ཞལ་གདམས་དཔེ་རྒྱན་གསལ་བ་བཞུགས།
རྒྱལ་ཁམས་པ་ཏཱ་ར་ནཱ་ཐ།
རྒྱལ་བ་རི་དྭགས་དབང་པོ་གང༌།།
དཔག་ཡས་ཡོན་ཏན་འབྱོར་བ་ཡིས།།
ཁེངས་པས་སེངྒེའི་སྒྲ་བསྒྲགས་བཞིན།།
གཉིས་མེད་གསུང་པའི་བསྟན་པ་ལ།།
གུས་པས་བློ་ལྡན་ཕྱག་འཚལ་ཏེ།།
གདམས་པའི་སྒྲོན་མེ་རབ་སྦར་བས།།
སྙན་ཚིག་རི་མོའང་གསལ་བར་བྱ།།
འབྱོར་བ་བཅུ་དང་ལྡན་པའི་ལུས།།
ཡིད་བཞིན་ནོར་བུ་ལྟ་བུར་དཀོན།།
མི་ཟད་གཏེར་ཆེན་དམ་པ་ལྟར།།
ཕུན་ཚོགས་ཐམས་ཅད་འདི་ལས་ཐོབ།།
ཅེས་པ་འདི་ནི་ཆོས་ཀྱི་དཔེ།།
ལུས་འདི་ཆུ་ཡི་ལྦུ་བ་འདྲ།།
དབུགས་ཀྱང་སྟོན་ཀའི་ན་བུན་བཞིན།།
མཐོ་རིས་འབྱོར་བའི་དཔལ་འདི་ཡང༌།།
རྨི་ལམ་ལྟད་མོ་ཇི་བཞིན་ནོ།།
ཅེས་པ་འདི་ནི་དངོས་པོའི་དཔེ།།
ཞུན་མར་ཟད་པའི་སྒྲོན་མེ་འདི།།
འཆི་བདག་གནས་སུ་ཆས་པ་ཡི།།
སྐྱེས་བུའི་སྲོག་ལྟར་རྐྱེན་གཞན་ལ།།
ལྟོས་པ་མེད་པར་འཇིག་པ་ཉིད།།
ཅེས་པ་འདི་ནི་བཟློག་པའི་དཔེ།།
ལང་ཚོ་དར་བའི་ལུས་འདི་ནི།།
མཛེས་ཀྱང་མི་བརྟན་འཇའ་ཚོན་བཞིན།།
འཇའ་ཚོན་འདི་ཡང་ལུས་བཞིན་དུ།།
འདུས་བྱས་རྣམས་ཀྱི་ངང་ཚུལ་སྟོན།།
ཅེས་པ་འདི་ནི་ཕན་ཚུན་དཔེ།།
འདོད་ཡོན་རི་མོ་རབ་བཀྲ་བར།།
སེམས་འདི་རྣམས་པར་གཡོ་བ་ནི།།
བུང་བ་དུག་གི་མེ་ཏོག་ལ།།
རྒྱུག་པར་མཚུངས་ཀྱི་གཞན་དང་མིན།།
ཅེས་པ་འདི་ནི་ངེས་པའི་དཔེ།།
རྩ་ལྟར་གཡོ་བའི་སེམས་པ་གང༌།།
གློག་ལྟར་བཟུང་དུ་མེད་པ་སྟེ།།
འབབ་ཆུ་ལ་སོགས་རབ་གཡོ་བ།།
གཞན་ཡང་ཡོད་ན་འདི་དང་མཚུངས།།
ཅེས་པ་འདི་ནི་ངེས་མེད་དཔེ།།
ངན་འགྲོའི་ཚོར་བ་མི་བཟད་པ།།
རྣོ་བ་ཁོ་ནས་སྤུ་གྲི་དང༌།།
མཚུངས་པ་མ་ཡིན་འགྲོ་སེམས་ལ།།
འཇིགས་པ་བསྐྱེད་བྱེད་ཀྱིས་ཀྱང་ངོ༌།།
ཅེས་པ་འདི་ནི་བསྡུས་པའི་དཔེ།།
དམྱལ་བའི་སྡུག་བསྔལ་མྱོང་བ་པོ།།
ཀུན་གྱིས་སྡུག་བསྔལ་དྲག་པོར་ཤེས།།
མཐོ་རིས་འབྱོར་བ་སྡུག་བསྔལ་དུ།།
འཕགས་པས་མཁྱེན་པ་འདི་གཉིས་ཁྱད།།
ཅེས་པ་འདི་ནི་ཁྱད་པར་དཔེ།།
མཐོ་རིས་སྒེག་མོའི་བཞིན་གྱི་དཔལ།།
ཡོད་ཅེས་པད་དཀར་སྙེམས་མི་འཚལ།།
རབ་འབར་ཤལྨ་ལི་ནགས་ཀྱི།།
སྲིང་མོ་ལ་ཡང་དེ་ཡོད་ཕྱིར།།
ཅེས་པ་འདི་ནི་རབ་བཏགས་དཔེ།།
ཚངས་གནས་བསམ་གཏན་བདེ་བ་འདི།།
རྟག་བརྟན་གཡུང་དྲུང་དཔལ་འཛིན་ན།།
ཟག་མེད་བདེ་བས་མངོན་མཐོ་བའི།།
ཐར་བའི་གནས་དང་མཚུངས་པ་ཉིད།།
ཅེས་པ་འདི་ནི་རྨད་བྱུང་དཔེ།།
ཡིད་ནི་རབ་ཏུ་ཆགས་བྲལ་བས།།
ལང་ཚོ་རྒྱས་པའི་གཟུགས་སྡུག་དང༌།།
དུར་ཁྲོད་བོར་བའི་རུས་གོང་ནི།།
ཁྱད་པར་འབྱེད་ལ་རྨོངས་པར་གྱུར།།
ཅེས་པ་འདི་ནི་རྨོངས་པའི་དཔེ།།
ཅི་འདི་ཤིང་ལོའི་རྩེར་ཆགས་པའི།།
ཆུ་ཐིགས་རབ་ཏུ་གཡོ་བའམ།།
རབ་ཏུ་སྲེད་པའི་དབང་གྱུར་པའི།།
མི་ལུས་ཡིན་ཞེས་ཐེ་ཚོམ་སྐྱེད།།
ཅེས་པ་འདི་ནི་ཐེ་ཚོམ་དཔེ།།
འཇོ་སྒེག་ཚུལ་གྱིས་འགྲོ་བ་དང༌།།
སྲེད་ལྡན་མགུ་བ་བསྐྱེད་པའི་ཕྱིར།།
ངན་སྐྱུགས་ཕུང་པོ་མ་ཡིན་གྱི།།
རི་དྭགས་མིག་ཅན་ཡིན་པར་ཤེས།།
ཅེས་པ་འདི་ནི་རྟོགས་པའི་དཔེ།།
རྟག་ཏུ་རབ་འབར་སེམས་གདུངས་ཤིང༌།།
འཁོར་བར་སྤྱོད་པ་རྣམས་ཀྱི་གནས།།
ཉོན་མོངས་འཕེལ་བའི་ཁྱིམ་འདི་ནི།།
ལོ་མར་རལ་གྲིའི་ཚལ་དང་མཚུངས།།
ཅེས་པ་འདི་ནི་སྦྱར་བའི་དཔེ།།
ང་རྒྱལ་སྤངས་པའི་དགེ་སྒྲུབ་དང༌།།
སྦྱིན་ལ་དགའ་བའི་མཁས་རྣམས་ནི།།
གཏེར་གྱི་བདག་པོ་ཇི་བཞིན་དུ།།
སུ་ཝརྞ་ཡི་དཔལ་གྱིས་ཕྱུག།
ཅེས་པ་འདི་ནི་མཉམ་ཉིད་དཔེ།།
རབ་ཏུ་དབེན་པའི་བསམ་གཏན་འདི།།
འཁོར་ལོས་སྒྱུར་བའི་བཀའ་ཁྲིམས་དང༌།།
དགེ་ཆོས་སྤེལ་བར་མཚུངས་མོད་ཀྱི།།
རྣམ་གཡེང་ཡིད་དང་བྲལ་བས་འཕགས།།
ཅེས་པ་འདི་ནི་སྨད་པའི་དཔེ།།
མ་ལ་ཡ་ཡི་ནགས་ཀླུང་གི།
སེར་བུ་འདི་ཡིས་བདེ་བསྐྱེད་པ།།
བསོད་ནམས་ཡོངས་སུ་སྨིན་གྱུར་པས།།
ཆོས་ཐོས་པ་ཡང་དེ་དང་མཚུངས།། ཅེ
ས་པ་འདི་ནི་བསྟོད་པའི་དཔེ།།
བདེ་བའམ་སྡུག་བསྔལ་འདི་བསྐྱེད་ཅེས།།
སོ་སོར་ངེས་པར་བརྗོད་མི་བྱེད།།
འདོད་པ་ལྔ་ཡི་ལོངས་སྤྱོད་འདི།།
སྤུ་གྲིའི་སོ་འདྲ་ཞེས་རྟོག་གོ།
ཅེས་པ་འདི་ནི་ནི་རྟོག་པའི་དཔེ།།
རང་བཞིན་སྤྲོས་བྲལ་ཡེ་ཤེས་གང༌།།
ཡོན་ཏན་ལྡན་ཡང་འབད་རྩོལ་ཅན།།
འཁྲུལ་པས་བསླད་པའི་བསོད་ནམས་ཚོགས།།
ཚེ་གང་འབད་པས་ག་ལ་འགྲན།།
ཅེས་པ་འདི་ནི་དགག་པའི་དཔེ།།
ལྷུན་པོ་ནོར་བུའི་འོད་ཀྱིས་མཛེས།།
ཚངས་སྤྱོད་དུལ་བའི་དཔལ་གྱིས་ཕྱུག།
གཟི་བརྗིད་ལྡན་པར་མཚུངས་མོད་ཀྱང༌།།
རི་བོ་དེ་ལྟར་ལྷག་པ་མིན།།
ཅེས་འདི་མཛེས་པའམ་ངོ་བསྟོད་དཔེ།།
བློ་གྲོས་རྣམ་པར་འཕེལ་བྱེད་འདི།།
དབྱངས་ཅན་མ་ཡིན་ཐོས་པ་ཉིད།།
ལུས་ལ་སིམ་པ་བསྐྱེད་འདི་ཡང༌།།
རེག་མིན་ཤིན་ཏུ་སྦྱངས་པ་ཉིད།།
ཅེས་འདི་དེ་ཉིད་བརྗོད་པའི་དཔེ།།
གཟུགས་མཛེས་སོགས་དང་བསམ་གཏན་ལས།།
སྐྱེས་པའི་བདེ་བ་དེ་ཀུན་གྱིས།།
ཞི་བའི་བདེ་ལ་སྐྲུན་ཏུ་མེད།།
དེ་ཕྱིར་མྱ་ངན་འདས་ཉིད་དཔེ།།
ཅེས་འདི་ཐུན་མོངས་མིན་པའི་དཔེ།།
སྲིད་ཞིའི་ལེགས་ལམ་མ་ལུས་པ།།
བྱེད་པོས་གཅིག་ཏུ་བསྡུས་འདྲ་བའི།།
དགེ་བའི་བཤེས་གཉེན་མཆོག་དེ་དག།
བློ་ལྡན་ཀུན་གྱིས་བརྟེན་པར་བྱེད།།
ཅེས་པ་འདི་ནི་འབྱུང་མིན་དཔེ།།
རྩོད་པའི་དུས་འདིར་མང་ཐོས་འགའ།།
ངུར་སྨྲིག་འཛིན་ཡང་གཡོ་སྒྱུ་དང༌།།
གདུག་སེམས་རྟག་ཏུ་འཆང་བ་འདི།།
བདུད་རྩིའི་འོད་ལས་ཚ་གདུང་བཞིན།།
ཅེས་པ་འདི་ནི་སྲིད་མིན་དཔེ།།
བདུད་རྩིའི་བུམ་པ་དེ་བཞིན་དུ།།
གྲུབ་པའི་བཅུད་ལེན་ནོར་བུ་དང༌།།
དཔག་བསམ་ཤིང་ལྟར་དགེ་བ་ནི།།
བསྟེན་པ་ཙམ་གྱིས་འབྲས་རབ་སྟེར།།
ཅེས་པ་འདི་ནི་མང་པོའི་དཔེ།།
དགེ་བས་འཚོ་བའི་ལོངས་སྤྱོད་འདི།།
ཡོངས་འདུའི་ཚལ་དུ་རྣམ་རོལ་པའི།།
མཐོ་རིས་དབང་པོའི་འབྱོར་པ་ལ།།
ཡང་ཡང་ལོངས་སྤྱོད་བྱེད་པ་བཞིན།།
ཅེས་པ་འདི་ནི་རྣམ་འགྱུར་དཔེ།།
ཉིན་བྱེད་འོད་ཀྱིས་མཚན་མོ་དང༌།།
སྨན་གྱི་དབང་པོས་ཚ་གདུང་དང༌།།
དབང་པོས་ད་ནུའི་བུ་བཞིན་དུ།།
ཆོས་ཀྱིས་སྡིག་པ་འཇོམས་པར་བྱེད།།
ཅེས་པ་འདི་ནི་ཕྲེང་བའི་དཔེ།།
ཆོས་དང་འཁོར་བ་དེ་ནས་གཞན།།
སྐྱེ་བོ་སྡིག་པ་མྱང་འདས་རྣམས།།
བདུད་རྩིའི་འཁོར་ལོ་སྤྲེའུ་དང༌།།
དུག་དང་དགའ་ཚལ་དག་ཏུ་མཚུངས།།
ཅེས་འདི་དག་དོན་གསལ་བྱེད་ཀྱི།།
དཔེ་རྒྱན་གསལ་བྱེད་སྒྲ་གཅིག་པའོ།།
རྒྱ་མཚོ་བཞིན་དུ་སྲིད་པ་དང༌།།
འཛིན་ཁྲི་བཞིན་དུ་ཉོན་མོངས་ཏེ།།
གྲུ་བོ་ཆེ་བཞིན་ཆོས་ཀྱི་ལམ།།
དེད་དཔོན་མཁས་ལྟར་སྟོན་པའོ།།
ཅེས་འདི་གསལ་བྱེད་དུ་མ་ཅན།།
ཆུ་ཀླུང་བྱེ་བ་ཕྲག་བརྒྱ་ཡང༌།།
ཆུ་ཡི་གཏེར་དུ་གཞོལ་ཞིང་འབབ།།
ཐེག་པ་སྣ་ཚོགས་ཐ་དད་དོན།།
ཀུན་ཀྱང་ཆོས་ཀྱི་དབྱིངས་སུ་གཞོལ།།
ཅེས་འདི་ཟླ་བོའི་དངོས་པོའི་དཔེ།།
བྱང་ཆུབ་སེམས་ལས་སངས་རྒྱས་དང༌།།
སྒོ་ངའི་སྦུབས་ལས་བྱེད་པོ་སྐྲུན།།
རྒྱལ་བ་ཡང་དག་ལམ་སྟོན་ཅིང༌།།
གཞན་གྱིས་ལྟ་བའི་ཐིབས་པོར་ཁྲིར།།
ཅེས་པ་འདི་ནི་མཚུངས་སྦྱོར་དཔེ།།
འདྲེན་པ་བཅོམ་ལྡན་དེ་བཞིན་གཤེགས།།
རྣམ་མི་རྟོག་ལ་སེམས་ཅན་དོན།།
ལྷུན་གྲུབ་སྤྱོད་ཕྱིར་ཡིད་བཞིན་གྱི།།
ནོར་བུ་རིན་ཆེན་མཆོག་དང་མཚུངས།།
ཅེས་པ་འདི་ནི་རྒྱུ་ཡི་དཔེ།།
དེ་ལྟར་དཔེ་རྒྱན་སོ་གཉིས་པོ།།
དཔེ་རྒྱན་གྱི་ནི་སྐྱོན་རྣམ་གསུམ།།
ཕོ་མོ་མ་ནིང་རྟགས་འདྲེས་དང༌།།
དཔེ་དོན་མཆོག་དམན་ཆེས་པ་དང༌།།
མང་ཉུང་ཚིག་ཚོགས་འཁྲུགས་པའོ།།
དེ་དག་རྣམས་ལ་རིམ་པ་བཞིན།།
མེས་པོ་དྲན་པ་དྲང་སྲོང་གཙོ།།
བུད་མེད་གཡོ་སྒྱུ་འཛིན་མ་བཞིན།།
གཅམ་བུའི་ཚིག་གི་རྗེས་འཇུག་སྟེ།།
ལྕགས་ཕྱེ་གསེར་ལྡན་མ་བཞིན་ནོ།།
བདེ་སོགས་བདག་པོའི་ཁང་བཟང་ཡང༌།།
མེ་ཏོག་བཀྲམ་པའི་ཕྱུག་ལྷས་བཞིན།།
མགོ་བྲེགས་དལ་བུས་གོམ་པ་འགོད།།
འདི་དག་བདེ་གཤེགས་ཇི་བཞིན་ནོ།།
གྲོགས་མེད་རྒྱུ་བའི་རྣམ་ཤེས་འདི།།
ཚོང་པ་རྣམས་ཀྱི་དེད་དཔོན་མཚུངས།།
འདུ་བྱེད་རྣམས་ནི་བསེ་རུ་ལྟར།།
གཅིག་ཏུ་སྡུག་བསྔལ་གཅིག་པུ་བསྐྱེད།།
དེ་དག་སྐྱོན་མེད་དམིགས་བསལ་དཔེ།།
ཆོས་བཞིན་སྤྱོད་ན་བུད་མེད་ཀྱང༌།།
སྐྱེས་བུ་སྙིང་སྟོབས་མཆོག་ལྡན་ལྟར།།
ངེས་པར་བྱང་ཆུབ་སྒྲོད་པ་ཉིད།།
འདི་ལ་དཔྱད་པ་ཡོངས་མེད་དོ།།
གཡུལ་ལས་རྒྱལ་བའི་དཔའ་བོ་ལྟར།།
མཁས་པ་དགེ་སྦྱོང་མཆོག་ཏུ་བདེ།།
རིམ་ནད་ཤིན་ཏུ་བྱང་བ་ལྟར།།
སྤངས་པ་སླར་ཡང་བཟློག་པ་མེད།།
ཇི་ཙམ་སྲིད་པར་གྱུར་བའི་ཚོགས།།
མེ་ཡི་རང་བཞིན་ཚ་བ་ལྟར།།
སྡུག་བསྔལ་ཁོ་ནར་ཟད་པ་སྟེ།།
བློ་ལྡན་ཐར་ཕྱིར་འབད་པར་བྱོས།།
དེ་ལྟར་རྗེས་གདམས་ཅུང་ཟད་ཙམ།།
དཔེ་རྒྱན་ཚུལ་གྱིས་བརྗོད་པ་སྟེ།།
ངོ་མཚར་བསྐྱེད་པའི་ཚིག་དང་དོན།།
འགའ་ཡང་བདག་གིས་བརྗོད་མ་ནུས།།
འོན་ཀྱང་ཆོས་ཀྱི་ཚུལ་བཞིན་ཏེ།།
མི་བདག་ཁྱོད་ཀྱིས་བརྟག་པའི་འོས།།
ཆོས་ཀྱི་སྡེ་དང་ཐར་པའི་སྡེ་ཁོ་ནའི་དབང་དུ་བྱས་ཏེ་སྙན་ཚིག་ཅུང་ཟད་སྤེལ་བ་ངམ་རིངས་སུའོ།།
བཀྲ་ཤིས།