ཆོས་རྗེ་ཀུན་སྤངས་ཆེན་པོའི་གསུང་འབུམ། ཀ ཁ
ཀུན་སྤངས་ཆེན་ཐུགས་རྗེ་བརྩོན་འགྲུས་(༡༢༤༠-༡༣༡༣)ནི། རྒྱལ་བསྟན་སྤྱི་དང་བྱེ་བྲག་དུས་འཁོར་བསྟན་པའི་བདག་པོ་དང་། ཇོ་ནང་ཆོས་བརྒྱུད་ཀྱི་ཐོག་མའི་སྲོལ་འབྱེད་ཡིན། བོད་གཙང་སྟོད་བྱང་མདོག་གི་ངབ་ཕྱར་ཏེ། དེང་ངམ་རིང་རྫོང་ངབ་ཕྱར་གྲོང་ཚོར་སྐུ་འཁྲུངས་ཤིང་ཀུན་མཁྱེན་ཆོས་སྐུ་འོད་ཟེར་སོགས་བླ་མར་བརྟེན་ནས་ནང་བསྟན་མདོ་སྔགས་རིག་གནས་དང་བཅས་པར་སྦྱང་བརྩོན་མཛད་པ་མ་ཟད། བོད་དུ་འགྱུར་བའི་དུས་འཁོར་གྱི་ལུགས་སྲོལ་ཆེན་པོ་བཅུ་བདུན་པོར་ཐོས་བསམ་སྒོམ་པ་མཐར་ཕྱིན་མཛད།
དགུང་གྲངས་ང་གཅིག་ཐོག་(༡༢༩༤)ལོར་རི་ཁྲོད་ཆེན་མོ་ཇོ་ནང་དུ་ཕེབས་ནས་དུས་འཁོར་གྱི་འཆད་ཉན་དང་ཉམས་ཁྲིད་རྒྱ་ཆེར་མཛད་ཅིང་། སློབ་ཚོགས་དཔག་ཏུ་མེད་པ་འདུས་པས་ཇོ་ནང་པ་ཞེས་ཡོངས་སུ་གྲགས།
ཤམ་བྷ་ལའི་ཆོས་རྒྱལ་རིགས་ལྡན་རྣམས་ཀྱི་ཞལ་གཟིགས་དང་ཐོག་མཐའ་བར་གསུམ་དུ་དགེ་བའི་རྟགས་མཚན་བྱུང་བས། དཔལ་དུས་ཀྱི་འཁོར་ལོའི་བཀའ་བསྡུ་མཛད་དེ་དུས་འཁོར་རྒྱུད་སྙིང་རྩ་འགྲེལ་དུ་གྲགས་པ་གཏན་ལ་ཕབ། འདི་ནི་བོད་ཡུལ་དུ་དུས་འཁོར་བཀའ་བསྡུ་མཛད་པ་རིམ་པ་དང་བོ་ཡིན།
ཁོང་གིས་མཛད་པའི་དཔལ་དུས་ཀྱི་འཁོར་ལོའི་ཟབ་ལམ་རྡོ་རྗེ་རྣལ་འབྱོར་གྱི་ཁྲིད་ཡིག་ཐོག་མཐའ་བར་དགེ་སོགས་ཀྱང་བོད་ཡུལ་དུ་དུས་འཁོར་སྦྱོར་དྲུག་གི་ཁྲིད་ཡིག་སྔ་ཤོས་སུ་བགྲང་ལ། གསུང་རབ་པོད་ཆེན་བཞི་བཞུགས།
ཀུན་སྤངས་ཐུགས་རྗེ་བརྩོན་འགྲུས་དང་། ཁོང་གི་སློབ་མའི་གཙོ་བོ་བྱང་སེམས་རྒྱལ་བ་ཡེ་ཤེས། མཁས་བཙུན་ཡོན་ཏན་རྒྱ་མཚོ་གསུམ་ལ་ཇོ་ནང་ཐོག་མའི་བླ་མ་རྣམ་གསུམ་ཞེས་གྲགས། ཀུན་སྤངས་བུ་བཞིར་གྲགས་པ་དང་། འཕགས་འོད་ཡོན་ཏན་རྒྱ་མཚོ། འཇམ་དབྱངས་བཞི་ཐོག་པ་སོགས་སློབ་ཚོགས་བགྲང་ལས་འདས།
མཚན་གྱི་རྣམ་གྲངས་ལ། ཀུན་སྤངས་ཆེན་པོ་ཀུན་ཏུ་བཟང་པོ་དང་། ཞང་ཀུན་སྤངས་ཐུགས་རྗེ་བརྩོན་འགྲུས། རིགས་ལྡན་ཆེན་པོ་ཀུན་སྤངས་པ། མི་བསྐྱོད་རྡོ་རྗེ་སོགས་སུ་འབོད།