཅན་ཀུན་ཀྱལ་པ་ཉིད།།གཞན་ནི་དེ་ལས་གཞན་ཉོན་མོངས།།ཁ་གསག་གླུ་དང་ཟློས་གར་བཞིན།།བསྟན་བཅོས་ངན་བཞིན་བརྣབ་སེམས་ནི།ལོག་པས་ཞེན་གྱི་ནོར་ལ་ཆགས།།གནོད་སེམས་སེམས་ཅན་ལ་སྡང་བ།།དགེ་དང་མི་དགེ་མེད་ལྟ་བ།།ལོག་པར་ལྟ་བ་ཡིན་འདི་ལ།།གསུམ་ལམ་བདུན་ནི་ལས་ཀྱང་ཡིན།།མེད་པར་ལྟ་བས་རྩ་བ་གཅོད།།འདོད་གཏོགས་སྐྱེས་ནས་ཐོབ་པ་རྣམས།།རྒྱུ་དང་འབྲས་ལ་སྐུར་འདེབས་པས།།ཀུན་གྱིས་རིམ་གྱིས་མིའི་ནང་དུ།།སྐྱེས་པ་བུད་མེད་ཀྱིས་གཅོད་དོ།།ལྟ་སྤྱད་དེ་ནི་མི་ལྡན་པའོ།།མཚམས་ནི་ཐེ་ཚོམ་ཡོད་ལྟ་བས།།མཚམས་མེད་བྱེད་པའི་འདི་ལ་མིན།།མི་དགེ་བརྒྱད་ཀྱི་བར་དག་དང་།།སེམས་པ་ཅིག་ཅར་ལྷན་ཅིག་འབྱུང་།།དགེ་བ་བཅུ་ཡི་བར་དག་དང་།།གཅིག་དང་བརྒྱད་དང་ལྔ་དང་མིན།།དམྱལ་བ་ན་ནི་འཁྱལ་པ་དང་།།ཚིག་རྩུབ་གནོད་སེམས་རྣམ་གཉིས་སོ།།བརྣབ་སེམས་ལོག་ལྟ་ལྡན་པས་སོ།།སྒྲ་མི་སྙན་ན་གསུམ་ཡོད་དེ།།དེ་ན་བདུན་པ་དངོས་སུ་ཡང་།།འདོད་པ་གཞན་ན་མི་དགེ་བཅུ།།དགེ་བ་གསུམ་ནི་ཐམས་ཅད་ན།།རྙེད་དང་མངོན་དུ་གྱུར་སྒོ་ནས།།གཟུགས་མེད་འདུ་ཤེས་མེད་སེམས་ཅན།།རྙེད་པས་བདུན་ཡོད་ལྷག་བྱས་ན།།མངོན་དུ་གྱུར་པའི་སྒོ་ནས་ཀྱང་།།དམྱལ་བཅས་སྒྲ་མི་སྙན་མ་གཏོགས།།ཐམས་ཅད་བདག་པོ་རྒྱུ་མཐུན་དང་།།རྣམ་སྨིན་འབྲས་བུ་འབྱིན་པར་འདོད།།སྡུག་བསྔལ་ཕྱིར་དང་བསད་ཕྱིར་དང་།།གཟི་བྱིན་མེད་ཕྱིར་འབྲས་རྣམ་གསུམ།།ལུས་དང་ངག་ལས་ཆགས་ལས་སྐྱེས།ལོག་འཚོ་སྦྱང་དཀའི་ཕྱིར་ལོགས་ཤིག།བསྟན་ཏོ་གལ་ཏེ་ཡོ་བྱད་ལ།ཆགས་བསླང་མདོ་དང་འགལ་ཕྱིར་མིན།།དྲི་བཅས་སྤོང་བའི་ལམ་དག་ནི།།ལས་ནི་ལྔ་ཡི་འབྲས་བུར་བཅས།།དྲི་མེད་བཞི་ཡི་ཟག་བཅས་གཞན།།དགེ་དང་མི་དགེ་གང་ཡིན་པའང་།།ཟག་པ་མེད་པ་ལྷག་མ་དང་།།ལུང་བསྟན་མིན་གང་གསུམ་གྱིས་སོ།།དགེ་བའི་དགེ་ལ་སོགས་པ་ནི།།བཞི་དང་གཉིས་དང་དེ་བཞིན་གསུམ།།མི་དགེའི་དགེ་སོགས་གཉིས་དང་ནི།།གསུམ་དང་བཞི་སྟེ་རིམ་པ་བཞིན།།ལུང་བསྟན་མིན་གྱི་དགེ་ལ་སོགས།དེ་དག་གཉིས་དང་གསུམ་དང་གསུམ།།འདས་པའི་ཐམས་ཅད་བཞི་ཡིན་ནོ།།བར་མ་ཡི་ནི་མ་འོངས་པའང་།།བར་མ་གཉིས་སོ་མ་སྐྱེས་པའི།།འབྲས་བུ་མ་འོངས་གསུམ་ཡིན་ནོ།།རང་གི་ས་པའི་བཞི་ཡིན་ནོ།།གཞན་གྱི་ས་པ་གསུམ་དང་གཉིས།།སློབ་པའི་སློབ་ལ་སོགས་པ་གསུམ།།མི་སློབ་ལས་ཀྱི་འབྲས་བུ་ནི།།སློབ་པ་ཡི་ནི་ཆོས་ལ་སོགས།།གཅིག་དང་གསུམ་དང་གཉིས་ཡིན་ནོ།།དེ་ལས་གཞན་པའི་འབྲས་བུ་ནི།།སློབ་སོགས་གཉིས་དང་གཉིས་དང་ལྔ།།མཐོང་བས་སྤང་བྱའི་དེ་ལ་སོགས།།གསུམ་དང་བཞི་དང་གཅིག་ཡིན་ནོ།།སྒོམ་པས་སྤང་བར་བྱ་ལས་ཀྱི།དེ་དག་གཉིས་དང་བཞི་དང་གསུམ།།སྤང་བྱ་མིན་པའི་དེ་དག་གཅིག།གཉིས་དང་བཞི་སྟེ་གོ་རིམ་བཞིན།།རིགས་མིན་བསྐྱེད་པ་ཉོན་མོངས་ཅན།།ཁ་ཅིག་ཆོ་ག་ཉམས་པའང་ཞེའོ།།གཅིག་གིས་སྐྱེ་བ་གཅིག་འཕེན་ཏོ།།ཡོངས་རྫོགས་བྱེད་པ་དུ་མ་ཡིན།།སེམས་མེད་སྙོམས་པར་འཇུག་པ་དག།འཕེན་བྱེད་མ་ཡིན་ཐོབ་པའང་མིན།།མཚམས་མེད་པ་ཡི་ལས་རྣམས་དང་།།ཉོན་མོངས་ཤས་ཆེན་ངན་འགྲོ་དང་།།འདུ་ཤེས་མེད་པའི་སེམས་ཅན་དང་།།སྒྲ་མི་སྙན་སྒྲིབ་གསུམ་དུ་འདོད།།མཚམས་མེད་གླིང་གསུམ་དག་ན་ཡོད།།ཟ་མ་སོགས་ལ་མི་འདོད་དོ།།ཕན་དང་ངོ་ཚ་ཆུང་བའི་ཕྱིར།།ལྷག་མ་འགྲོ་བ་ལྔ་དག་ན།།དགེ་འདུན་དབྱེན་ནི་མི་འཕྲོད་པའི།།རང་བཞིན་ལྡན་པ་མ་ཡིན་ཆོས།།ཉོན་མོངས་ཅན་མིན་ལུང་བསྟན་མིན།།དེ་དང་དགེ་འདུན་ཡང་དག་ལྡན།།དེ་ཡི་ཁ་ན་མ་ཐོ་རྫུན།།དེ་དང་འབྱེད་པོ་ཡང་དག་ལྡན།།བསྐལ་པར་མནར་མེད་པར་སྨིན་འགྱུར།།ལྷག་པས་གནོད་པ་ལྷག་པར་འགྱུར།།དགེ་སློང་ལྟ་སྤྱོད་ཚུལ་ལྡན་པས།།འབྱེད་དོ་གཞན་དུའོ་བྱིས་པ་རྣམས།།སྟོན་དང་ལམ་གཞན་ལ་བཟོད་པ།།བྱེ་བའོ་དེ་ནི་མི་གནས་སོ།།དེ་ནི་འཁོར་ལོའི་དབྱེན་དུ་འདོད།།འཛམ་བུའི་གླིང་ནའོ་དགུ་སོགས་ཀྱིས།།ལས་ཀྱི་དབྱེན་ནི་གླིང་གསུམ་ན།།དེ་ནི་བརྒྱད་དག་ཡན་ཆད་ཀྱིས།།དང་པོ་མཐའ་སྐྱོན་ཟུང་གཅིག་གི།སྔ་རོལ་ཐུབ་པ་ནོངས་པ་དང་།།མཚམས་མ་བཅད་པ་དག་ཏུ་ཡང་།།འཁོར་ལོའི་དབྱེན་ནི་མི་འབྱུང་ངོ་།།ཕན་འདོགས་པ་དང་ཡོན་ཏན་ཞིང་།།སྤངས་དང་མེད་པར་བྱས་ཕྱིར་རོ།།མཚན་ནི་གཞན་དུ་གྱུར་ཀྱང་འགྱུར།།གང་གི་ཟླ་མཚན་ལས་བྱུང་མ།།སངས་རྒྱས་རྡེག་པར་སེམས་ལ་མིན།།བསྣུན་འོག་དགྲ་བཅོམ་པ་ལ་མིན།།མཚམས་མེད་སྦྱོར་བ་བྱས་པ་ལ།།འདོད་ཆགས་བྲལ་འབྲས་མི་སྲིད་དོ།།དགེ་འདུན་དབྱེ་ཕྱིར་རྫུན་སྨྲ་བ།ཁ་ན་མ་ཐོ་རབ་ཆེར་འདོད།།འཇིག་རྟེན་པ་ཡི་དགེ་བ་ལ།།སྲིད་རྩེའི་སེམས་པ་འབྲས་རབ་ཆེ།།མ་དགྲ་བཅོམ་མ་སུན་བྱས་དང་།།བྱང་ཆུབ་སེམས་དཔའ་ངེས་གནས་དང་།།སློབ་པ་གསོད་དང་དགེ་འདུན་གྱི།།འདུ་བའི་སྒོ་ནི་འཕྲོག་པ་དག།མཚམས་མེད་པ་དང་ཆ་འདྲ་དེ།།ལྔ་པ་མཆོད་རྟེན་འཇིག་པ་ཡིན།།བཟོད་དང་ཕྱིར་མི་འོང་དགྲ་བཅོམ།།ཐོབ་ལ་ལས་གེགས་ཤིན་ཏུ་བྱེད།།གང་ནས་བྱང་ཆུབ་སེམས་དཔའ་ཡིན།།གང་ནས་མཚན་གྱི་ལས་བྱེད་པ།།བདེ་འགྲོ་རིགས་མཐོར་སྐྱེ་དབང་ཚང་།།ཕོར་འགྱུར་ཚེ་རབས་དྲན་མི་ལྡོག།དེ་ནི་འཛམ་གླིང་ཕོར་གྱུར་ཉིད།།མངོན་སུམ་སངས་རྒྱས་ལ་སེམས་པ།།བསམ་པ་ལས་བྱུང་བསྐལ་པ་བརྒྱ།།ལུས་པ་དག་ཏུ་འཕེན་པར་བྱེད།།རེ་རེའང་བསོད་ནམས་བརྒྱ་ལས་སྐྱེས།།རྣམ་གཟིགས་མར་མེ་རིན་ཆེན་གཙུག།གྲངས་མེད་གསུམ་གྱི་ཐ་མར་བྱུང་།།དང་པོ་ཤཱཀྱ་ཐུབ་པ་ཡིན།།ཀུན་ལ་ཐམས་ཅད་སྙིང་རྗེ་ཡིས།།སྦྱིན་པར་བྱེད་པས་སྦྱིན་པ་རྫོགས།།ཆགས་བཅས་ཡན་ལག་བཅད་ཀྱང་ནི།།མི་འཁྲུག་བཟོད་དང་ཚུལ་ཁྲིམས་ཀྱི།།སྐར་རྒྱལ་བསྟོད་པས་བརྩོན་འགྲུས་ཀྱི།།དེ་མ་ཐག་ལ་ཏིང་འཛིན་བློའི།།གསུམ་པོ་བསོད་ནམས་བྱ་བ་དང་།དེའི་གཞི་དཔེར་ན་ལས་ལམ་བཞིན།།གང་གི་སྦྱིན་བྱེད་དེ་སྦྱིན་པ།།མཆོད་དང་ཕན་གདགས་འདོད་པ་ཡིས།།ལུས་དང་ངག་ལས་སློང་དང་བཅས།།དེ་འབྲས་ལོངས་སྤྱོད་ཆེན་པོ་ཅན།།བདག་གཞན་དོན་ཕྱིར་གཉིས་དོན་ཕྱིར།།གཉིས་ཀའི་དོན་དུ་མིན་ཕྱིར་སྦྱིན།།དེ་ཡི་ཁྱད་པར་སྦྱིན་བདག་དང་།།དངོས་དང་ཞིང་གི་ཁྱད་པར་ལས།།སྦྱིན་བདག་ཁྱད་འཕགས་དད་སོགས་ཀྱིས།།གུས་ལ་སོགས་པས་སྦྱིན་པར་བྱེད།།དེ་ཕྱིར་བཀུར་སྟི་རྒྱ་ཆེན་དང་།།དུས་དང་བར་ཆད་མེད་པར་རྙེད།།ཁ་དོག་ལ་སོགས་ཕུན་སུམ་དངོས།།དེ་ལས་གཟུགས་བཟང་གྲགས་ལྡན་དང་།།དགའ་དང་ཤིན་ཏུ་གཞོན་ཤ་དང་།།དུས་སུ་རེག་ན་བདེ་ལུས་འགྱུར།།འགྲོ་དང་སྡུག་བསྔལ་ཕན་འདོགས་དང་།།ཡོན་ཏན་རྣམས་ཀྱིས་ཞིང་ཁྱད་འཕགས།།མཆོག་ནི་གྲོལ་བས་གྲོལ་བ་འམ།།བྱང་ཆུབ་སེམས་དཔའ་ཡིས་བརྒྱད་པ།།འཕགས་པ་མིན་ཡང་ཕ་མ་དང་།།ནད་པ་དང་ནི་ཆོས་སྨྲ་དང་།།སྐྱེ་མཐའི་བྱང་ཆུབ་སེམས་དཔའ་ལ།།ཡོན་ནི་གཞལ་དུ་མེད་པ་ཡིན།།མཇུག་དང་ཞིང་དང་གཞི་དང་ནི།།སྦྱོར་དང་སེམས་པ་བསམ་པ་སྟེ།།དེ་དག་ཆུང་དང་ཆེ་བ་ལས།།ལས་ཀྱང་ཆུང་དང་ཆེ་བ་ཉིད།།བསམས་བཞིན་པ་དང་རྫོགས་པ་དང་།།མི་འགྱོད་གཉེན་པོ་མེད་པ་དང་།།འཁོར་དང་རྣམ་པར་སྨིན་པ་ལས།།བསགས་པའི་ལས་ཞེས་བྱ་བ་ཡིན།།མཆོད་རྟེན་ལ་བཏང་རྒྱུས་བྱུང་བའི།།བསོད་ནམས་ལེན་མེད་བྱམས་སོགས་བཞིན།།རྒྱུ་ལས་འབྲས་བུ་མི་འཁྲུལ་ཕྱིར།།ངན་པའི་ཞིང་ལའང་འབྲས་ཡིད་འོང་།།འཆལ་པའི་ཚུལ་ཁྲིམས་མི་དགེའི་གཟུགས།།དེ་སྤོང་ཚུལ་ཁྲིམས་རྣམ་གཉིས་སོ།།སངས་རྒྱས་ཀྱིས་ནི་བཅད་པ་ཡང་།།རྣམ་དག་ཡོན་ཏན་བཞི་ལྡན་ནོ།།འཆལ་ཁྲིམས་དེའི་རྒྱུས་འཕེན་མ་ཕྱུང་།།དེ་གཉེན་པོ་དང་ཞི་ལ་བརྟེན།།མཉམ་པར་བཞག་པའི་དགེ་བ་ནི།།སྒོམ་པའོ་སེམས་ལ་བསྒོས་ཕྱིར་རོ།།མཐོ་རིས་དོན་དུ་ཚུལ་ཁྲིམས་དང་།།འབྲལ་བའི་དོན་དུ་སྒོམ་གཙོའི་ཕྱིར།།བསྐལ་པར་མཐོ་རིས་དགའ་གནས་ཕྱིར།།བཞི་ཡི་ཚངས་པའི་བསོད་ནམས་ཡིན།།ཆོས་སྦྱིན་ཉོན་མོངས་ཅན་མིན་པས།།མདོ་སོགས་ཡང་དག་ཇི་བཞིན་སྟོན།།བསོད་ནམས་མྱ་ངན་འདས་པ་དང་།།ངེས་འབྱེད་ཆ་མཐུན་དགེ་རྣམ་གསུམ།།རིགས་པས་རབ་ཏུ་བཅུག་པའི་ལས།།རྣམ་གསུམ་ཀུན་སློང་བཅས་པ་ནི།།ཡིག་འབྲུ་རྒྱ་དང་བགྲང་བཅས་པའི།།སྙན་ངག་གྲངས་ཏེ་གོ་རིམ་བཞིན།།སྒྲིབ་ངན་ཁ་ན་མ་ཐོ་བཅས།།ཉོན་མོངས་ཅན་ཆོས་དྲི་མེད་དགེ།གྱ་ནོམ་འདུས་བྱས་དགེ་བསྟེན་བྱ།།ཐར་པ་བླ་ན་མེད་པ་ཡིན།།ཆོས་མངོན་པའི་མཛོད་ཀྱི་ཚིག་ལེའུར་བྱས་པ་ལས་ལས་བསྟན་པ་ཞེས་བྱ་བ་སྟེ་གནས་བཞི་པའོ།།།། གནས་ལྔ་བ་ཕྲ་རྒྱས་བསྟན་པ། ༈སྲིད་པའི་རྩ་བ་ཕྲ་རྒྱས་དྲུག།འདོད་ཆགས་དེ་བཞིན་ཁོང་ཁྲོ་དང་།།ང་རྒྱལ་མ་རིག་ལྟ་བ་དང་།།ཐེ་ཚོམ་ཡིན་ཏེ།།དེ་དྲུག་ཀྱང་།།འདོད་ཆགས་དབྱེ་བས་བདུན་དུ་བཤད།།ཁམས་གཉིས་ལས་སྐྱེས་སྲིད་འདོད་ཆགས།།ཁ་ནི་ནང་དུ་བལྟས་ཕྱིར་དེར།།ཐར་པའི་འདུ་ཤེས་ལྡོག་ཕྱིར་བཤད།།ལྟ་བ་ལྔ་སྟེ་འཇིག་ཚོགས་དང་།།ལོག་དང་མཐར་འཛིན་ལྟ་བ་དང་།།ལྟ་བ་དང་ནི་ཚུལ་ཁྲིམས་དང་།།བརྟུལ་ཞུགས་མཆོག་ཏུ་འཛིན་དང་བཅུ།།དེ་དག་བཅུ་དང་བདུན་བདུན་བརྒྱད།།ལྟ་བ་གསུམ་གཉིས་མ་གཏོགས་པ།།འདོད་ན་སྡུག་བསྔལ་ལ་སོགས་པ།།མཐོང་བས་རིམ་བཞིན་སྤོང་བར་བྱེད།།བཞི་ནི་སྒོམ་པས་སྤང་བྱ་ཡིན།།ཁོང་ཁྲོ་མ་གཏོགས་དེ་དག་ཉིད།།གཟུགས་ཁམས་གཟུགས་མེད་དེ་དང་འདྲ།།དེ་ལྟར་དགུ་བཅུ་བརྒྱད་དུ་འདོད།།སྲིད་རྩེ་ལས་སྐྱེས་བཟོད་པ་ཡིས།།གཞོམ་བྱ་མཐོང་བས་སྤང་བྱ་ཉིད།།ལྷག་སྐྱེས་མཐོང་དང་སྒོམ་གཉིས་ཀྱིས།།བཟོད་པས་གཞོམ་མིན་སྒོམ་ཁོ་ནས།།བདག་དང་བདག་གིར་རྟག་ཆད་དང་།།མེད་དང་དམན་ལ་མཆོག་ལྟ་དང་།།རྒྱུ་མིན་ལམ་མིན་དེར་ལྟ་བ།།དེ་དག་ལྟ་བ་ལྔ་ཡིན་ནོ།།དབང་ཕྱུག་སོགས་རྒྱུར་མངོན་ཞེན་པ།།རྟག་བདག་ཕྱིན་ཅི་ལོག་པ་ཡིས།།རབ་ཏུ་འཇུག་པས་དེ་ཕྱིར་དེ།།སྡུག་བསྔལ་མཐོང་བས་སྤང་བྱ་ཉིད།།ལྟ་བ་གསུམ་ལས་ཕྱིན་ཅི་ལོག།བཞི་ཚན་ཕྱིན་ཅི་ལོག་ཕྱིར་དང་།།ངེས་རྟོག་ཕྱིར་དང་སྒྲོ་འདོགས་ཕྱིར།།སེམས་དང་འདུ་ཤེས་དེའི་དབང་གིས།།ང་རྒྱལ་བདུན་རྣམ་དགུ་གསུམ་པོ།།མཐོང་དང་སྒོམ་པས་ཟད་བྱ་བ།།སྒོམ་པས་སྤང་བར་བྱ་བ་ནི།།གསོད་སོགས་ཀུན་ནས་དཀྲིས་པའོ།།དེ་བཞིན་འཇིག་སྲེད་འཕགས་པ་ལ།།རྣམ་སོགས་ངའོ་སྙམ་མི་འབྱུང་།།ལྟ་བས་རྒྱས་པར་འགྱུར་ཕྱིར་རོ།།མི་དགེའི་འགྱོད་པའང་མ་ཡིན་ནོ།།སྡུག་བསྔལ་རྒྱུ་མཐོང་སྤང་བྱ་བ།།ལྟ་དང་དེ་བཞིན་ཐེ་ཚོམ་དང་།།གང་དེ་ལྷན་ཅིག་མ་འདྲེས་པའི།།མ་རིག་གང་ཡིན་ཀུན་ཏུ་འགྲོ།།དེ་དག་ལས་དགུ་གོང་དུ་དམིགས།།ལྟ་བ་གཉིས་པོ་མ་གཏོགས་སོ།།དེ་དག་དང་ནི་ལྷན་ཅིག་གང་།།འབྱུང་དེའང་ཀུན་འགྲོ་ཐོབ་མ་གཏོགས།།འགོག་དང་ལམ་མཐོང་སྤང་བྱ་བ།།ལོག་ལྟ་ཐེ་ཚོམ་དེ་དག་དང་།།ལྡན་དང་འབའ་ཞིག་མ་རིག་དང་།།དྲུག་ནི་ཟག་མེད་སྤྱོད་ཡུལ་ཅན།།རང་གི་ས་པའི་འགོག་པ་དང་།།ལམ་ནི་ཕན་ཚུན་རྒྱུ་ཡིན་པས།།ས་དྲུག་ས་དགུའི་ལམ་ནི་དེའི།།སྤྱོད་ཡུལ་ཅན་གྱི་ཡུལ་ཡིན་ནོ།།འདོད་ཆགས་མིན་ཏེ་སྤང་བྱའི་ཕྱིར།།གནོད་མི་བྱེད་ཕྱིར་ཞེ་སྡང་མིན།།ཞི་དང་དག་དང་མཆོག་གྱུར་ཕྱིར།།ང་རྒྱལ་མ་ཡིན་མཆོག་འཛིན་མིན།།ཕྲ་རྒྱས་ཀུན་ཏུ་འགྲོ་རྣམས་ནི།།དམིགས་པའི་སྒོ་ནས་རང་གི་ས།།ཐམས་ཅད་དུ་ནི་རྒྱས་པར་འགྱུར།།ཀུན་འགྲོ་མ་ཡིན་རང་རིས་སུ།།ཟག་མེད་གོང་མའི་ཡུལ་ཅན་མིན།།བདག་གིར་མ་བྱས་གཉེན་པོའི་ཕྱིར།།གང་ཞིག་གང་དང་མཚུངས་ལྡན་པ།།དེ་ནི་དེར་མཚུངས་ལྡན་སྒོ་ནས།།གོང་མ་ཐམས་ཅད་ལུང་མ་བསྟན།།འདོད་ན་འཇིག་ཚོགས་ལྟ་བ་དང་།།མཐར་འཛིན་ལྷན་ཅིག་མ་རིག་པ།།ལྷག་མ་རྣམས་འདིར་མི་དགེ་བའོ།།འདོད་ན་འདོད་ཆགས་ཁོང་ཁྲོ་དང་།།རྨོངས་རྣམས་མི་དགེའི་རྩ་བ་ཡིན།།ལུང་མ་བསྟན་པའི་རྩ་བ་གསུམ།དེ་ནི་སྲེད་དང་མ་རིག་བློ།།རྣམ་གཉིས་མཐོར་འཇུག་ཕྱིར་དེ་ལས།།གཞན་མིན་བཞི་ཞེས་ཉི་འོག་པ།དེ་དག་སྲེད་ལྟ་ང་རྒྱལ་རྨོངས།།བསམ་གཏན་པ་གསུམ་མ་རིག་ལས།།མགོ་གཅིག་དང་ནི་རྣམ་ཕྱེ་དང་།དྲི་དང་བཞག་པར་ལུང་བསྟན་པ།།འཆི་དང་སྐྱེ་དང་ཁྱད་པར་འཕགས།།བདག་གཞན་ལ་སོགས་ལྟ་བུ་ཡིན།།འདས་དང་ཉེར་གནས་འདོད་ཆགས་དང་།།ཁོང་ཁྲོ་ང་རྒྱལ་དག་གིས་ནི།།གང་ལ་དེ་སྐྱེས་མ་སྤངས་པའི།།དངོས་པོ་དེ་དང་ལྡན་པ་ཡིན།།ཡིད་ཀྱི་དེ་དག་མ་འོངས་པས།།ཀུན་དང་གཞན་གྱི་རང་དུས་པ།།མི་སྐྱེ་རྣམས་ཀྱི་ཐམས་ཅད་དང་།།ལྷག་མ་ཀུན་གྱིས་ཀུན་དང་ལྡན།།དུས་རྣམས་ཀུན་ཏུ་ཡོད་གསུངས་ཕྱིར།།གཉིས་ཕྱིར་ཡུལ་ཡོད་ཕྱིར་འབྲས་ཕྱིར།།དེ་ཡོད་སྨྲ་བའི་ཕྱིར་ཐམས་ཅད།།ཡོད་པར་སྨྲ་བར་འདོད་དེ་དག།རྣམ་བཞི་དངོས་དང་མཚན་ཉིད་དང་།།གནས་སྐབས་གཞན་གཞན་འགྱུར་ཞེས་བྱ།།གསུམ་པ་བཟང་སྟེ་བྱ་བ་ཡིས།།དུས་རྣམས་རྣམ་གཞག་གེགས་སུ་བྱེད།དེ་ཡང་ཇི་ལྟར་གཞན་མ་ཡིན།།དུས་སུ་མི་རུང་དེ་བཞིན་དུ།།ཡོད་ན་ཅི་ཕྱིར་མ་སྐྱེས་ཞིག།ཆོས་ཉིད་དག་ནི་ཟབ་པ་ཡིན།།སྡུག་བསྔལ་མཐོང་སྤང་བྱ་སྤངས་ཀྱང་།།ཀུན་འགྲོ་ལྷག་མ་རྣམས་ཀྱི་ལྡན།།དང་པོའི་རྣམ་པ་སྤངས་ཀྱང་དེའི།།ཡུལ་ཅན་དྲི་མ་ལྷག་རྣམས་ཀྱིས།།སྡུག་བསྔལ་རྒྱུ་མཐོང་གོམས་པ་ཡིས།།སྤང་བྱ་འདོད་ཁམས་ལས་སྐྱེས་པ།།རང་གི་གསུམ་དང་གཟུགས་གཏོགས་གཅིག།དྲི་མེད་རྣམ་ཤེས་སྤྱོད་ཡུལ་ལོ།།གཟུགས་ཁམས་ལས་སྐྱེས་རང་གི་དང་།།འོག་གསུམ་གོང་གཅིག་དྲི་མེད་ཀྱིའང་།།གཟུགས་མེད་ལས་སྐྱེས་ཁམས་གསུམ་གཏོགས།།གསུམ་དང་ཟག་མེད་སྤྱོད་ཡུལ་ལོ།།འགོག་དང་ལམ་མཐོང་སྤང་བྱ་ཀུན།།རང་གིས་གླགས་པའི་སྤྱོད་ཡུལ་ལོ།།ཟག་མེད་ཁམས་གསུམ་མཐའ་གསུམ་དང་།།ཟག་པ་མེད་པའི་སྤྱོད་ཡུལ་ལོ།།ཉོན་མོངས་ཕྲ་རྒྱས་བཅས་རྣམ་གཉིས།།ཉོན་མོངས་ཅན་མིན་རྒྱས་འགྱུར་གྱིས།།རྨོངས་ལས་ཐེ་ཚོམ་དེ་ནས་ནི།།ལོག་ལྟ་དེ་ནས་འཇིག་ཚོགས་ལྟ།།དེ་ནས་མཐར་འཛིན་དེ་ནས་ནི།།ཚུལ་ཁྲིམས་མཆོག་འཛིན་དེ་ནས་ལྟ།།རང་གི་ལྟ་ལ་ང་རྒྱལ་ཆགས།།གཞན་ལ་ཞེ་སྡང་དེ་ལྟར་རིམ།།ཕྲ་རྒྱས་སྤངས་པ་མ་ཡིན་དང་།།ཡུལ་ནི་ཉེ་བར་གནས་པ་དང་།།ཚུལ་བཞིན་མ་ཡིན་ཡིད་བྱེད་ལས།།ཉོན་མོངས་རྒྱུ་ནི་ཚང་བ་ཡིན།།འདོད་ན་གཏི་མུག་མ་གཏོགས་པའི།།ཉོན་མོངས་ཀུན་ནས་དཀྲིས་བཅས་ཟག།གཟུགས་དང་གཟུགས་ནི་མེད་པ་ན།།ཕྲ་རྒྱས་ཁོ་ན་སྲིད་པའི་ཟག།དེ་ལུང་མ་བསྟན་ཁ་ནང་བལྟས།།མཉམ་གཞག་ས་པའི་ཕྱིར་གཅིག་བྱས།།རྩ་བ་མ་རིག་ཡིན་པས་ན།།ལོགས་ཤིག་ཏུ་ནི་ཟག་པར་བསྟན།།ཆུ་བོ་སྦྱོར་བའང་དེ་བཞིན་དུ།།ལྟ་རྣམས་གསལ་ཕྱིར་ལོགས་ཤིག་བསྟན།།ཟག་པར་མ་ཡིན་གྲོགས་མེད་རྣམས།།འཇོག་པའི་རྗེས་སུ་མི་མཐུན་ལོ།།ཇི་སྐད་བཤད་ཉིད་མ་རིག་བཅས།།ཉེར་ལེན་རྣམས་ཏེ་ལྟ་རྣམ་གཉིས།།ཕྱེ་བའི་ཕྱིར་རོ་མ་རིག་པ།།འཛིན་པར་བྱེད་པ་མིན་ཕྱིར་བསྲེས།།གང་ཕྱིར་དེ་དག་ཕྲ་བ་དང་།།རྗེས་འབྲེལ་རྣམ་གཉིས་རྒྱས་འགྱུར་དང་།།རྗེས་སུ་འབྲང་བས་དེ་ཡི་ཕྱིར།།ཕྲ་རྒྱས་དག་ཏུ་བཤད་པ་ཡིན།།དེ་དག་འཇོག་བྱེད་ཟག་བྱེད་དང་།།འཁྱེར་བར་བྱེད་དང་འབྱར་བྱེད་དང་།།ཉེ་བར་འཛིན་ཕྱིར་ཟག་ལ་སོགས།།དེ་དག་གི་ནི་ངེས་ཚིག་ཡིན།།དེ་དག་ཀུན་ཏུ་སྦྱོར་སོགས་ཀྱི།།དབྱེ་བས་ཡང་རྣམ་ལྔར་བཤད་དོ།།རྫས་དང་མཆོག་འཛིན་འདྲ་བའི་ཕྱིར།།ལྟ་གཉིས་ཀུན་ཏུ་སྦྱོར་གཞན་ནོ།།གང་ཕྱིར་གཉིས་ཀའང་གཅིག་ཏུ་ནི།།མི་དགེ་རང་དབང་དེ་ཡི་ཕྱིར།།ཕྲག་དོག་སེར་སྣ་དེ་དག་ལས།།ལོགས་ཤིག་ཀུན་སྦྱོར་གཉིས་སུ་བཤད།།ཐ་མའི་ཆ་དང་མཐུན་རྣམ་ལྔ།།གཉིས་ཀྱིས་འདོད་ལས་མི་འདའ་ལ།།གསུམ་པོ་ཡིས་ནི་ཕྱིར་ལྡོག་བྱེད།།སྒོ་དང་རྩ་བ་བསྡུས་ཕྱིར་གསུམ།།འགྲོ་མི་འདོད་དང་ལམ་ནོར་དང་།།ལམ་ལ་ཐེ་ཚོམ་དེ་སྙེད་ཅིག།ཐར་པ་བགྲོད་ལ་གེགས་བྱེད་པ།།དེ་ཡི་ཕྱིར་ན་གསུམ་བསྟན་ཏོ།།གོང་མའི་ཆ་དང་མཐུན་ལྔ་ཉིད།།གཟུགས་དང་གཟུགས་མེད་ལས་སྐྱེས་པའི།།འདོད་ཆགས་གཉིས་རྒོད་ང་རྒྱལ་རྨོངས།།ཚོར་བའི་དབང་གིས་འཆིང་བ་གསུམ།།ཉོན་མོངས་ལས་གཞན་ཉོན་མོངས་ཅན།།སེམས་བྱུང་འདུ་བྱེད་ཕུང་ཞེས་པ།།གང་དེའང་ཉེ་བའི་ཉོན་མོངས་ཏེ།།དེ་དག་ཉོན་མོངས་ཞེས་མི་བྱ།།ངོ་ཚ་མེད་དང་ཁྲེལ་མེད་དང་།།ཕྲག་དོག་སེར་སྣ་རྒོད་པ་དང་།།འགྱོད་དང་རྨུགས་དང་གཉིད་དང་ནི།།ཀུན་ནས་དཀྲིས་པ་རྣམ་པ་བརྒྱད།།ཁྲོ་དང་འཆབ་པའོ་འདོད་ཆགས་ཀྱིས།།ངོ་ཚ་མེད་རྒོད་སེར་སྣ་བསླང་།།འཆབ་པ་རྩོད་དོ་མ་རིག་ལས།།རྨུགས་དང་གཉིད་དང་ཁྲེལ་མེད་དོ།།ཐེ་ཚོམ་ལས་འགྱོད་ཁྲོ་བ་དང་།།ཕྲག་དོག་ཁོང་ཁྲོའི་རྒྱུ་ལས་བྱུང་།།གཞན་ཡང་ཉོན་མོངས་དྲི་མ་དྲུག།སྒྱུ་དང་གཡོ་དང་རྒྱགས་པ་དང་།།དེ་བཞིན་འཚིག་དང་འཁོན་འཛིན་དང་།།རྣམ་འཚེ་སྒྱུ་དང་རྒྱགས་པ་ནི།།འདོད་ཆགས་ལས་སྐྱེས་འཁོན་འཛིན་དང་།།རྣམ་འཚེ་ཁོང་ཁྲོ་ལས་སྐྱེས་སོ།།འཚིག་པ་ལྟ་བ་མཆོག་འཛིན་ལས།།གཡོ་ནི་ལྟ་བས་ཀུན་ནས་བསླང་།།དེ་ལས་ངོ་ཚ་མེད་པ་དང་།།ཁྲེལ་མེད་རྨུགས་གཉིད་རྒོད་རྣམ་གཉིས།།དེ་ལས་གཞན་ནི་སྒོམ་སྤང་བྱ།།རང་དབང་དེ་བཞིན་དྲི་མ་རྣམས།།འདོད་ན་མི་དགེ་གསུམ་རྣམ་གཉིས།།དེ་ཡན་ཆད་ནི་ལུང་མ་བསྟན།།འདོད་དང་བསམ་གཏན་དང་པོ་ན།།གཡོ་སྒྱུ་ཚངས་པས་འདྲིད་ཕྱིར་རོ།།རྨུགས་རྒོད་རྒྱགས་པ་ཁམས་གསུམ་ན།།གཞན་དག་འདོད་ཁམས་ལས་སྐྱེས་པ།།མཐོང་སྤང་བྱ་གཉིད་ང་རྒྱལ་བཅས།།ཡིད་ཀྱི་རྣམ་ཤེས་ས་པ་ཡིན།།ཉེ་བའི་ཉོན་མོངས་རང་དབང་ཡང་།།གཞན་ནི་རྣམ་ཤེས་དྲུག་རྟེན་ཅན།།བདེ་བ་དག་དང་འདོད་ཆགས་སུ།།མཚུངས་ལྡན་ཞེ་སྡང་ལྡོག་པའོ།།མ་རིག་པ་དག་ཐམས་ཅད་དང་།།མེད་ལྟ་ཡིད་བདེ་སྡུག་བསྔལ་དང་།།ཡིད་མི་བདེ་དང་ཐེ་ཚོམ་མོ།།གཞན་ཡིད་བདེ་དང་འདོད་ལས་སྐྱེས།།བཏང་སྙོམས་དང་ཀུན་ས་གོང་མ།།ས་ཇི་བཞིན་དུ་རང་རང་དང་།།འགྱོད་དང་ཕྲག་དོག་ཁྲོ་བ་དང་།།རྣམ་འཚེ་འཁོན་དུ་འཛིན་པ་དང་།།འཚིག་པ་ཡིད་མི་བདེ་བ་དང་།།སེར་སྣ་དག་ནི་ལྡོག་པ་ཡིན།།གཡོ་དང་སྒྱུ་དང་འཆབ་དང་གཉིད།།གཉིས་ཀ་དང་ལྡན་བདེ་དག་དང་།།རྒྱགས་པ་བཏང་སྙོམས་ཀུན་ཏུ་འགྲོ།།བཞི་པོ་གཞན་ནི་ལྔ་དག་དང་།།འདོད་ན་སྒྲིབ་རྣམས་མི་མཐུན་དང་།།ཟས་དང་བྱ་བ་གཅིག་པའི་ཕྱིར།།གཉིས་གཅིག་ཕུང་པོ་གནོད་བྱེད་དང་།།ཐེ་ཚོམ་ཕྱིར་ན་ལྔ་ཉིད་དོ།།དམིགས་པ་ཡོངས་སུ་ཤེས་པ་དང་།།དེ་ལ་དམིགས་པ་ཡང་དག་པར།།ཟད་དང་དམིགས་པ་སྤངས་པས་སོ།།གཉེན་པོ་སྐྱེས་པས་ཟད་པར་འགྱུར།།གཉེན་པོ་རྣམ་བཞི་སྤོང་བ་དང་།།གཞི་དང་བསྲིང་ཉིད་རྣམ་པར་ནི།།སུན་འབྱིན་ཞེས་བྱ་དམིགས་པ་ལས།།ཉོན་མོངས་པ་ནི་སྤང་བྱར་འདོད།།མཚན་ཉིད་མི་མཐུན་མི་མཐུན་ཕྱོགས།།ཡུལ་རྣམ་ཆད་དང་དུས་ཀྱིས་ཏེ།།འབྱུང་དང་ཚུལ་ཁྲིམས་ཕྱོགས་དང་ནི།།དུས་གཉིས་རིང་བ་ཉིད་ལྟ་བུའོ།།ལན་ཅིག་ཏུ་ཟད་དེ་དག་གི།བྲལ་བའི་ཐོབ་པ་ཡང་དང་ཡང་།།གཉེན་པོ་སྐྱེས་དང་འབྲས་ཐོབ་དང་།།དབང་པོ་རྣམ་པར་འཕེལ་རྣམས་སུ།།ཡོངས་སུ་ཤེས་དགུ་འདོད་པ་ན།།དང་པོ་རྣམ་གཉིས་ཟད་ལ་གཅིག།གཉིས་ཟད་པ་ནི་དེ་གཉིས་སོ།།དེ་བཞིན་གོང་མའི་དེ་གསུམ་ཉིད།།ཡོངས་སུ་ཤེས་པ་གཞན་གསུམ་སྟེ།།ཐ་མའི་ཆ་དང་མཐུན་གཟུགས་དང་།།ཟག་པ་ཀུན་ཟད་དྲུག་བཟོད་འབྲས།།ལྷག་མ་རྣམས་ནི་ཤེས་པའི་ཡིན།།མི་ལྕོགས་མེད་འབྲས་ཐམས་ཅད་དོ།།བསམ་གཏན་རྣམས་ཀྱི་ལྔའམ་བརྒྱད།།ཉེ་བར་བསྡོགས་པའི་གཅིག་ཡིན་ཏེ།།གཟུགས་མེད་དངོས་གཞི་གསུམ་གྱི་ཡང་།།ཐམས་ཅད་འཕགས་པའི་ལམ་གྱི་ཡིན།།འཇིག་རྟེན་པའི་གཉིས་རྗེས་ཀྱི་ཡང་།།ཆོས་ཤེས་པའི་ནི་གསུམ་ཡིན་ནོ།།དེའི་ཕྱོགས་མཐུན་གྱི་དྲུག་དང་ལྔ།།བྲལ་བའི་ཐོབ་པ་ཟག་མེད་དང་།།སྲིད་རྩེ་ཉམས་པར་བྱས་པ་དང་།།རྒྱུ་གཉིས་ཀུན་ཏུ་བཅོམ་པའི་ཕྱིར།།ཡོངས་ཤེས་ཁམས་ལས་འདས་པ་ལས།།གཅིག་མིན་མཐོང་ལ་གནས་པ་ནི།།ལྔ་ཡི་བར་དང་ཡང་དག་ལྡན།།སྒོམ་ལ་གནས་པ་དྲུག་གམ་ནི།།གཅིག་གམ་ཡང་ན་གཉིས་དང་ངོ་།།ཁམས་ལས་འདོད་ཆགས་བྲལ་བ་དང་།།འབྲས་བུ་ཐོབ་ཕྱིར་དེ་དག་བསྡོམས།།ལ་ལ་གཅིག་གཉིས་ལྔ་དང་དྲུག།གཏོང་སྟེ་ཐོབ་པ་ལྔ་མིན་ནོ།།ཆོས་མངོན་པའི་མཛོད་ཀྱི་ཚིག་ལེའུར་བྱས་པ་ལས་ཕྲ་རྒྱས་བསྟན་པ་ཞེས་བྱ་བ་སྟེ་གནས་ལྔ་པའོ།།།། གནས་དྲུག་པ་གང་ཟག་བསྟན་པ། ༈བདེན་པ་མཐོང་དང་སྒོམ་པ་ལས།།ཉོན་མོངས་སྤངས་པ་ཞེས་བཤད་པ།།སྒོམ་པའི་ལམ་ནི་རྣམ་གཉིས་ཏེ།།མཐོང་བ་ཞེས་བྱ་ཟག་པ་མེད།།བདེན་པ་དག་ནི་བཞིར་བཤད་དོ།།སྡུག་བསྔལ་ཀུན་འབྱུང་དེ་བཞིན་དུ།།འགོག་དང་ལམ་སྟེ་དེ་ལྟར་ན།།དེ་དག་ཇི་ལྟར་མངོན་རྟོགས་རིམ།།ཡིད་འོང་ཡིད་དུ་མི་འོང་དང་།།དེ་ལས་གཞན་ཟག་བཅས་རྣམས་ཉིད།།སྡུག་བསྔལ་ཉིད་གསུམ་ལྡན་པའི་ཕྱིར།།ཅི་རིགས་མ་ལུས་སྡུག་བསྔལ་ལོ།།གང་ལ་བཅོམ་དང་བློ་ཡིས་གཞན།།བསལ་ན་དེ་བློ་མི་འཇུག་པ།།བུམ་ཆུ་བཞིན་དུ་ཀུན་རྫོབ་ཏུ།།ཡོད་དེ་དོན་དམ་ཡོད་གཞན་ནོ།།ཚུལ་གནས་ཐོས་དང་བསམ་ལྡན་པས།།སྒོམ་པ་ལ་ནི་རབ་ཏུ་སྦྱོར།།ཐོས་སོགས་ལས་བྱུང་བློ་རྣམས་ནི།།མིང་དང་གཉིས་ཀ་དོན་ཡུལ་ཅན།།བསྲིང་གཉིས་ལྡན་ཆོག་མི་ཤེས་དང་།།འདོད་ཆེན་ཅན་ལ་མ་ཡིན་ནོ།།རྙེད་ལ་ཡང་སྲེད་ཆོག་མི་ཤེས།།མ་རྙེད་ལ་འདོད་འདོད་ཆེན་ཅན།།ལྡོག་པ་དེ་ཡི་གཉེན་པོ་དག།དེ་གཉིས་ཁམས་གསུམ་གཏོགས་དྲི་མེད།།མ་ཆགས་འཕགས་རིགས་དེ་དག་ལས།།གསུམ་ནི་ཆོག་ཤེས་བདག་ཉིད་དོ།།གསུམ་གྱིས་ཚུལ་བསྟན་ཐ་མས་ལས།།སྲེད་པ་སྐྱེ་བའི་གཉེན་པོའི་ཕྱིར།།བདག་གིར་བདག་འཛིན་དངོས་འདོད་པ།།དེ་ཡི་དུས་དང་གཏན་ཞིའི་ཕྱིར།།དེ་ལ་འཇུག་པ་མི་སྡུག་པ།།དབུགས་རྔུབ་འབྱུང་བ་དྲན་པ་ཡིས།།འདོད་ཆགས་རྣམ་རྟོག་ལྷག་རྣམས་སོ།།ཀེང་རུས་ཆགས་བཅས་ཐམས་ཅད་ལ།།རུས་པ་རྒྱ་མཚོའི་བར་དུ་ནི།།སྤྲོ་ཞིང་སྡུད་པས་ལས་དང་པོ།།རྐང་རུས་ནས་ནི་ཐོད་ཕྱེད་པར།།བཏང་བས་སྦྱང་བ་བྱས་པར་བཤད།།སྨིན་མའི་བར་དུ་སེམས་འཛིན་པས།།ཡིད་ལ་བྱེད་པ་རྫོགས་པ་ཡིན།།མི་སྡུག་མ་ཆགས་ས་བཅུ་དང་།།དམིགས་པ་འདོད་སྣང་མིས་སྐྱེད་དོ།།དབུགས་རྔུབ་དབུགས་འབྱུང་དྲན་པ་ནི།།ཤེས་རབ་ས་ལྔ་སྤྱོད་ཡུལ་རླུང་།།འདོད་རྟེན་ཕྱི་པའི་མ་ཡིན་ནོ།།བགྲང་ལ་སོགས་པ་རྣམ་པ་དྲུག།དབུགས་རྔུབ་དབུགས་འབྱུང་གང་ལས་ལུས།།སེམས་ཅན་ཞེས་བྱ་མ་ཟིན་པའོ།།རྒྱུ་མཐུན་ལས་བྱུང་འོག་མ་ཡི།།ཡིད་ཀྱིས་དེ་གཉིས་མ་རྟོགས་སོ།།ཞི་གནས་གྲུབ་པར་གྱུར་པ་ཡིས།།དྲན་པ་ཉེར་གཞག་བསྒོམ་པར་བྱ།།ལུས་ཚོར་སེམས་དང་ཆོས་རྣམས་ལ།།མཚན་ཉིད་གཉིས་སུ་ཡོངས་བརྟགས་པས།།ཤེས་རབ་ཐོས་སོགས་ལས་བྱུང་བའོ།།གཞན་ནི་འབྲེལ་དང་དམིགས་པ་ལས།།རིམ་ནི་ཇི་ལྟར་སྐྱེ་བ་བཞིན།།ཕྱིན་ཅི་ལོག་གི་གཉེན་པོར་བཞི།།དེ་ནི་ཆོས་དྲན་ཉེར་གཞག་པ།།སྤྱི་ལ་དམིགས་པ་ལ་གནས་ཏེ།།དེ་དག་ལ་ནི་མི་རྟག་དང་།།སྡུག་བསྔལ་སྟོང་བདག་མེད་པར་བལྟ།།དེ་ལས་དྲོ་བར་གྱུར་པ་འབྱུང་།།དེ་ནི་བདེན་བཞིའི་སྤྱོད་ཡུལ་ཅན།།རྣམ་པ་བཅུ་དྲུག་དྲོ་བ་ལས།།རྩེ་མོ་དེ་ཡང་དེ་དང་འདྲ།།གཉིས་ཀ་ཆོས་ཀྱིས་རྣམ་པ་གཏོད།།གཞན་དག་གིས་ཀྱང་འཕེལ་བར་བྱེད།།དེ་ལས་བཟོད་པ་ཡང་སྐྱེ་སྟེ།།རྣམ་གཉིས་དེ་བཞིན་བཟོད་པ་ནི།།ཐམས་ཅད་ཆོས་ཀྱིས་འཕེལ་བར་བྱེད།།ཆེན་པོ་འདོད་གཏོགས་སྡུག་བསྔལ་ཡུལ།།དེ་ནི་སྐད་ཅིག་གཅིག་དེ་བཞིན།ཆོས་མཆོག་ཐམས་ཅད་ཕུང་པོ་ལྔ།།ཐོབ་པ་མ་གཏོགས་དེ་ལྟར་ན།།ངེས་འབྱེད་ཆ་མཐུན་རྣམ་པ་བཞི།།སྒོམ་བྱུང་མི་ལྕོགས་མེད་པ་དང་།ཁྱད་པར་བསམ་གཏན་ས་པའོ།།གཉིས་ནི་འོག་ནའང་ཡོད་པའམ།།འདོད་རྟེན་ཆོས་མཆོག་བུད་མེད་ཀྱིས།།གཉིས་ཀའི་རྟེན་ཅན་འཐོབ་པར་འགྱུར།།འཕགས་པས་དེ་དག་ས་བོར་ནས།།གཏོང་ངོ་འཕགས་མིན་འཆི་བས་སོ།།དང་པོ་གཉིས་ཡོངས་ཉམས་པས་ཀྱང་།།དངོས་གཞི་དེ་ཉིད་ལ་བདེན་མཐོང་།།རྣམ་པར་ཉམས་ན་སྔོན་མེད་འཐོབ།།ཉམས་པ་གཉིས་ནི་མི་ལྡན་པ།།རྩེ་མོ་ཐོབ་པ་རྩ་མི་འཆད།།བཟོད་ཐོབ་ངན་སོང་མི་འགྲོའོ།།གཉིས་སློབ་རིགས་ལས་བཟློག་ནས་ནི།།སངས་རྒྱས་སུ་འགྱུར་གཞན་གསུམ་ཡང་།།སྟོན་དང་བསེ་རུ་བྱང་ཆུབ་བར།།བསམ་གཏན་མཐའ་རྟེན་གཅིག་ལ་ཀུན།།དེ་ཡི་སྔོན་དུ་ཐར་ཆ་མཐུན།།མྱུར་བ་སྲིད་པ་གསུམ་གྱིས་ཐར།།ཐོས་བསམ་ལས་བྱུང་ལས་གསུམ་མོ།།མི་ཡི་ནང་ནས་འཕེན་པར་བྱེད།།འཇིག་རྟེན་པ་ཡི་ཆོས་མཆོག་ལས།།ཆོས་ཀྱི་བཟོད་པ་ཟག་པ་མེད།།འདོད་སྡུག་བསྔལ་ལ་དེ་ནས་ནི།།དེ་ཉིད་ལ་ཆོས་ཤེས་དེ་བཞིན།།སྡུག་བསྔལ་ལྷག་ལ་རྗེས་བཟོད་ཤེས།།བདེན་པ་གསུམ་ལའང་དེ་བཞིན་ནོ།།དེ་ལྟར་བདེན་པ་མངོན་རྟོགས་འདི།།སེམས་བཅུ་དྲུག་གོ་རྣམ་གསུམ་སྟེ།།མཐོང་དམིགས་བྱ་བ་ཞེས་བྱ་བའོ།།དེ་ནི་ཆོས་མཆོག་དང་ས་གཅིག།བཟོད་དང་ཤེས་པ་གོ་རིམ་བཞིན།།བར་ཆད་མེད་དང་རྣམ་གྲོལ་ལམ།།དེ་ལ་སྐད་ཅིག་བཅོ་ལྔ་ནི།།མ་མཐོང་མཐོང་ཕྱིར་མཐོང་བའི་ལམ།།དབང་པོ་རྣོ་རྟུལ་དེ་དག་ཏུ།།དད་དང་ཆོས་ཀྱི་རྗེས་འབྲང་བ།།སྒོམ་པས་སྤང་བྱ་མ་སྤངས་ན།།འབྲས་བུ་དང་པོ་ལ་ཞུགས་པ།།རྣམ་ལྔའི་བར་བཅོམ་གཉིས་པ་ལ།།དགུ་པ་ཚུན་ཆད་ཟད་པ་ཡིན།།འདོད་པའམ་ཡང་ན་གོང་མ་ལས།།ཆགས་བྲལ་གསུམ་པ་ལ་ཞུགས་པ།།གང་ཞིག་གང་ལ་ཞུགས་པ་ནི།།བཅུ་དྲུག་པ་ལ་དེ་འབྲས་གནས།།དེ་ཚེ་དབང་པོ་རྣོ་རྟུལ་དག།དད་པས་མོས་དང་མཐོང་བས་ཐོབ།།འབྲས་ཐོབ་འབྲས་བུ་ཁྱད་པར་གྱི།།ལམ་ཐོབ་མེད་པས་དེ་ཡི་ཕྱིར།།འབྲས་གནས་ཁྱད་པར་བྱ་བའི་ཕྱིར།།མི་བརྩོན་པ་ནི་ཞུགས་མ་ཡིན།།ས་དང་ས་ན་ཉེས་རྣམ་དགུ།།དེ་བཞིན་དུ་ནི་ཡོན་ཏན་རྣམས།།ཆུང་དང་འབྲིང་དང་ཆེ་རྣམས་ཀྱི།།ཆུང་ངུ་ལ་སོགས་ཐ་དད་ཕྱིར།།འབྲས་གནས་སྒོམ་སྤང་བྱ་མ་ཟད།།རེ་ལྟར་ཐོགས་ན་ལན་བདུན་པ།།རྣམ་གསུམ་རྣམ་བཞི་ལས་གྲོལ་བ།།ཚེ་གཉིས་གསུམ་དུ་རིགས་ནས་རིགས།།རྣམ་པ་ལྔ་ཡི་བར་བཅོམ་པ།།གཉིས་པ་ལ་ནི་ཞུགས་པའང་ཡིན།།རྣམ་པ་དྲུག་པ་ཟད་གྱུར་པ།།དེ་ནི་ལན་ཅིག་ཕྱིར་འོང་བ།།ཉེས་ཆ་བདུན་དང་བརྒྱད་ཟད་པ།།ཚེ་གཅིག་བར་ཆད་གཅིག་པ་དང་།།གསུམ་པ་ལ་ནི་ཞུགས་པའང་ཡིན།།དེ་དགུ་ཟད་པ་ཕྱིར་མི་འོང་།།དེ་ནི་བར་སྐྱེས་འདུ་བྱེད་དང་།།འདུ་བྱེད་མེད་ཡོངས་མྱ་ངན་འདའ།།གོང་དུ་འཕོ་བ་རྣམས་དེ་ནི།།བསམ་གཏན་སྤེལ་ན་འོག་མིན་འགྲོ།།དེ་འཕར་ཕྱེད་འཕར་ཐམས་ཅད་དུ།།འཆི་འཕོ་གཞན་སྲིད་རྩེ་མོར་འགྲོ།།གཞན་ནི་གཟུགས་མེད་འགྲོ་རྣམ་བཞི།།གཞན་ནི་འདི་ལ་མྱ་ངན་འདའ།།གསུམ་ལ་ཡང་རྣམ་གསུམ་ཕྱེ་ནས།།གཟུགས་སུ་ཉེར་འགྲོ་དགུར་བཤད་དོ།།དེ་དག་གི་ནི་ཁྱད་པར་རྣམས།།ལས་དབང་ཉོན་མོངས་བྱེ་བྲག་ལས།།གོང་དུ་འཕོ་བ་མ་ཕྱེ་བར།།དམ་པའི་འགྲོ་བ་བདུན་དུ་འདོད།།དམ་པ་དམ་མིན་འཇུག་མི་འཇུག།སོན་པ་ཕྱིར་མི་འོང་ཕྱིར་དེ།།འདོད་པར་ཚེ་ཡོངས་གྱུར་པའི་འཕགས།།ཁམས་གཞན་དུ་ནི་འགྲོ་བ་མེད།།དེ་དང་གོང་མར་སྐྱེས་པ་ནི།།ཡོངས་ཉམས་དབང་པོ་འཕོ་མི་སྟེན།།དང་པོ་བཞི་པ་སྤེལ་བར་བྱེད།།སྐད་ཅིག་མ་ནི་བསྲེས་པས་གྲུབ།།སྐྱེ་དང་གནས་པར་བྱ་ཕྱིར་དང་།།ཉོན་མོངས་པས་ནི་འཇིགས་ཕྱིར་ཡང་།།དེ་ནི་རྣམ་པ་ལྔ་ཡི་ཕྱིར།།གནས་གཙང་སྐྱེ་བ་ལྔ་ཁོ་ན།།འགོག་པ་ཐོབ་པའི་ཕྱིར་མི་འོང་།།ལུས་ཀྱིས་མངོན་སུམ་བྱེད་པར་འདོད།།སྲིད་རྩེའི་བར་ཆ་བརྒྱད་ཟད་པ།།དགྲ་བཅོམ་ཉིད་ལ་ཞུགས་པ་ཡིན།།དགུ་པའི་བར་ཆད་མེད་ལམ་ཡང་།།དེ་ནི་རྡོ་རྗེ་ལྟ་བུ་ཡིན།།དེ་ཟད་ཐོབ་དང་ཟད་པ་ཤེས།།དེ་ཚེ་དེ་མི་སློབ་དགྲ་བཅོམ།།འཇིག་རྟེན་འདས་ཀྱི་སྲིད་རྩེ་ལས།།ཆགས་བྲལ་གཞན་ལས་རྣམ་པ་གཉིས།།འཇིག་རྟེན་པ་ཡིས་ཆགས་བྲལ་བའི།།འཕགས་ལ་བྲལ་བའི་ཐོབ་རྣམ་གཉིས།།ཁ་ཅིག་འཇིག་རྟེན་འདས་ཀྱིས་ཀྱང་།།བཏང་ལ་ཉོན་མོངས་མི་ལྡན་ཕྱིར།།སྲིད་རྩེའི་ཕྱེད་ལས་རྣམ་གྲོལ་དང་།།གོང་དུ་སྐྱེས་པ་བཞིན་མི་ལྡན།།ཟག་མེད་མི་ལྕོགས་མེད་པ་ཡིས།།ཐམས་ཅད་ལས་ནི་འདོད་ཆགས་བྲལ།།ས་གསུམ་རྒྱལ་ལ་བསམ་གཏན་ནམ།།ཉེར་བསྡོགས་ལས་མཐའི་རྣམ་གྲོལ་ལམ།།གོང་མའི་ཉེར་བསྡོགས་ལས་མིན་འཕགས།།བརྒྱད་ཀྱིས་རང་གོང་ས་ལས་རྒྱལ།།འཇིག་རྟེན་པ་ཡི་རྣམ་གྲོལ་དང་།།བར་ཆད་མེད་ལམ་གོ་རིམ་བཞིན།།ཞི་སོགས་རགས་སོགས་རྣམ་པ་ཅན།།གོང་དང་འོག་མའི་སྤྱོད་ཡུལ་ཅན།།གལ་ཏེ་མི་གཡོའི་ཟད་ཤེས་ལས།།མི་སྐྱེའི་བློ་གྲོས་གལ་ཏེ་མིན།།ཟད་པ་ཤེས་སམ་མི་སློབ་ལྟ།།དེ་ནི་དགྲ་བཅོམ་ཐམས་ཅད་ལ།།དགེ་སྦྱོང་ཚུལ་ནི་དྲི་མེད་ལམ།།འབྲས་བུ་འདུས་བྱས་འདུས་མ་བྱས།།དེ་དག་བརྒྱད་ཅུ་རྩ་དགུའོ།།གྲོལ་ལམ་ཟད་པ་རྣམས་དང་བཅས།།འབྲས་བུ་བཞིར་རྣམ་གཞག་པ་ནི།།རྒྱུ་ལྔ་དག་ནི་སྲིད་ཕྱིར་རོ།།འབྲས་ལ་སྔོན་ལམ་གཏོང་བ་དང་།།གཞན་ཐོབ་པ་དང་ཟད་བསྡོམས་དང་།།ཤེས་པ་བརྒྱད་ཚན་ཐོབ་པ་དང་།།རྣམ་པ་བཅུ་དྲུག་ཐོབ་པའོ།།འཇིག་རྟེན་པ་ཡིས་ཐོབ་འབྲས་ནི།།བསྲེས་དང་ཟག་མེད་ཐོབ་འཛིན་ཕྱིར།།དེ་ཉིད་ཚངས་ཚུལ་ཚངས་པ་ཡི།།འཁོར་ལོ་ཚངས་པས་བསྐོར་ཕྱིར་རོ།།ཆོས་ཀྱི་འཁོར་ལོ་མཐོང་བའི་ལམ།།མྱུར་བར་འགྲོ་སོགས་རྩིབས་སོགས་ཀྱིས།།འདོད་པར་གསུམ་ཐོབ་ཐ་མ་ནི།།གསུམ་དུའོ་གོང་ན་མཐོང་ལམ་མེད།།མི་སྐྱོ་ལུང་ལས་འདིར་རྩོམ་ཞིང་།།དེར་མཐར་ཕྱིན་ཅེས་འབྱུང་ཕྱིར་རོ།།དགྲ་བཅོམ་དྲུག་འདོད་དེ་དག་ལས།།ལྔ་ནི་དད་པས་མོས་ལས་སྐྱེས།།དེ་དག་རྣམ་གྲོལ་དུས་དང་སྦྱོར།།མི་གཡོའི་ཆོས་ཅན་མི་གཡོ་བ།།དེ་ཕྱིར་དེ་དུས་མི་སྦྱོར་གྲོལ།།དེ་ནི་མཐོང་ཐོབ་རྒྱུ་ལས་བྱུང་།།ཁ་ཅིག་དང་པོ་ནས་དེའི་རིགས།།ཁ་ཅིག་སྦྱངས་པ་ལས་གྱུར་ཏོ།།བཞི་ནི་རིགས་ལས་ལྔ་འབྲས་ལས།།ཉམས་འགྱུར་དང་པོ་ལས་མ་ཡིན།།སློབ་དང་འཕགས་མིན་རིགས་དྲུག་ལྡན།།མཐོང་བ་ལ་ནི་འཕོ་བ་མེད།།ཐོབ་དང་མ་ཐོབ་ཉེར་སྤྱད་ལས།ཡོངས་ཉམས་རྣམ་པ་གསུམ་ཞེས་བྱ།།སྟོན་ལ་ཐ་མ་མི་གཡོ་ལ།།བར་མའང་གཞན་ལ་རྣམ་གསུམ་མོ།།འབྲས་ལས་ཉམས་པ་འཆི་བ་མེད།།བྱ་བ་མ་ཡིན་དེ་མི་བྱེད།།མི་གཡོ་རྣམ་གྲོལ་བར་ཆད་མེད།།ལམ་དགུའོ་ཤིན་ཏུ་བསྟེན་ཕྱིར་རོ།།མཐོང་བས་ཐོབ་ལ་རེ་རེའོ།།ཟག་མེད་མི་ཡི་ནང་དུ་འཕོ།།མི་སློབ་ས་དགུ་ལ་བརྟེན་ཏེ།།སློབ་པ་དྲུག་ལ་གང་གི་ཕྱིར།།འཕེལ་བ་འབྲས་བུ་ཁྱད་པར་ཅན།།བཏང་སྟེ་འབྲས་བུ་ཐོབ་པར་འགྱུར།།སངས་རྒྱས་གཉིས་དང་ཉན་ཐོས་བདུན།།དེ་དགུ་དབང་པོ་རྣམ་དགུ་ཅན།།གང་ཟག་བདུན་པོ་སྦྱོར་བ་དང་།།དབང་པོ་སྙོམས་འཇུག་རྣམ་གྲོལ་དང་།།གཉིས་ཀས་བྱས་པའོ་དེ་དག་དྲུག།འདི་ལྟར་ལམ་གསུམ་ལ་གཉིས་གཉིས།།འགོག་ཐོབ་གཉིས་ཀ་ལས་རྣམ་གྲོལ།།ཤེས་རབ་ཀྱིས་ནི་ཅིག་ཤོས་སོ།།སྙོམས་འཇུག་དབང་པོ་འབྲས་རྣམས་ཀྱིས།།སློབ་པ་ཡོངས་རྫོགས་ཤེས་བྱའོ།།གཉིས་ཀྱིས་མི་སློབ་ཡོངས་སུ་རྫོགས།།མདོར་ན་ལམ་ནི་རྣམ་བཞི་སྟེ།།ཁྱད་པར་ཅན་དང་རྣམ་གྲོལ་དང་།།བར་ཆད་མེད་དང་སྦྱོར་ཞེས་བྱ།།བསམ་གཏན་དག་གི་ལམ་རྣམས་སླ།།ས་གཞན་དག་གི་དཀའ་བ་ཡིན།།བློ་རྟུལ་མངོན་ཤེས་བུལ་བ་སྟེ།།ཅིག་ཤོས་ཀྱི་ནི་མངོན་ཤེས་མྱུར།།ཟད་དང་མི་སྐྱེ་ཤེས་པ་ནི།།བྱང་ཆུབ་དེ་དང་མཐུན་ཉིད་ཕྱིར།།སུམ་ཅུ་རྩ་བདུན་དེའི་ཕྱོགས་མཐུན།།མིང་གི་སྒོ་ནས་རྫས་སུ་བཅུ།།དད་དང་བརྩོན་འགྲུས་དྲན་པ་དང་།།ཤེས་རབ་ཏིང་འཛིན་བཏང་སྙོམས་དགའ།།རྟོག་དང་ཚུལ་ཁྲིམས་ཤིན་ཏུ་སྦྱངས།།དྲན་པ་ཉེར་གཞག་ཤེས་རབ་སྟེ།།བརྩོན་འགྲུས་ཡང་དག་འཇོག་ཅེས་བྱ།།རྫུ་འཕྲུལ་རྐང་པ་ཏིང་འཛིན་ཏོ།།གཙོ་བོ་སྨོས་པ་དེ་དག་ནི།།སྦྱོར་བྱུང་ཡོན་ཏན་ཀུན་ཀྱང་ཡིན།།སྡེ་ཚན་བདུན་ནི་གོ་རིམ་བཞིན།།ལས་ནི་དང་པོ་པ་དག་དང་།།ངེས་འབྱེད་ཆ་མཐུན་རྣམས་དང་ནི།།སྒོམ་དང་མཐོང་ལ་རབ་ཏུ་ཕྱེ།།བྱང་ཆུབ་ཡན་ལག་ལམ་ཡན་ལག།ཟག་པ་མེད་གཞན་རྣམ་གཉིས་སོ།།བསམ་གཏན་དང་པོ་ན་ཐམས་ཅད།།མི་ལྕོགས་མེད་ན་དགའ་མ་གཏོགས།།གཉིས་པ་ན་ནི་རྟོག་མ་གཏོགས།།གཉིས་ན་དེ་གཉིས་མ་གཏོགས་པ།།བསམ་གཏན་བར་ནའང་གཟུགས་མེད་པ།།གསུམ་ནའང་དེ་དང་ཚུལ་ཡན་ལག།བྱང་ཆུབ་དང་ནི་ལམ་ཡན་ལག།མ་གཏོགས་འདོད་ཁམས་སྲིད་རྩེ་ན།།བདེན་གསུམ་མཐོང་ན་ཚུལ་ཁྲིམས་དང་།།ཆོས་ལ་ཤེས་ནས་དད་པ་འཐོབ།།ལམ་མངོན་རྟོགས་ན་སངས་རྒྱས་དང་།།དེ་ཡི་དགེ་འདུན་དག་ལ་ཡང་།།ཆོས་བདེན་གསུམ་དང་རང་སངས་རྒྱས།།བྱང་ཆུབ་སེམས་དཔའི་ལམ་ཡིན་ནོ།།རྫས་སུ་གཉིས་ཏེ་དད་པ་དང་།།ཚུལ་ཁྲིམས་དྲི་མ་མེད་པ་ཡིན།།བཅིངས་ཕྱིར་སློབ་པའི་ཡན་ལག་ཏུ།།རྣམ་གྲོལ་མ་བཤད་དེ་རྣམ་གཉིས།།ཉོན་མོངས་བཅོམ་པ་འདུས་མ་བྱས།།མོས་པ་འདུས་བྱས་ཡན་ལག་ནི།།དེ་ཡིན་དེ་ཉིད་རྣམ་གྲོལ་གཉིས།།བྱང་ཆུབ་ཇི་སྐད་བཤད་ཤེས་པ།།མི་སློབ་སེམས་ནི་སྐྱེ་འགྱུར་བ།།སྒྲིབ་པ་ལས་ནི་རྣམ་གྲོལ་འགྱུར།།འགག་པར་འགྱུར་བའི་ལམ་གྱིས་ནི།།དེ་ཡི་སྒྲིབ་པ་རབ་ཏུ་སྤོང་།།འདུས་མ་བྱས་ཉིད་ཁམས་ཞེས་བྱ།།འདོད་ཆགས་ཀུན་ཟད་འདོད་ཆགས་བྲལ།།སྤངས་པའི་ཁམས་ནི་གཞན་དག་གོ།འགོག་པའི་ཁམས་ཞེས་བྱ་བ་གཞི།།སྡུག་བསྔལ་རྒྱུ་བཟོད་ཤེས་རྣམས་ཀྱིས།།ཡིད་འབྱུང་གང་གིས་སྤོང་འགྱུར་བ།།ཀུན་གྱིས་འདོད་ཆགས་བྲལ་བར་འགྱུར།།དེ་ལྟར་ན་ནི་མུ་བཞི་སྲིད།།ཆོས་མངོན་པའི་མཛོད་ཀྱི་ཚིག་ལེའུར་བྱས་པ་ལས་ལམ་དང་གང་ཟག་བསྟན་པ་ཞེས་བྱ་བ་སྟེ་གནས་དྲུག་པའོ།།།། གནས་བདུན་པ་ཡེ་ཤེས་བསྟན་པ། ༈དྲི་མེད་བཟོད་རྣམས་ཤེས་པ་མིན།།ཟད་དང་མི་སྐྱེའི་བློ་ལྟ་མིན།།དེ་ལས་གཞན་འཕགས་བློ་གཉིས་ཀ།གཞན་ཤེས་དྲུག་ནི་ལྟ་བའང་ཡིན།།ཤེས་པ་ཟག་བཅས་ཟག་པ་མེད།།དང་པོ་ཀུན་རྫོབ་ཅེས་བྱའོ།།ཟག་མེད་རྣམ་གཉིས་ཆོས་དང་ནི།།རྗེས་སུ་ཤེས་པ་ཁོ་ན་ཡིན།།ཀུན་རྫོབ་ཡུལ་ནི་ཐམས་ཅད་དོ།།ཆོས་ཤེས་བྱ་བའི་སྤྱོད་ཡུལ་ནི།།འདོད་སྡུག་བསྔལ་སོགས་རྗེས་ཤེས་པའི།།སྤྱོད་ཡུལ་གོང་མའི་སྡུག་བསྔལ་སོགས།།དེ་དག་ཉིད་བདེན་བྱེ་བྲག་གིས།།བཞི་སྟེ་རྣམ་བཞི་དེ་དག་ནི།།མི་སྐྱེ་བ་དང་ཟད་པ་ཤེས།།དེ་གཉིས་དང་པོ་སྐྱེས་པ་ནི།།སྡུག་བསྔལ་རྒྱུ་རྗེས་ཤེས་པ་ཡིན།།བཞི་ལས་ཕ་རོལ་སེམས་རིག་པ།།དེས་ནི་ས་དབང་གང་ཟག་འདས།།ཞིག་དང་མ་སྐྱེས་མི་རིག་གོ།ཆོས་རྗེས་བློ་ཕྱོགས་ཕན་ཚུན་མིན།།ཉན་ཐོས་མཐོང་བའི་སྐད་ཅིག་གཉིས།།རིག་སྟེ་བསེ་རུ་ལྟ་བུས་གསུམ།།སངས་རྒྱས་སྦྱོར་བ་མེད་པར་ཀུན།།ཟད་པར་ཤེས་པ་བདེན་རྣམས་ལ།།ཡོངས་ཤེས་ལ་སོགས་ངེས་པའོ།།ཡོངས་ཤེས་བྱར་མེད་ཅེས་ལ་སོགས།།མི་སྐྱེ་བ་ཡི་བློ་འདོད་དོ།།རང་བཞིན་དང་ནི་གཉེན་པོ་དང་།།རྣམ་པ་རྣམ་པ་སྤྱོད་ཡུལ་དང་།།སྦྱོར་དང་བྱ་བ་བྱས་ཉིད་དང་།།རྒྱུ་རྒྱས་པ་ལས་བཅུ་ཡིན་ནོ།།སྒོམ་པའི་ལམ་ལ་འགོག་པའམ།།ལམ་ལ་ཆོས་ཤེས་གང་ཡིན་དེ།།ཁམས་གསུམ་གྱི་ནི་གཉེན་པོ་ཡིན།།འདོད་པའི་ཁམས་ཀྱི་རྗེས་མ་ཡིན།།ཆོས་ཤེས་པ་དང་རྗེས་སུ་ཤེས།།རྣམ་པ་བཅུ་དྲུག་ཀུན་རྫོབ་ནི།།དེ་བཞིན་གཞན་དུའང་རང་རང་གི།བདེན་པའི་རྣམ་པས་བཞི་ཡིན་ནོ།།ཕ་རོལ་ཡིད་ཤེས་དྲི་མེད་ཀྱང་།།དེ་བཞིན་དྲི་མ་དང་བཅས་ནི།།ཤེས་བྱ་རང་གི་མཚན་ཉིད་རྣམ།།རྫས་རེ་རེ་ཞིག་སྤྱོད་ཡུལ་ལོ།།ལྷག་མ་རྣམ་པ་བཅུ་བཞི་ཅན།།སྟོང་དང་བདག་མེད་མ་གཏོགས་སོ།།དྲི་མེད་བཅུ་དྲུག་གཞན་རྣམ་མེད།།གཞན་ཡོད་ཅེས་པ་བསྟན་བཅོས་ལས།།རྫས་སུ་རྣམ་པ་བཅུ་དྲུག་གོ།རྣམ་པ་ཤེས་རབ་དང་བཅས་པའི།།དམིགས་དང་བཅས་པས་འཛིན་པར་བྱེད།།ཡོད་པ་ཐམས་ཅད་གཟུང་བྱ་ཡིན།།དང་པོ་རྣམ་གསུམ་གཞན་རྣམས་དགེ།དང་པོ་ས་རྣམས་ཐམས་ཅད་ན།།དྲུག་ན་ཆོས་ཤེས་བྱ་བར་དགུ།།རྗེས་ཤེས་བྱ་བ་དེ་བཞིན་དྲུག།གཞན་ཡིད་ཤེས་པ་བསམ་གཏན་བཞི།།དེ་ནི་འདོད་དང་གཟུགས་རྟེན་ཅན།།ཆོས་ཤེས་བྱ་བ་འདོད་རྟེན་ཅན།།ཁམས་གསུམ་པ་ཡི་རྟེན་ཅན་གཞན།།འགོག་བློ་དྲན་པ་ཉེར་གཞག་པ།།གཅིག་སྟེ་ཕ་རོལ་སེམས་བློ་ནི།།གསུམ་མོ་ལྷག་མ་བཞི་ཡིན་ནོ།།ཆོས་བློའི་སྤྱོད་ཡུལ་དགུ་ཡིན་ནོ།།ལམ་རྗེས་བློ་ཡི་དགུ་ཡིན་ནོ།།སྡུག་བསྔལ་རྒྱུ་བློའི་གཉིས་ཡིན་ནོ།།བཞི་ཡི་བཅུ་ཡིན་གཅིག་གི་མིན།།ཆོས་བཅུ་དག་ནི་སྦྱར་བར་བྱ།།ཁམས་གསུམ་པ་དང་དྲི་མེད་ཆོས།།འདུས་མ་བྱས་རྣམ་གཉིས་གཉིས་སོ།།ཀུན་རྫོབ་གཅིག་པུས་རང་ཚོགས་ལས།།གཞན་ནི་བདག་མེད་ཉིད་རིག་འགྱུར།།ཟག་མེད་སྐད་ཅིག་དང་པོ་ལ།།ཆགས་ཅན་ཤེས་པ་གཅིག་དང་ལྡན།།གཉིས་པ་ལ་གསུམ་ཡན་ཆད་ནི།།བཞི་ལ་རེ་རེ་འཕེལ་དང་ལྡན།།མཐོང་བའི་ལམ་ལ་བཟོད་པ་དང་།།ཤེས་པ་ཇི་ལྟར་སྐྱེས་པ་རྣམས།།མ་འོངས་པ་ཐོབ་དེ་ཉིད་ལ།།རྗེས་གསུམ་ལ་ནི་ཀུན་རྫོབ་ཀྱང་།།དེ་ཕྱིར་མངོན་རྟོགས་མཐའ་ཞེས་བྱ།།དེ་ནི་མི་སྐྱེའི་ཆོས་ཅན་ཡིན།།རང་དང་འོག་ས་འགོག་པའི་མཐའ།།རང་བདེན་རྣམ་ཅན་འབད་ལས་བྱུང་།།ཆགས་བཅས་བཅུ་དྲུག་པ་ལ་དྲུག།འདོད་ལས་ཆགས་དང་བྲལ་བས་བདུན།།དེ་ཡི་གོང་མ་ཆགས་བཅས་ཀྱི།།སྒོམ་པའི་ལམ་ལ་བདུན་ཐོབ་བོ།།ས་བདུན་ལས་རྒྱལ་མངོན་ཤེས་དང་།།མི་གཡོ་ཐོབ་དང་སྤེལ་སྒོམ་པའི།།བར་ཆད་མེད་པའི་ལམ་དག་དང་།།གོང་མའི་གྲོལ་བའི་ལམ་བརྒྱད་ལའང་།།སློབ་པ་སྦྱོང་བའི་གྲོལ་བ་ལ།།ཤེས་པ་དྲུག་དང་བདུན་འཐོབ་འམ།།བར་ཆད་མེད་པའི་ལམ་ལ་དྲུག།དེ་བཞིན་སྲིད་རྩེ་རྣམ་རྒྱལ་ལའང་།།ཟད་པ་ཤེས་པ་ལ་དགུ་འོ།།མི་གཡོ་བས་ནི་བཅུ་ཐོབ་བོ།།དེར་འཕོ་གྲོལ་བའི་ཐ་མ་ལའང་།།བཤད་པའི་ལྷག་མ་ལ་བརྒྱད་འཐོབ།།གང་ལས་ཆགས་བྲལ་བྱ་ཕྱིར་གང་།།ཐོབ་པ་དེར་ཡང་འོག་མའང་འཐོབ།།ཟད་པ་ཤེས་ལ་ཟག་བཅས་ཀྱང་།།ས་ཀུན་སྔོན་རྙེད་མི་ཐོབ་བོ།།རྙེད་དང་བསྟེན་ཅེས་བྱ་བ་ནི།།དགེ་བ་འདུས་བྱས་ཐོབ་པའོ།།གཉེན་པོ་དང་ནི་ཐག་སྲིང་བའི།།ཐོབ་པ་ཟག་དང་བཅས་པའི་ཡིན།།སངས་རྒྱས་ཆོས་ནི་མ་འདྲེས་པ།།སྟོབས་ལ་སོགས་པ་བཅོ་བརྒྱད་དོ།།གནས་དང་གནས་མིན་ཤེས་པ་བཅུ།།ལས་འབྲས་ལ་བརྒྱད་བསམ་གཏན་སོགས།།དབང་པོ་མོས་དང་ཁམས་ལ་ནི།།དགུའོ་ལམ་དག་ལ་བཅུའམ།།གཉིས་ནི་ཀུན་རྫོབ་ཤེས་པ་ཡིན།།ཟད་པ་དྲུག་གམ་བཅུ་ཡིན་ནོ།།སྔོན་གནས་འཆི་འཕོ་སྐྱེ་བའི་སྟོབས།།བསམ་གཏན་དག་ན་ལྷག་མ་ནི།།ས་རྣམས་ཀུན་ན་ཅི་ཡི་ཕྱིར།།འདིའི་སྟོབས་གང་ཕྱིར་ཐོགས་མི་མངའ།།སྐུ་ལ་སྲེད་མེད་བུ་ཡི་སྟོབས།།གཞན་དག་ཚིགས་ན་གླང་ཆེན་སོགས།།བདུན་བཅུས་གླགས་པའི་སྟོབས་ཡིན་ནོ།།དེ་ནི་རེག་བྱའི་སྐྱེ་མཆེད་དོ།།མི་འཇིགས་པ་ནི་རྣམ་པ་བཞི།།ཇི་ལྟར་སྟོབས་ནི་དང་པོ་དང་།།བཅུ་པ་གཉིས་པ་བདུན་པ་བཞིན།།དྲན་དང་ཤེས་བཞིན་བདག་ཉིད་གསུམ།།ཐུགས་རྗེ་ཆེན་པོ་ཀུན་རྫོབ་བློ།།ཚོགས་དང་རྣམ་པ་སྤྱོད་ཡུལ་དང་།།མཉམ་པའི་ཕྱིར་དང་ཆེས་ཆེའི་ཕྱིར།།ཐ་དད་བྱ་བ་རྣམ་པ་བརྒྱད།།སངས་རྒྱས་ཐམས་ཅད་ཚོགས་དང་ནི།།ཆོས་སྐུ་འགྲོ་བའི་དོན་སྤྱོད་པས།།མཉམ་པ་ཉིད་དེ་སྐུ་ཚེ་དང་།།རིགས་དང་སྐུ་བོང་ཚོད་ཀྱིས་མིན།།ཆོས་གཞན་སློབ་དང་ཐུན་མོང་ཡིན།།ཁ་ཅིག་སོ་སོའི་སྐྱེ་བོ་དང་།།ཉོན་མོངས་མེད་དང་སྨོན་གནས་ཤེས།།སོ་སོ་ཡང་དག་རིག་མངོན་སོགས།།ཉོན་མོངས་མེད་པ་ཀུན་རྫོབ་ཤེས།།བསམ་གཏན་མཐའ་ན་མི་གཡོའི་ཆོས།།མིས་སྐྱེད་ཉོན་མོངས་འདོད་གཏོགས་པ།།མ་སྐྱེས་གཞིར་བཅས་སྤྱོད་ཡུལ་ཅན།།སྨོན་ནས་ཤེས་པའང་དེ་བཞིན་ནོ།།དེ་ཡི་དམིགས་པ་ཐམས་ཅད་དོ།།དེ་བཞིན་ཆོས་དོན་ངེས་ཚིག་དང་།།སྤོབས་པ་སོ་སོ་ཡང་དག་རིག།གསུམ་ནི་གོ་རིམ་བཞིན་མིང་དང་།།དོན་དང་ངག་ལ་ཐོགས་མེད་ཤེས།།བཞི་པ་རིགས་པ་ཐགས་ཐོགས་མེད།།མངོན་བརྗོད་ལམ་ལ་དབང་ཉིད་ལ།།དེ་ཡི་དམིགས་པ་ངག་དང་ལམ།།ཤེས་པ་དགུའོ་ས་ཐམས་ཅད།།ཡང་དག་དོན་རིག་བཅུའམ་དྲུག།དེ་ནི་ཀུན་ན་གཞན་ཀུན་རྫོབ།།ཆོས་རིག་འདོད་དང་བསམ་གཏན་ན།།ངག་ནི་འདོད་དང་དང་པོ་ན།།མ་ཚང་བར་ནི་དེ་ཐོབ་མེད།།དྲུག་པོ་དེ་དག་རབ་མཐའ་བས།།དེ་ནི་རྣམ་དྲུག་བསམ་གཏན་མཐའ།།དེ་ནི་ས་ཀུན་གྱིས་མཐུན་བྱས།།འཕེལ་བའི་རབ་ཏུ་ཕྱིན་པ་ཡིན།།སངས་རྒྱས་ལས་གཞན་སྦྱོར་ལས་སྐྱེས།།རྫུ་འཕྲུལ་རྣ་བ་ཡིད་དང་ནི།།སྔོན་ཚེ་འཆི་འཕོ་སྐྱེ་བ་དང་།།ཟད་ཤེས་མངོན་དུ་བྱ་བ་ཡི།།མངོན་ཤེས་རྣམ་དྲུག་རྣམ་གྲོལ་བློ།།བཞི་ནི་ཀུན་རྫོབ་ཤེས་པ་སྟེ།།སེམས་ལ་ཤེས་པ་ལྔ་ཡིན་ནོ།།ཟད་པའི་མངོན་ཤེས་སྟོབས་བཞིན་ནོ།།ལྔ་ནི་བསམ་གཏན་བཞི་དག་ན།།རང་དང་འོག་སའི་ཡུལ་ཅན་ཡིན།།ཐོབ་བྱ་འདྲིས་པ་ཆགས་བྲལ་བས།།གསུམ་པ་དྲན་པ་ཉེར་གཞག་གསུམ།།དང་པོ་རྫུ་འཕྲུལ་རྣ་བ་མིག།མིག་དང་རྣ་བའི་མངོན་ཤེས་ནི།།ལུང་དུ་མ་བསྟན་ལྷག་རྣམས་དགེ།གསུམ་ནི་རིག་པ་སྔོན་མཐའ་སོགས།།མ་རིག་པ་ནི་ཟློག་ཕྱིར་རོ།།མི་སློབ་ཐ་མ་གཉིས་ནི་དེའི།།རྒྱུད་ལ་སྐྱེས་ཕྱིར་དེ་ཞེས་བྱ།།སློབ་ལ་འདོད་དེ་མ་རིག་དང་།།བཅས་རྒྱུད་ཕྱིར་ན་རིག་མ་བཤད།།དང་པོ་གསུམ་པ་དྲུག་པ་ནི།།ཆོ་འཕྲུལ་རྣམས་ཡིན་བསྟན་པ་མཆོག།མི་འཁྲུལ་ཕྱིར་དང་ཕན་པ་དང་།།ཡིད་འོང་འབྲས་ལ་སྦྱོར་བྱེད་ཕྱིར།།རྫུ་འཕྲུལ་ཏིང་འཛིན་དེ་ལས་ནི།།སྤྲུལ་དང་འགྲོ་བ་སྟོན་པ་ལ།།ཡིད་མགྱོགས་འགྲོ་བ་གཞན་དག་ལ།།ཕྱིན་བྱེད་མོས་པ་ལས་བྱུང་ཡང་།།འདོད་པར་གཏོགས་པའི་སྤྲུལ་པ་ནི།།ཕྱི་ཡི་སྐྱེ་མཆེད་བཞི་རྣམ་གཉིས།།གཟུགས་གཏོགས་གཉིས་སྤྲུལ་སེམས་དག་གིས།།དེ་དག་ཀྱང་ནི་བཅུ་བཞིའོ།།བསམ་གཏན་འབྲས་གཉིས་ནས་ལྔའི་བར།།རིམ་བཞིན་གོང་མ་ལས་སྐྱེས་མིན།།དེ་རྙེད་བསམ་གཏན་བཞིན་དེ་ནི།།དག་དང་རང་ལས་དེ་ལས་གཉིས།རང་གི་ས་པས་སྤྲུལ་པར་བྱེད།།སྨྲར་འཇུག་པ་ནི་འོག་མས་ཀྱང་།།སྟོན་མིན་སྤྲུལ་པ་པོ་དང་བཅས།།བྱིན་གྱིས་བརླབས་ནས་གཞན་འཇུག་ཕྱིར།།ཤི་བ་ལ་ཡང་བྱིན་རླབས་ཡོད།།མི་བརྟན་ལ་མེད་གཞན་དག་མིན།།དང་པོར་དུ་མས་གཅིག་ཡིན་ཏེ།།བྱང་བར་གྱུར་ནས་ཟློག་པའོ།།བསྒོམས་ལས་སྐྱེས་པ་ལུང་མ་བསྟན།།སྐྱེ་བ་ལས་སྐྱེས་རྣམ་གསུམ་མོ།།རྫུ་འཕྲུལ་གསང་སྔགས་སྨན་དག་དང་།།ལས་ལས་སྐྱེ་དང་རྣམ་པ་ལྔ།།ལྷ་ཡི་མིག་དང་རྣ་བ་ཡིན།།བསམ་གཏན་ས་པའི་གཟུགས་དང་བ།།རྟག་ཏུ་རྟེན་བཅས་མ་ཚང་མེད།།ཐག་རིང་ཕྲ་སོགས་སྤྱོད་ཡུལ་ཅན།།དགྲ་བཅོམ་བསེ་རུ་སྟོན་རྣམས་ཀྱིས།།སྟོང་གཉིས་གསུམ་དང་གྲངས་མེད་མཐོང་།།གཞན་ཡང་སྐྱེ་བས་ཐོབ་དེས་ནི།།སྲིད་པ་བར་མ་མི་མཐོང་ངོ་།།སེམས་ཤེས་དེ་ནི་རྣམ་གསུམ་གང་།།རྟོག་དང་རིགས་སྔགས་ཀྱིས་བྱས་པའང་།།དམྱལ་བ་པས་ནི་དང་པོ་ཤེས།།མི་ལ་སྐྱེ་བས་ཐོབ་པ་མེད།།ཆོས་མངོན་པའི་མཛོད་ཀྱི་ཚིག་ལེའུར་བྱས་པ་ལས་ཡེ་ཤེས་བསྟན་པ་ཞེས་བྱ་བ་སྟེ་གནས་བདུན་པའོ།།།། གནས་བརྒྱད་པ་སྙོམས་འཇུག་བསྟན་པ། ༈བསམ་གཏན་དག་ནི་རྣམ་གཉིས་བཞི།།དེར་སྐྱེ་བ་དག་རབ་ཏུ་བཤད།།སྙོམས་འཇུག་དགེ་བ་རྩེ་གཅིག་པ།།རྗེས་འབྲང་བཅས་ན་ཕུང་པོ་ལྔ།།དཔྱོད་དང་དགའ་དང་བདེ་དང་ལྡན།།ཡན་ལག་སྔ་སྔ་སྤངས་པ་ཡི།།དེ་བཞིན་གཟུགས་མེད་ཕུང་པོ་བཞི།།འོག་མའི་ས་ལས་དབེན་ལས་སྐྱེས།།ཉེར་བསྡོགས་གསུམ་དང་བཅས་པར་ནི།།གཟུགས་ཀྱི་འདུ་ཤེས་བཤིག་ཅེས་བྱ།།གཟུགས་མེད་པ་ན་གཟུགས་མེད་དོ།།གཟུགས་ནི་སེམས་ལས་སྐྱེ་བར་འགྱུར།།རྣམ་ཤེས་མཐའ་ཡས་མཁའ་མཐའ་ཡས།།ཅི་ཡང་མེད་ཅེས་བྱ་དེ་ལྟར།།སྦྱོར་ཕྱིར་དམན་ཕྱིར་འདུ་ཤེས་མེད།།འདུ་ཤེས་མེད་པའང་མ་ཡིན་ནོ།།དེ་ལྟར་སྙོམས་འཇུག་དངོས་གཞིའི་རྫས།།རྣམ་པ་བརྒྱད་བདུན་རྣམ་པ་གསུམ།།རོ་མྱང་ལྡན་དང་དག་པ་དང་།།ཟག་མེད་བརྒྱད་པ་རྣམ་པ་གཉིས།།རོ་མྱང་མཚུངས་ལྡན་སྲེད་བཅས་སོ།།འཇིག་རྟེན་པ་ཡི་དགེ་བ་ནི།།དག་པ་དེ་ནི་དེས་མྱང་བྱ།།ཟག་མེད་འཇིག་རྟེན་འདས་པའོ།།དང་པོ་ལ་ལྔ་རྟོག་དཔྱོད་དང་།།དགའ་དང་བདེ་དང་ཏིང་འཛིན་རྣམས།།གཉིས་པ་ལ་ནི་ཡན་ལག་བཞི།།རབ་དང་དང་ནི་དགའ་ལ་སོགས།གསུམ་པ་ལ་ལྔ་བཏང་སྙོམས་དང་།།དྲན་དང་ཤེས་བཞིན་བདེ་དང་གནས།།མཐའ་ན་བཞི་དྲན་བཏང་སྙོམས་དང་།།བདེ་མིན་སྡུག་མིན་ཏིང་འཛིན་རྣམས།།རྫས་སུ་བཅུ་གཅིག་དང་པོ་ནི།།ཤིན་ཏུ་སྦྱངས་པ་བདེ་བ་ཡིན།།རབ་ཏུ་དང་བ་དད་པ་ཡིན།།ལུང་རྣམ་གཉིས་ཕྱིར་དགའ་ཡིད་བདེ།།ཉོན་མོངས་ཅན་ལ་དགའ་བདེ་དང་།།རབ་དང་ཤེས་བཞིན་དྲན་པ་དང་།།བཏང་སྙོམས་དྲན་པ་དག་པ་མེད།།ཁ་ཅིག་ཤིན་ཏུ་སྦྱངས་བཏང་སྙོམས།།སྐྱོན་བརྒྱད་ལས་ནི་གྲོལ་བའི་ཕྱིར།།བཞི་པ་གཡོ་བ་མེད་པ་ཡིན།།རྟོག་དང་དཔྱོད་དང་དབུགས་དག་དང་།།བདེ་བ་ལ་སོགས་བཞི་ཡིན་ནོ།།སྐྱེ་བའི་བསམ་གཏན་དག་ན་ནི།།ཡིད་བདེ་བདེ་དང་བཏང་སྙོམས་དང་།།བཏང་སྙོམས་ཡིད་བདེ་བདེ་བ་དང་།།བཏང་སྙོམས་བཏང་སྙོམས་ཚོར་བ་ཡོད།།གཉིས་པ་སོགས་ན་ལུས་མིག་དང་།།རྣ་བའི་རྣམ་ཤེས་རྣམ་རིག་སློང་།།གང་ཡིན་དེ་ནི་དང་པོར་གཏོགས།།དེ་ལུང་མ་བསྟན་ཉོན་མོངས་མིན།།དེ་དང་མི་ལྡན་འདོད་ཆགས་བྲལ།།སྐྱེ་བ་ལས་ནི་དག་པ་འཐོབ།།ཟག་མེད་འདོད་ཆགས་བྲལ་བ་ཡིས།།ཉོན་མོངས་ཅན་ཉམས་སྐྱེ་བ་ཡིས།།ཟག་པ་མེད་པའི་མཇུག་ཐོགས་སུ།།ལྟག་འོག་གསུམ་པའི་བར་དགེ་བ།།སྐྱེ་འོ་དག་པ་ལས་དེ་བཞིན།།རང་གི་ས་པའི་ཉོན་མོངས་ཀྱང་།།ཉོན་མོངས་ཅན་ལས་རང་དག་དང་།།ཉོན་མོངས་འོག་མའི་དག་གཅིག་ཀྱང་།།འཆི་འཕོའི་དག་ལས་ཉོན་མོངས་ཀུན།།ཉོན་མོངས་ཅན་ལས་གོང་མ་མིན།།དག་པ་ཉམས་པའི་ཆ་མཐུན་སོགས།།རྣམ་བཞི་དེ་ནི་གོ་རིམ་བཞིན།།ཉོན་མོངས་སྐྱེ་དང་རང་ས་དང་།།གོང་དང་ཟག་མེད་རྗེས་མཐུན་པ།།ཉམས་ཆ་མཐུན་སོགས་མཇུག་ཐོགས་སུ།།གཉིས་དང་གསུམ་དང་གསུམ་དང་གཅིག།ས་བརྒྱད་རྣམ་གཉིས་འབྲེལ་བ་དང་།།གཅིག་བརྒལ་སོང་ཞིང་འོངས་ནས་ནི།།རིས་མི་མཐུན་པ་གསུམ་པར་འགྲོ།།ཐོད་རྒལ་གྱི་ནི་སྙོམས་འཇུག་ཡིན།།བསམ་གཏན་གཟུགས་མེད་རང་དང་ནི།།འོག་སའི་རྟེན་ཅན་འོག་དགོས་མེད།།སྲིད་རྩེར་འཕགས་པ་ཅི་ཡང་མེད།།མངོན་སུམ་བྱས་ནས་ཟག་པ་ཟད།།སྲེད་བཅས་རང་གི་སྲིད་ལ་དམིགས།།བསམ་གཏན་དགེ་ཡུལ་ཡོད་དགུ་ཡིན།།གཟུགས་མེད་དངོས་གཞི་དགེ་རྣམས་ཀྱི།།སྤྱོད་ཡུལ་ཟག་བཅས་འོག་མ་མིན།།ཟག་པ་མེད་པས་ཉོན་མོངས་རྣམས།།སྤོང་ངོ་ཉེར་བསྡོགས་དག་པས་ཀྱང་།།དེ་དག་ལ་ནི་ཉེར་བསྡོགས་བརྒྱད།།དག་པ་བདེ་མིན་སྡུག་བསྔལ་མིན།།དང་པོ་འཕགས་པའང་ཁ་ཅིག་གསུམ།།རྟོག་མེད་བསམ་གཏན་ཁྱད་པར་ཅན།།རྣམ་གསུམ་བདེ་མིན་སྡུག་བསྔལ་མིན།།དེ་ནི་ཚངས་ཆེན་འབྲས་བུ་ཅན།།མན་ཆད་རྟོག་དཔྱོད་བཅས་པ་ཡི།།ཏིང་འཛིན་ཡན་ཆད་གཉིས་ཀ་མེད།།མཚན་མེད་ཞི་བའི་རྣམ་པ་དང་།།སྟོང་ཉིད་བདག་མེད་སྟོང་ཉིད་དུ།།འཇུག་པའོ་སྨོན་པ་མེད་པ་ནི།།དེ་ལས་གཞན་བདེན་རྣམ་པ་དང་།།དག་དང་དྲི་མ་མེད་དེ་དག།དྲི་མེད་རྣམ་ཐར་སྒོ་གསུམ་མོ།།སྟོང་ཉིད་སྟོང་ཉིད་ཅེས་ལ་སོགས།།གཞན་ཡང་ཏིང་ངེ་འཛིན་གསུམ་མོ།།གཉིས་ནི་སྟོང་དང་མི་རྟག་པར།།མི་སློབ་པའི་ལ་དམིགས་པ་ཡིན།།མཚན་མ་མེད་པ་མཚན་མེད་ནི།།ཞི་བར་མ་བརྟགས་ཟད་པ་ལ།།ཟག་བཅས་མི་ནང་མི་གཡོ་ལ།།ཉེར་བསྡོགས་བདུན་ནི་མ་གཏོགས་སོ།།དགེ་བའི་བསམ་གཏན་དང་པོ་ནི།།བདེ་འགྱུར་ཏིང་འཛིན་སྒོམ་པ་ཡིན།།མིག་གི་མངོན་ཤེས་མཐོང་འགྱུར་འདོད།།སྦྱོར་བ་ལས་བྱུང་བློ་དབྱེར་འགྱུར།།རྡོ་རྗེ་ལྟ་བུའི་བསམ་གཏན་མཐའི།།གང་ཡིན་དེ་ཟག་ཟད་འགྱུར་སྒོམ།།ཚད་མེད་པ་ནི་བཞི་ཡིན་ནོ།།གནོད་སེམས་ལ་སོགས་གཉེན་པོའི་ཕྱིར།།ཞེ་སྡང་མེད་བྱམས་སྙིང་རྗེ་ཡང་།།ཡིད་བདེ་བ་ནི་དགའ་བ་ཡིན།།བཏང་སྙོམས་མ་ཆགས་རྣམ་པ་ནི།།ཀྱེ་མ་བདེར་གྱུར་སྡུག་བསྔལ་དང་།།དགར་གྱུར་སེམས་ཅན་རྣམས་སྙམ་པ།།སྤྱོད་ཡུལ་འདོད་པའི་སེམས་ཅན་རྣམས།།དགའ་བ་བསམ་གཏན་གཉིས་ན་ཡོད།།གཞན་ནི་དྲུག་ན་ཁ་ཅིག་ལྔ།།དེ་ཡིས་མི་སྤོང་མི་དག་གི།ནང་དུ་སྐྱེད་དོ་ངེས་གསུམ་ལྡན།།རྣམ་པར་ཐར་བརྒྱད་དང་པོ་གཉིས།།མི་སྡུག་བསམ་གཏན་གཉིས་ན་ཡོད།།གསུམ་པ་མཐའ་ན་དེ་མ་ཆགས།།གཟུགས་མེད་མཉམ་གཞག་དགེ་རྣམས་སོ།།འགོག་པའི་སྙོམས་པར་འཇུག་པའོ།།ཕྲ་བ་ཕྲ་བའི་མཇུག་ཐོགས་སུ།།རང་གི་དག་དང་འོག་མ་ཡི།།འཕགས་པའི་སེམས་ཀྱིས་དེ་ལས་ལྡང་།།དང་པོ་འདོད་གཏོགས་སྣང་ཡུལ་ཅན།།གང་དག་གཟུགས་ཅན་མིན་དེ་དག།སྤྱོད་ཡུལ་གོང་དང་རང་གི་སའི།།སྡུག་བསྔལ་སོགས་དང་རྗེས་ཤེས་ཕྱོགས།།ཟིལ་གྱིས་གནོན་པའི་སྐྱེ་མཆེད་བརྒྱད།།གཉིས་ནི་རྣམ་ཐར་དང་པོ་བཞིན།།གཉིས་ནི་གཉིས་པ་བཞིན་དེ་གཞན།།སྡུག་པའི་རྣམ་པར་ཐར་པ་བཞིན།།ཟད་པར་བཅུའོ་བརྒྱད་མ་ཆགས།།བསམ་གཏན་མཐའ་ན་སྤྱོད་ཡུལ་ནི།།འདོད་པ་གཉིས་ནི་གཟུགས་མེད་དག།སྤྱོད་ཡུལ་རང་གི་ཕུང་པོ་བཞི།།འགོག་པ་བཤད་ཟིན་ལྷག་མ་ནི།།འདོད་ཆགས་བྲལ་དང་སྦྱོར་བས་འཐོབ།།གཟུགས་མེད་ཅེས་བྱ་ཁམས་གསུམ་གྱི།།རྟེན་ཅན་ལྷག་མ་མི་ལས་སྐྱེ།།ཁམས་གཉིས་དག་ཏུ་གཟུགས་མེད་པ།།རྒྱུ་དང་ལས་ཀྱི་སྟོབས་ཀྱིས་སྐྱེ།།གཟུགས་ཀྱི་ཁམས་སུ་བསམ་གཏན་རྣམས།།དེ་དག་དང་ཆོས་ཉིད་ཀྱིས་ཀྱང་།།སྟན་པའི་དམ་ཆོས་རྣམ་གཉིས་ཏེ།།ལུང་དང་རྟོགས་པའི་བདག་ཉིད་དོ།།དེ་འཛིན་བྱེད་པ་སྨྲ་བྱེད་དང་།།སྒྲུབ་པར་བྱེད་པ་ཁོ་ན་ཡིན།།བདག་གིས་མངོན་པའི་ཆོས་འདི་ཕལ་ཆེར་ནི།།ཁ་ཆེ་བྱེ་བྲག་སྨྲ་བའི་ཚུལ་གྲུབ་བཤད།།ཉེས་པར་ཟིན་གང་དེ་འདིར་བདག་གི་ཉེས།།དམ་ཆོས་ཚུལ་ལ་ཚད་མ་ཐུབ་རྣམས་ཡིན།།ཆོས་མངོན་པའི་མཛོད་ཀྱི་ཚིག་ལེའུར་བྱས་པ་ལས་སྙོམས་འཇུག་བསྟན་པ་ཞེས་བྱ་བ་སྟེ་གནས་བརྒྱད་པའོ།།།། རྗེས་སུ་གདམས་པ། ༈སྟོན་པ་འཇིག་རྟེན་མིག་ནི་ཟུམ་གྱུར་ཅིང་།།དཔང་གྱུར་སྐྱེ་བོ་ཕལ་ཆེར་ཟད་པ་ན།།དེ་ཉིད་མ་མཐོང་རང་གར་གྱུར་པ་ཡི།།ངན་རྟོག་རྣམས་ཀྱིས་བསྟན་པ་འདི་དཀྲུགས་སོ།།རང་བྱུང་རང་བྱུང་བསྟན་པ་གཅེས་འཛིན་རྣམས།།མཆོག་ཏུ་ཞིར་གཤེགས་འགྲོ་མགོན་མེད་པ་ན།།འདོམས་མེད་ཡོན་ཏན་འཇོམས་པར་བྱེད་པ་ཡི།།དྲི་མས་དགའ་མགུར་དེང་སང་འདི་ན་སྤྱོད།།དེ་ལྟར་ཐུབ་པ་དག་གི་བསྟན་པ་ནི།།ལྐོག་མར་སྲོག་ཕྱིན་འདྲ་དང་དྲི་མ་རྣམས།།སྟོབས་དང་ལྡན་པའི་དུས་སུ་རིག་ནས་ནི།།ཐར་པ་འདོད་པ་དག་གིས་བག་ཡོད་གྱིས།། ཐ་མར་དགེ་བ་མཇུག ཆོས་མངོན་པའི་མཛོད་ཀྱི་ཚིག་ལེའུར་བྱས་པ་ཞེས་བྱ་བ་སློབ་དཔོན་ཤཱཀྱའི་དགེ་སློང་དབྱིག་གཉེན་གྱིས་མཛད་པ་རྫོགས་སོ།། རྒྱ་གར་གྱི་མཁན་པོ་ཛི་ན་མི་ཏྲ་དང་།བོད་ཀྱི་ལོ་ཙཱ་བ་བནྡེ་སྐ་བ་དཔལ་བརྩེགས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།
རྩོམ་འཕྲོ་ཀློགས། »